ഗർഭസ്ഥ ശിശുവിന്റെ ലിംഗ നിർണയ കേസുകളിൽ പോലീസ് നേരിട്ട് എഫ്ഐആർ എടുക്കരുത്, പ്രധാന നടപടികൾ സ്വീകരിക്കേണ്ടത് അപ്രോപ്രിയേറ്റ് അതോറിറ്റി, പോലീസ് പ്രാഥമിക അന്വേഷണ ഏജൻസിയായി പ്രവർത്തിക്കേണ്ട- സുപ്രിം കോടതി

ന്യൂഡൽഹി: ഗർഭസ്ഥ ശിശുവിന്റെ ലിംഗനിർണയവുമായി ബന്ധപ്പെട്ട കുറ്റങ്ങളിൽ പോലീസ് സാധാരണ നിലയിൽ നേരിട്ട് അന്വേഷണം നടത്തരുതെന്ന് സുപ്രീം കോടതി. 1994ലെ പ്രീ-കൺസെപ്ഷൻ ആൻഡ് പ്രീ-നേറ്റൽ ഡയഗ്നോസ്റ്റിക് ടെക്നിക്സ് (PCPNDT) നിയമപ്രകാരമുള്ള കേസുകളിൽ നിയമം ചുമതലപ്പെടുത്തിയിട്ടുള്ള ‘അപ്രോപ്രിയേറ്റ് അതോറിറ്റി’യാണ് പ്രധാന നടപടികൾ സ്വീകരിക്കേണ്ടതെന്നും കോടതി വ്യക്തമാക്കി.

ജസ്റ്റിസുമാരായ സഞ്ജയ് കരോൾ, എൻ.കെ. സിംഗ് എന്നിവരടങ്ങിയ ബെഞ്ചാണ് നിർണായക ഉത്തരവ് പുറപ്പെടുവിച്ചത്. PCPNDT നിയമത്തിലെ വ്യവസ്ഥകൾ പ്രകാരം പോലീസ് സ്വതന്ത്രമായി അന്വേഷണം നടത്തുകയോ കേസുകളിൽ എഫ്ഐആർ രജിസ്റ്റർ ചെയ്യുകയോ ചെയ്യുന്നത് സാധാരണ രീതിയാകരുതെന്നും കോടതി വ്യക്തമാക്കി.

“ഈ നിയമത്തിന്റെ ആവശ്യത്തിനായി പോലീസ് അന്വേഷണ ഉദ്യോഗസ്ഥരാകേണ്ടതില്ല. ഇത്തരം കേസുകളിൽ കഴിയുന്നത്ര പോലീസ് ഇടപെടൽ ഒഴിവാക്കണം. നിയമത്തിലെ വ്യവസ്ഥകൾ അനുസരിച്ച് അപ്രോപ്രിയേറ്റ് അതോറിറ്റി ആവശ്യപ്പെടുന്ന സാഹചര്യത്തിൽ പോലീസ് അനുബന്ധ സഹായം നൽകാമെന്നും ബെഞ്ച് വ്യക്തമാക്കി.

PCPNDT നിയമലംഘനങ്ങൾ കണ്ടെത്തുന്നതിനും നടപടിയെടുക്കുന്നതിനും നിയമപരമായി അധികാരപ്പെടുത്തിയിരിക്കുന്നത് അപ്രോപ്രിയേറ്റ് അതോറിറ്റിയേയാണ്. നിയമലംഘനവുമായി ബന്ധപ്പെട്ട പരാതികൾ നൽകാനുള്ള അധികാരവും ഈ അതോറിറ്റിക്കുണ്ട്. അതിനാൽ ഇത്തരം കേസുകളിൽ പോലീസ് പ്രാഥമിക അന്വേഷണ ഏജൻസിയായി പ്രവർത്തിക്കേണ്ടതില്ലെന്ന് സുപ്രീം കോടതി വ്യക്തമാക്കി.

അതുപോലെ അലഹബാദ് ഹൈക്കോടതിയുടെ നേരത്തെയുള്ള വിധിയും സുപ്രീം കോടതി ശരിവെച്ചു. PCPNDT നിയമപ്രകാരമുള്ള കുറ്റങ്ങൾ പോലീസ് സ്വമേധയാ അന്വേഷിക്കുകയോ അതിന്റെ അടിസ്ഥാനത്തിൽ നേരിട്ട് എഫ്ഐആർ രജിസ്റ്റർ ചെയ്യുകയോ ചെയ്യാൻ കഴിയില്ലെന്നായിരുന്നു ഹൈക്കോടതിയുടെ നിലപാട്. PCPNDT നിയമവുമായി ബന്ധപ്പെട്ട കേസുകളിൽ മെഡിക്കൽ പരിശോധനകളും സാങ്കേതിക വിഷയങ്ങളും ഉൾപ്പെടുന്നതിനാൽ വിദഗ്ധ വൈദഗ്ധ്യവും പ്രത്യേക പരിഗണനയും ആവശ്യമായി വരുമെന്ന് സുപ്രീം കോടതി നിരീക്ഷിച്ചു. അതിനാൽ നിയമപ്രകാരം നിയോഗിക്കപ്പെട്ട അപ്രോപ്രിയേറ്റ് അതോറിറ്റിക്കാണ് ഇത്തരം കേസുകളിൽ നേതൃത്വം നൽകേണ്ടതെന്നും കോടതി പറഞ്ഞു.

അതേസമയം, ഇത്തരം വിഷയങ്ങളിൽ പോലീസിന്റെ പങ്ക് പൂർണമായും ഒഴിവാക്കിയിട്ടില്ല. ആവശ്യമായ സാഹചര്യങ്ങളിൽ അപ്രോപ്രിയേറ്റ് അതോറിറ്റിക്ക് പോലീസ് സഹായം തേടാം. എന്നാൽ പോലീസിന്റെ ഇടപെടൽ അനുബന്ധമായത് മാത്രമായിരിക്കണം. State of Uttar Pradesh & Anr. vs Brij Pal Singh & Anr. എന്ന കേസിലാണ് സുപ്രീം കോടതി ഈ വിധി പ്രസ്താവിച്ചത്.

ഭാരതമാതാവിനോടുള്ള ഈ അനാദരവ് രാജ്യത്തെ രക്തസാക്ഷികളോടുള്ള അവഹേളനം, വോട്ട് ബാങ്കിനായി കോൺഗ്രസ് ‘പുതിയ മുസ്‌ലിം ലീഗ്’ ആയി മാറി, രൂക്ഷ വിമര്‍ശനവുമായി ബിജെപി ദേശീയ അധ്യക്ഷൻ