സമൂഹ മാധ്യമങ്ങൾ മനുഷ്യരുടെ ജീവിതത്തെ എത്രത്തോളം മാറ്റിമറിച്ചിരിക്കുകയാണ് എന്നതിന്റെ ഞെട്ടിക്കുന്ന ഉദാഹരണമായി മാറുകയാണ് കഴിഞ്ഞ ദിവസങ്ങളിൽ വൈറലായ ഒരു വീഡിയോ. ജീവിച്ചിരിക്കുന്ന ഭാര്യയ്ക്കായി ഭർത്താവ് ‘പിണ്ഡദാനം’ നടത്തുന്ന ദൃശ്യങ്ങളായിരുന്നു സമൂഹ മാധ്യമങ്ങളിൽ വ്യാപകമായി പ്രചരിച്ചത്. സോഷ്യൽ മീഡിയ ആസക്തിയും എത്രത്തോളം അപകടകരമായ അവസ്ഥയിലേക്ക് ആളുകളെ നയിക്കാമെന്ന ചർച്ചയ്ക്കും ഈ വീഡിയോ വഴിവെച്ചു.
ഭാര്യയുടെ അമിത സോഷ്യൽ മീഡിയ സാന്നിധ്യത്തോടുള്ള പ്രതിഷേധമായിട്ടാണ് ഇയാൾ ഈ വിചിത്ര നടപടിയിലേക്ക് കടന്നതെന്നാണ് റിപ്പോർട്ടുകൾ. നിരവധി തവണ ആവശ്യപ്പെട്ടിട്ടും ഭാര്യ റീലുകളും മറ്റ് സോഷ്യൽ മീഡിയ പ്രവർത്തനങ്ങളും കുറയ്ക്കാൻ തയ്യാറായില്ലെന്ന് ആരോപിച്ച ഭർത്താവ്, വിവാഹബന്ധം അവസാനിപ്പിക്കാനാണ് ഒടുവിൽ തീരുമാനിച്ചത്. എന്നാൽ സാധാരണ നിയമനടപടികളിലേക്കോ കുടുംബ കോടതിയിലേക്കോ പോകാതെ, അത്യന്തം വിവാദമായൊരു ‘പ്രതീകാത്മക ശവസംസ്കാര’ ചടങ്ങാണ് ഇയാൾ നടത്തിയത്.
ഗംഗാതീരത്ത് ചിത്രീകരിച്ച വീഡിയോയിൽ, അടിവസ്ത്രം മാത്രം ധരിച്ച് കഴുത്തിൽ തോർത്തു ചുറ്റിയ നിലയിൽ ഭർത്താവ് ഭാര്യയുടെ ചിത്രത്തിന് മാല അണിയിച്ച ശേഷം പലതവണ അതിലേക്ക് തുപ്പുന്നതും പിന്നീട് ചോറുരുള, പൂക്കൾ, തോർത്തു എന്നിവയ്ക്കൊപ്പം ചിത്രം നദിയിലേക്ക് ഒഴുക്കുന്നതുമാണ് കാണുന്നത്. ഹിന്ദു ആചാരപ്രകാരം മരിച്ചവരുടെ മോക്ഷത്തിനായി നടത്തുന്ന പവിത്രമായ ചടങ്ങായ ‘പിണ്ഡദാനം’ ഇത്തരത്തിൽ നടത്തിയത് പ്രതിഷേധങ്ങൾക്കും ഇടയാക്കിയിട്ടുണ്ട്.
Related Post
വൈറലായ വീഡിയോ ‘ഘർ കെ കലേഷ്’ എന്ന ജനപ്രിയ എക്സ് അക്കൗണ്ടിലൂടെയാണ് വ്യാപകമായി പ്രചരിച്ചത്. വീഡിയോയിൽ ഭാര്യയുടെ റീലുകളിൽ നിന്നുള്ള ചില ദൃശ്യങ്ങളും ചേർത്തിട്ടുണ്ട്. ഇതോടെ സംഭവം സമൂഹ മാധ്യമങ്ങളിൽ വൻ ചർച്ചയായി.
വീഡിയോയെ അനുകൂലിച്ചും വിമർശിച്ചും നിരവധി പ്രതികരണങ്ങളാണ് ഉയർന്നത്. ചിലർ ഇത് “അപമാനവും നിരാശയും നിറഞ്ഞ ഒരു ഭർത്താവിന്റെ മാനസിക തകർച്ച”യായി വിശേഷിപ്പിച്ചു. മറ്റുചിലർ, “ഭാര്യയുടെ റീലുകൾക്കെതിരായ പ്രതിഷേധമായി ഭർത്താവ് ചെയ്ത അവസാന റീൽ” എന്നാണ് പരിഹസിച്ചത്. സോഷ്യൽ മീഡിയയോടുള്ള അമിത ആസക്തി കുടുംബബന്ധങ്ങളെ തകർക്കുന്നുവെന്ന മുന്നറിയിപ്പായും ചിലർ വീഡിയോയെ അവതരിപ്പിച്ചു.
അതേസമയം, ഹിന്ദു വിശ്വാസങ്ങളെയും ആചാരങ്ങളെയും അപമാനിക്കുന്ന രീതിയിലാണ് ചടങ്ങ് അവതരിപ്പിച്ചതെന്ന വിമർശനവും ശക്തമായി. വ്യക്തിപരമായ ദേഷ്യം തീർക്കാൻ മതാചാരങ്ങളെ ഉപയോഗിച്ചുവെന്നാണ് പലരുടെയും അഭിപ്രായം. “ഇത് 2026 ആണെങ്കിലും ചിലർ ഇപ്പോഴും അന്ധവിശ്വാസങ്ങളിലും അസംബന്ധ പ്രകടനങ്ങളിലും ജീവിക്കുന്നു” എന്ന തരത്തിലുള്ള പ്രതികരണങ്ങളും വീഡിയോയ്ക്ക് താഴെ പ്രത്യക്ഷപ്പെട്ടു.
ഒരു കുടുംബ പ്രശ്നം എങ്ങനെ സോഷ്യൽ മീഡിയ പ്രദർശനമായി മാറുന്നു എന്ന ചോദ്യവും സംഭവം ഉയർത്തുന്നുണ്ട്. സ്വകാര്യ വേദനകൾ പോലും ‘വൈറൽ കണ്ടന്റ്’ ആക്കി മാറ്റുന്ന പുതിയ ഡിജിറ്റൽ സംസ്കാരത്തിന്റെ ഏറ്റവും പുതിയ ഉദാഹരണമായാണ് പലരും ഈ സംഭവത്തെ കാണുന്നത്.
