ന്യൂഡൽഹി: ഇന്ത്യ–പാകിസ്ഥാൻ അതിർത്തി പ്രദേശങ്ങളിലുടനീളം ഏകദേശം ആയിരം കിലോമീറ്റർ നീളത്തിൽ വ്യാപിച്ചുകിടക്കുന്ന വൻ മേഘക്കൂട്ടങ്ങളുടെ ഉപഗ്രഹ ചിത്രങ്ങൾ ഇന്ത്യ മെറ്ററോളജിക്കൽ ഡിപ്പാർട്ട്മെന്റ് പുറത്തുവിട്ടു. ഇതോടെ ഉത്തരേന്ത്യയിലെ കാലാവസ്ഥയിൽ ഗണ്യമായ മാറ്റങ്ങൾക്ക് സാധ്യതയുണ്ടെന്ന് മുന്നറിയിപ്പ് നൽകി.
ജമ്മു കാശ്മീർ, ഹിമാചൽ പ്രദേശ്, പഞ്ചാബ്, ഹരിയാന, രജസ്ഥാൻ എന്നീ സംസ്ഥാനങ്ങളിലെയും പാകിസ്ഥാനോട് ചേർന്ന പ്രദേശങ്ങളിലെയും വരും ദിവസങ്ങളിൽ ശക്തമായ മഴക്കും ഇടിമിന്നലിനും കാറ്റിനും സാധ്യതയുണ്ടെന്നാണ് പ്രവചനം. അടുത്ത 48 മുതൽ 72 മണിക്കൂർ വരെ മഴ തുടരാനിടയുണ്ടെന്നും ചില മേഖലകളിൽ ആലിപ്പഴവർഷവും ഉണ്ടായേക്കാമെന്നും അധികൃതർ അറിയിച്ചു.
മെഡിറ്ററേനിയൻ പ്രദേശത്ത് രൂപംകൊണ്ട ശക്തമായ ‘വെസ്റ്റേൺ ഡിസ്റ്റർബൻസ്’ ആണ് ഈ കാലാവസ്ഥാ മാറ്റത്തിന് കാരണമെന്ന് വിദഗ്ധർ വ്യക്തമാക്കി.
മഴ ശക്തമാകുന്ന സാഹചര്യത്തിൽ കൃഷിക്കും വിളവെടുപ്പിനും തിരിച്ചടി ഉണ്ടാകാൻ സാധ്യതയുള്ളതിനാൽ കർഷകർ ജാഗ്രത പാലിക്കണമെന്ന് നിർദേശം നൽകിയിട്ടുണ്ട്. നഗരപ്രദേശങ്ങളിൽ വെള്ളക്കെട്ടും ഗതാഗത തടസ്സങ്ങളും ഉണ്ടാകാമെന്ന മുന്നറിയിപ്പും നൽകിയിട്ടുണ്ട്.
ഇപ്പോൾ അനുഭവപ്പെടുന്ന ചൂടിൽ നിന്ന് ഈ മഴ താൽക്കാലിക ആശ്വാസം നൽകുമെങ്കിലും, മഴയ്ക്ക് ശേഷം വീണ്ടും ചൂട് ഉയരാൻ സാധ്യതയുണ്ടെന്ന് കാലാവസ്ഥാ വിദഗ്ധർ ചൂണ്ടിക്കാട്ടുന്നു. ഔദ്യോഗിക നിർദേശങ്ങൾ കൃത്യമായി പാലിക്കണമെന്ന് പൊതുജനങ്ങളോട് അധികൃതർ അഭ്യർത്ഥിച്ചു.
