ആലപ്പുഴ: അവസരവാദികള്‍ ചരിത്രത്തിന്റെ ചെളിക്കുണ്ടില്‍ വീണ് താഴുമെന്ന മുഖ്യമന്ത്രി പിണറായി വിജയന്റെ പരാമര്‍ശത്തിനെതിരെ അമ്പലപ്പുഴയില്‍ മത്സരിക്കുന്ന ജി സുധാകരന്‍. താന്‍ ഒരു ചെളിക്കുണ്ടിലും പോയിട്ടില്ലെന്നും ഉറച്ച പ്രതലത്തിലാണ് ഇപ്പോഴും ഇരിക്കുന്നതെന്നും അതിനുള്ള അടവും തന്ത്രവും അറിയാമെന്നും ജി സുധാകരന്‍ മറുപടി നല്‍കി.’പുന്നപ്ര- വയലാര്‍ സമരകാലത്ത് തെങ്ങില്‍ കയറി നടന്നവര്‍ ഇന്നു വലിയ സ്വാതന്ത്ര്യസമര സേനാനിയായി നടക്കുന്നു.
എനിക്ക് ചരിത്രബോധമില്ലെന്നാണ് മുഖ്യമന്ത്രി പറയുന്നത്. 75 വയസ് കഴിഞ്ഞവരെ ഇറച്ചിക്കടയില്‍ കെട്ടിത്തൂക്കണമെന്ന് പറഞ്ഞവരാണ് ചരിത്രം പഠിക്കേണ്ടത്. പിണറായിയ്ക്ക് വയസ്സായില്ലേ?ഏറ്റവും പ്രായം കുറഞ്ഞ മേയര്‍ തിരുവനന്തപുരത്ത് ഉണ്ടായിട്ട് എന്തായി? സജി ചെറിയാന്‍ ഒരു കൊച്ചു മുതലാളിയാണ്.
അഞ്ചു പഞ്ചായത്തുകള്‍ ബിജെപിക്ക് കൊടുത്തു. ടേം വ്യവസ്ഥ വന്നത് എന്നെപ്പോലുള്ളവരെ മാറ്റാനാണെന്ന് അന്ന് പലരും പറഞ്ഞപ്പോള്‍ വിശ്വസിച്ചില്ല. ഇന്ന് എനിക്ക് അത് ബോധ്യമായി. ഞാന്‍ യുഡിഎഫ് സ്വതന്ത്രനല്ല. യുഡിഎഫ് പിന്തുണയ്ക്കുന്ന സ്വതന്ത്രനാണ്’- സുധാകരന്‍ പറഞ്ഞു.
