Related Post
കണ്ണൂർ: തളിപ്പറമ്പിലും ധർമടത്തും യുഡിഎഫ് തെരഞ്ഞെടുപ്പ് പ്രചാരണത്തിനു നേരെ സിപിഎം ആക്രമണം. തളിപ്പറമ്പിൽ യുഡിഎഫ് സ്വതന്ത്ര സ്ഥാനാർഥി ടി.കെ. ഗോവിന്ദന്റെ തെരഞ്ഞെടുപ്പ് പ്രചാരണ വാഹനത്തിനു നേരെയാണ് ആക്രമണമുണ്ടായത്. തെരഞ്ഞെടുപ്പ് പ്രചാരണ എൽഇഡി വാഹനം മലപ്പട്ടം സെൻട്രലിൽ വച്ച് സിപിഎം പ്രവർത്തകർ ആക്രമിക്കുകയായിരുന്നു. വാഹനം തടഞ്ഞ ശേഷമായിരുന്നു ആക്രമണം.
അതേസമയം ധർമടത്തെ യുഡിഎഫ് സ്ഥാനാർഥി വി.പി. അബ്ദുൽ റഷീദിനെ കയ്യേറ്റം ചെയ്യാനും സിപിഎം ശ്രമമുണ്ടായി. അഞ്ചരക്കണ്ടി മുഴപ്പാല കൈതപ്രത്ത് വച്ചാണ് ആക്രമണശ്രമം ഉണ്ടായത്. സിപിഎം പ്രവർത്തകൻ ലിജുവിന്റെ നേതൃത്വത്തിൽ വാഹനം തടഞ്ഞ ശേഷമായിരുന്നു കയ്യേറ്റം ചെയ്യാനുള്ള ശ്രമം നടത്തിയത്. അബ്ദുൽ റഷീദിന്റെ പ്രചാരണ വാഹനത്തിനു നേരെയും ആക്രമണം ഉണ്ടായി. സ്ഥാനാർത്ഥിക്ക് നേരെ സിപിഎം കൊലവിളി നടത്തിയെന്നാണ് ആരോപണം. പോലീസ് സ്ഥലത്തെത്തി സ്ഥിതിഗതികൾ ശാന്തമാക്കി.
