ന്യൂഡൽഹി: അടുത്ത വർഷം നിയമസഭാ തിരഞ്ഞെടുപ്പ് നടക്കാനിരിക്കുന്ന അഞ്ച് സംസ്ഥാനങ്ങളിൽ പ്രത്യേക തീവ്ര വോട്ടർപട്ടിക പരിഷ്കരണമായ എസ്ഐആറിലൂടെ വോട്ടർമാരുടെ എണ്ണത്തിൽ 12.2 ശതമാനം കുറവ്. ആകെ 18.71 കോടിയായിരുന്ന വോട്ടർമാരുടെ എണ്ണം 2.29 കോടി കുറഞ്ഞ് 16.43 കോടിയായി. കുറഞ്ഞ വോട്ടർമാരിൽ ഭൂരിഭാഗവും ഉത്തർപ്രദേശിൽ നിന്നുള്ളവരാണ്.
ഉത്തർപ്രദേശിൽ 15.44 കോടിയായിരുന്ന വോട്ടർമാരുടെ എണ്ണം 13.40 കോടിയായി കുറഞ്ഞു. സംസ്ഥാനത്ത് 2.04 കോടി വോട്ടർമാരുടെ കുറവാണ് രേഖപ്പെടുത്തിയത്. പഞ്ചാബിൽ 2.15 കോടിയിൽനിന്ന് 2.01 കോടിയായി വോട്ടർമാരുടെ എണ്ണം കുറഞ്ഞു. 14 ലക്ഷമാണ് കുറവ്.
ഉത്തരാഖണ്ഡിൽ 80 ലക്ഷമായിരുന്ന വോട്ടർമാരുടെ എണ്ണം 72 ലക്ഷമായി കുറഞ്ഞു. എട്ട് ലക്ഷത്തിന്റെ കുറവാണ് രേഖപ്പെടുത്തിയത്. മണിപ്പൂരിൽ 20.90 ലക്ഷത്തിൽനിന്ന് 19.61 ലക്ഷമായി വോട്ടർമാരുടെ എണ്ണം കുറഞ്ഞു. ഏകദേശം 1.29 ലക്ഷമാണ് കുറവ്. ഗോവയിൽ 11.85 ലക്ഷത്തിൽനിന്ന് 10.58 ലക്ഷമായി കുറഞ്ഞു. 1.27 ലക്ഷം വോട്ടർമാരുടെ കുറവാണ് സംസ്ഥാനത്തുണ്ടായത്.
ജനുവരി ഒന്നിന് മുൻപ് 18 വയസ്സ് തികയുന്നവർക്കും വോട്ടർപട്ടികയിൽ പേര് ചേർക്കാൻ അവസരമുണ്ട്.
