വാഷിങ്ടണ്‍: യുഎസ് പ്രസിഡന്റ് ഡോണള്‍ഡ് ട്രംപിന്റെ മകന്‍ ഡോണള്‍ഡ് ട്രംപ് ജൂനിയര്‍ വിവാഹമോചിതനാകുന്നു. 12 വര്‍ഷത്തെ വിവാഹജീവിതത്തിനാണ് വനേസയും ഡോണള്‍ഡ് ട്രംപ് ജൂനിയറും തിരശീലയിടുന്നത്. വിവാഹമോചനം തേടി ഇരുവരം പരസ്പരസമ്മത ഉടമ്പടി കോടതിയില്‍ നല്‍കി. തമ്മിലും കുടുംബത്തോടുമുള്ള എല്ലാ ബഹുമാനങ്ങളും നിലനിര്‍ത്തി പിരിയുന്നുവെന്ന് ദമ്പതികള്‍ വാര്‍ത്താക്കുറിപ്പില്‍ അറിയിച്ചു.
മോഡലായിരുന്ന വനേസയെ 2005ലാണ് ഡോണള്‍ഡ് ട്രംപ് ജൂനിയര്‍ വിവാഹം കഴിക്കുന്നത്. ഇവര്‍ക്ക് അഞ്ചു മക്കളാണുള്ളത്. വിവാഹമോചനത്തിലേക്കു നയിച്ച കാരണമെന്താണെന്നു വ്യക്തമായിട്ടില്ല.
ഡോണള്‍ഡ് ട്രംപ് യുഎസ് പ്രസിഡന്റായി അധികാരമേറ്റതിനു പിന്നാലെയാണ് മകനും പ്രശസ്തിയിലേക്കുയര്‍ന്നത്. യുഎസ് തിരഞ്ഞെടുപ്പിലെ റഷ്യന്‍ ഇടപെടലിനെക്കുറിച്ച് ഡോണള്‍ഡ് ട്രംപ് ജൂനിയറിന് അറിയാമായിരുന്നുവെന്ന വിവരം കഴിഞ്ഞയിടെ പുറത്തുവന്നിരുന്നു. ഹിലരി ക്ലിന്റനെ മോശക്കാരിയാക്കുന്ന തരത്തില്‍ പ്രവര്‍ത്തിക്കാന്‍ ട്രംപ് ജൂനിയര്‍ സമ്മതം നല്‍കിയിരുന്നുവെന്ന് അദ്ദേഹത്തിന്റെ ഇമെയിലുകളില്‍നിന്ന് കണ്ടെത്തിയിരുന്നു.
Leave a Comment