ന്യൂഡല്‍ഹി: സഞ്ജയ് ലീല ബെന്‍സാലി ചിത്രം ‘പദ്മാവതി’നെതിരായ പ്രതിഷേധങ്ങള്‍ അനാവശ്യമാണെന്ന് മുതിര്‍ന്ന ബോളീവുഡ് നടി ആശ പരേഖ്. ചരിത്രത്താളുകളില്‍ രേഖപ്പെടുത്താന്‍ പോകുന്ന ചിത്രമായിരിക്കും ‘പദ്മാവത്’ എന്ന് പറഞ്ഞ അവര്‍ ഏറെ വ്യത്യസ്തമായ ചിത്രമാണ് ഇതെന്നും അഭിപ്രായപ്പെട്ടു. രജപുത്ര വിഭാഗത്തെ അപമാനിക്കുന്ന തരത്തിലുള്ളതൊന്നും തനിക്ക് ചിത്രത്തില്‍ കാണാനായില്ലെന്നും പിന്നെന്തിനാണ് ഈ പ്രതിഷേധങ്ങളെന്നും അവര്‍ ചോദിച്ചു.
ചിത്രത്തിലെ നായിക ദീപിക പദുക്കോണിന്റെ അഭിനയത്തെയും ആശ പരേഖ് വാനോളം പുകഴ്ത്തി. ബോളിവുഡില്‍ ഈ റോള്‍ ചെയ്യാന്‍ മറ്റാരും ഇല്ലെന്നായിരുന്നു അവരുടെ അഭിപ്രായം. സംവിധായകന്‍ സഞ്ജയ് ലീല ബെന്‍സാലിയേയും അവര്‍ അഭിനന്ദിച്ചു.
