ചെന്നൈ: തമിഴ്‌നാടിന് ദേശീയ ത്രിവർണ്ണ പതാകയ്‌ക്ക് സമാനമായി പ്രത്യേക സംസ്ഥാന പതാക വേണമെന്ന ടി.വി.കെ മന്ത്രിയുടെ ആവശ്യം രാഷ്‌ട്രീയ വിവാദത്തിലേക്ക്. പൊതുമരാമത്ത് മന്ത്രി ആധവ് അർജുനയാണ് തമിഴ്‌നാടിന് സ്വന്തമായി പതാക വേണമെന്നും മുഖ്യമന്ത്രി സി. ജോസഫ് വിജയ് തന്നെ അത് ആദ്യമായി ഉയർത്തണമെന്നും ആവശ്യപ്പെട്ടത്.
സംസ്ഥാനത്തിന്റെ ഭാഷാപരവും സാംസ്കാരികവുമായ സ്വത്വത്തിന് പ്രാധാന്യം നൽകുന്നതിന്റെ ഭാഗമായാണ് നിർദേശമെന്നാണ് മന്ത്രിയുടെ നിലപാട്. എന്നാൽ തമിഴ്, ഇന്ത്യൻ സ്വത്വങ്ങളെ പരസ്പരം എതിർത്ത് നിർത്തി വിഘടനവാദ മനോഭാവം വളർത്താനുള്ള നീക്കമാണിതെന്ന് ബിജെപി വിമർശിച്ചു. നവംബർ ഒന്നിന് തമിഴ്‌നാട് ദിനത്തോടനുബന്ധിച്ച് ചെന്നൈയിലെ മ്യൂസിയം ഓഡിറ്റോറിയത്തിൽ സർക്കാർ സംഘടിപ്പിച്ച പരിപാടിയിൽ സംസാരിക്കുകയായിരുന്നു ആധവ് അർജുന.
മറ്റ് സംസ്ഥാനങ്ങൾക്കുള്ളതുപോലെ തമിഴ്‌നാടിനും സ്വന്തമായി ഒരു പതാക വേണമെന്നാണ് അദ്ദേഹം പറഞ്ഞത്. പതാകയ്‌ക്ക് നിയമപരമായ വ്യവസ്ഥകൾ ഏർപ്പെടുത്തുന്നതിനായി പ്രത്യേക നിയമം കൊണ്ടുവരണമെന്നും മന്ത്രി ആവശ്യപ്പെട്ടു. നവംബർ ഒന്നിന് ആഘോഷിക്കുന്ന തമിഴ്‌നാട് ദിനത്തിലും ജൂലൈ 18-ന് തമിഴ്‌നാട് ദിനമായി ആചരിക്കുന്ന ദിവസത്തിലും മുഖ്യമന്ത്രി പതാക ഉയർത്തണമെന്നാണ് നിർദേശം. സംസ്ഥാനത്തുടനീളം ഈ ദിവസങ്ങളിൽ പതാക ഉയർത്തണമെന്നും തമിഴ്‌നാട്ടിലെ എല്ലാ വീടുകളിലും പതാക പ്രദർശിപ്പിക്കണമെന്നും അദ്ദേഹം ആവശ്യപ്പെട്ടു. മുഖ്യമന്ത്രി സി. ജോസഫ് വിജയ് ആയിരിക്കണം പതാക ആദ്യമായി ഉയർത്തേണ്ടതെന്നും മന്ത്രി വ്യക്തമാക്കി.
