വാഷിങ്ടൻ/ടെഹ്റാൻ∙ യുഎസ് ആക്രമണത്തിൽ ഇതുവരെ 48 ഇറാൻ നേതാക്കൾ കൊല്ലപ്പെട്ടതായി യുഎസ് പ്രസിഡന്റ് ഡൊണാൾഡ് ട്രംപ്. ‘യുഎസിനുണ്ടായ വിജയം ആർക്കും വിശ്വസിക്കാൻ കഴിയാത്തതാണ്. ഒറ്റയടിക്ക് 48 നേതാക്കളെയാണ് വധിച്ചത്. പോരാട്ടം അതിവേഗം മുന്നോട്ടു പോകുന്നു’– ഒരു യുഎസ് ചാനലിന് നൽകിയ അഭിമുഖത്തിൽ ട്രംപ് പറഞ്ഞുവച്ചു.
അതേസമയം, ഇറാനെതിരെയുള്ള ആക്രമണം നിർത്താനുദ്ധേശമില്ലെന്നും ഇനിയും കടുപ്പിക്കുമെന്നും ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു പറഞ്ഞു. ‘സൈനിക നടപടി തുടരാൻ ഞാൻ നിർദേശം നൽകിയിട്ടുണ്ട്. ടെഹ്റാന്റെ ഹൃദയത്തിൽ അതിശക്തമായി പ്രഹരിച്ചുകൊണ്ടിരിക്കുകയാണ് ഞങ്ങളുടെ സൈന്യം. വരുംദിവസങ്ങളിൽ അതിന്റെ ശക്തി കൂടും’–വീഡിയോ സന്ദേശത്തിൽ നെതന്യാഹു പറഞ്ഞു.
ഇതിനിടെ പടിഞ്ഞാറൻ ഇറാനിലെ മെഹ്റാൻ നഗരത്തിലുണ്ടായ ആക്രമണത്തിൽ 43 സൈനികർ കൊല്ലപ്പെട്ടെന്ന് ഇറാൻ മാധ്യമങ്ങൾ റിപ്പോർട്ട് ചെയ്തു. ഇസ്രയേൽ–യുഎസ് ആക്രമണത്തിലാണ് ഇവർ കൊല്ലപ്പെട്ടതെന്നും സമീപത്തെ കെട്ടിടങ്ങൾ തകർന്നെന്നും മെഹ്ർ വാർത്താ ഏജൻസി റിപ്പോർട്ട് ചെയ്തു.
