സൂറത്ത്: മൊബൈൽ ഫോൺ തറയിലെറിഞ്ഞതിനെച്ചൊല്ലിയുണ്ടായ തർക്കത്തിനൊടുവിൽ മകൾ പിതാവിനെ കൊലപ്പെടുത്തി. ഗുജറാത്തിലെ സൂറത്തിൽ 22കാരിയായ മകൾ പിതാവിനെ കുക്കറിന്റെ അടപ്പുകൊണ്ടും കത്തികൊണ്ടും ആക്രമിച്ച് കൊലപ്പെടുത്തിയെന്നാണ് ആരോപണം. സംഭവത്തിൽ കാജൽ എന്ന വിക്രം എന്ന യുവതിയെ അമ്രോലി പോലീസ് അറസ്റ്റ് ചെയ്തു.
ഒക്ടോബർ 31ന് രാത്രി 10.30ഓടെയാണ് സംഭവം നടന്നത്. സൂറത്തിലെ കോസാദ് ആവാസ് എച്ച്-5 മേഖലയിലെ വീട്ടിൽ രമേശ്സിങ് കൈലാഷ്സിങ് രജ്പുത്, ഭാര്യ മഞ്ജുബെൻ, ഇളയ മകൾ കാജൽ എന്നിവരുണ്ടായിരുന്ന സമയത്താണ് തർക്കമുണ്ടായത്. വീട്ടിലെ ജോലികളൊന്നും ചെയ്യാതെ മകൾ ഫോണിൽ നോക്കിയിരിക്കുന്നതിനെ തുടർന്നു പിതാവും മകളും തമ്മിൽ വാക്കേറ്റമുണ്ടായി.
ആദ്യം ചെറിയ വാക്കുതർക്കമായി തുടങ്ങിയ സംഭവം പിന്നീട് രൂക്ഷമാവുകയായിരുന്നു. വീട്ടുജോലികൾ ചെയ്യുന്നതുമായി ബന്ധപ്പെട്ട് രമേശ്സിങ് മകളെ ശകാരിക്കുകയും കൈയിലുണ്ടായിരുന്ന മൊബൈൽ ഫോൺ പിടിച്ചുവാങ്ങി തറയിലേക്ക് എറിയുകയും ചെയ്തു. ഇതിൽ പ്രകോപിതയായ കാജൽ കുക്കറിന്റെ അടപ്പ് എടുത്ത് പിതാവിന്റെ തലയ്ക്ക് പലതവണ അടിക്കുകയായിരുന്നുവെന്നാണ് പോലീസ് പറയുന്നത്. തുടർന്ന് അടുക്കളയിൽനിന്ന് കത്തിയെടുത്ത് വയറ്റിൽ കുത്തുകയും ചെയ്തു. ഗുരുതരമായി പരിക്കേറ്റ രമേശ്സിങ് രക്തത്തിൽ കുളിച്ച നിലയിലായി.
ആക്രമണത്തിനുശേഷവും വീട്ടിൽനിന്ന് പുറത്തേക്ക് ഓടാൻ രമേശ്സിങ് ശ്രമിച്ചു. എന്നാൽ വീടിന് പുറത്തുള്ള പ്ലാറ്റ്‌ഫോമിലേക്ക് നീങ്ങുന്നതിനിടെ അൽപദൂരം പിന്നിട്ടപ്പോൾ കുഴഞ്ഞുവീഴുകയായിരുന്നു. ആക്രമണത്തിൽ ഗുരുതരമായി പരിക്കേറ്റ അദ്ദേഹം പിന്നീട് മരിച്ചു.
സംഭവത്തെത്തുടർന്ന് കുടുംബാംഗങ്ങൾ 108 ആംബുലൻസ് സേവനത്തെ വിവരമറിയിച്ചു. ആരോഗ്യപ്രവർത്തകർ സ്ഥലത്തെത്തി രമേശ്സിങ്ങിനെ പരിശോധിച്ചെങ്കിലും അപ്പോഴേക്കും മരണം സംഭവിച്ചിരുന്നു. തുടർന്ന് ഭാര്യ മഞ്ജുബെൻ മകൾക്കെതിരെ അമ്രോലി പോലീസ് സ്റ്റേഷനിൽ കൊലപാതക പരാതി നൽകി. പരാതിയുടെ അടിസ്ഥാനത്തിൽ പോലീസ് കാജലിനെ അറസ്റ്റ് ചെയ്യുകയും കൊലപാതകത്തിന് കേസെടുക്കുകയും ചെയ്തു. നിലവിൽ യുവതി ജുഡീഷ്യൽ കസ്റ്റഡിയിലാണ്.
സംഭവത്തെക്കുറിച്ച് സൂറത്ത് പോലീസ് എസിപി പാർഥ് ചോവാതിയ നൽകിയ വിശദീകരണത്തിൽ, ഒക്ടോബർ 31ന് അമ്രോലി പോലീസ് സ്റ്റേഷൻ പരിധിയിലെ കോസാദ് ആവാസ് എച്ച്-5 മേഖലയിലാണ് കൊലപാതകം നടന്നതെന്ന് വ്യക്തമാക്കി. വീട്ടുജോലികളുമായി ബന്ധപ്പെട്ട് പിതാവ് മകളെ ശകാരിച്ചതാണ് തർക്കത്തിന് തുടക്കമിട്ടതെന്ന് അദ്ദേഹം പറഞ്ഞു.
തർക്കത്തിനിടെ പ്രകോപിതയായ കാജൽ ആദ്യം നോൺസ്റ്റിക് പാൻ ഉപയോഗിച്ച് പിതാവിനെ ആക്രമിക്കുകയും പിന്നീട് അടുക്കളയിലെ കത്തിയുപയോഗിച്ച് കുത്തുകയുമായിരുന്നു എന്നാണ് എസിപി അറിയിച്ചത്. ഗുരുതരാവസ്ഥയിൽ ആശുപത്രിയിലെത്തിച്ച രമേശ്സിങ്ങിനെ പരിശോധിച്ച ഡോക്ടർമാർ മരണം സ്ഥിരീകരിച്ചു. സംഭവത്തിൽ പ്രതിയായ മകളെ അറസ്റ്റ് ചെയ്തതായും അവർ ജുഡീഷ്യൽ കസ്റ്റഡിയിലാണെന്നും പോലീസ് വ്യക്തമാക്കി.
കൊലപാതകത്തിലേക്ക് നയിച്ച സാഹചര്യങ്ങളും വീട്ടിനുള്ളിൽ നടന്ന സംഭവങ്ങളുടെ കൃത്യമായ ക്രമവും കണ്ടെത്താൻ അന്വേഷണം തുടരുകയാണ്. കുടുംബത്തിനുള്ളിലെ തർക്കം എങ്ങനെയാണ് മാരകമായ ആക്രമണത്തിലേക്ക് നീങ്ങിയതെന്ന് പോലീസ് പരിശോധിച്ചുവരികയാണ്.
