സൂറത്ത്: 10,000 രൂപയുടെ ശമ്പളക്കുടിശ്ശികയെച്ചൊല്ലിയുള്ള പകയിൽ ഒരു മുഴുവൻ ടെക്സ്റ്റൈൽ മാർക്കറ്റിനോട് പ്രതികാരം ചെയ്യാൻ ശ്രമിച്ച അക്കൗണ്ടന്റ് ഒടുവിൽ അറസ്റ്റിൽ. വെറും 150 രൂപയുടെ പെട്രോളും രണ്ട് തീപ്പെട്ടിക്കൊള്ളികളും ഉപയോഗിച്ചാണ് ഇയാൾ തീകൊളുത്തിയതെന്നാണ് ഗുജറാത്തിലെ സൂറത്ത് പോലീസ് പറയുന്നത്. അപകടമെന്ന് ആദ്യം കരുതിയ തീപിടിത്തം പിന്നീട് വൻ കുറ്റകൃത്യമാണെന്ന് അന്വേഷണത്തിൽ കണ്ടെത്തുകയായിരുന്നു. സംഭവത്തിൽ വിനോദ് പണ്ഡിറ്റ് സാവ്ലെ എന്നയാളെ ക്രൈം ബ്രാഞ്ച് അറസ്റ്റ് ചെയ്തു.
സെപ്റ്റംബർ 8-9 രാത്രിയിലായിരുന്നു ഷ്യാം സാംഗിനി ടെക്സ്റ്റൈൽ മാർക്കറ്റിൽ തീപിടിത്തമുണ്ടായത്. ഒരു കടയുടെ പുറത്തുവച്ചിരുന്ന തുണിപ്പാർസലുകൾക്ക് മുഖംമൂടി ധരിച്ച ഒരാൾ തീകൊളുത്തുന്നതിന്റെ സിസിടിവി ദൃശ്യങ്ങളാണ് കേസിൽ നിർണായകമായത്. തീ അതിവേഗം പടർന്ന് കുറഞ്ഞത് 14 കടകളെ ബാധിച്ചു. ഏകദേശം 24 കോടി രൂപ വിലമതിക്കുന്ന തുണിത്തരങ്ങൾ കത്തിനശിച്ചതായി പോലീസ് അറിയിച്ചു.
അഡീഷണൽ പോലീസ് കമ്മീഷണർ (ക്രൈം) കരണരാജ് വാഘേലയുടെ വിശദീകരണമനുസരിച്ച്, സാവ്ലെ 2026 ഏപ്രിൽ മുതൽ ഏകദേശം മൂന്ന് മാസത്തോളം മാർക്കറ്റിലെ 639-ാം നമ്പർ കടയിൽ അക്കൗണ്ടന്റായി ജോലി ചെയ്തിരുന്നു. അക്കൗണ്ട്സ് ജോലി ശരിയായി കൈകാര്യം ചെയ്യാൻ കഴിയാതിരുന്നതിനെ തുടർന്ന് ജൂണിൽ ഇയാൾ ജോലി ഉപേക്ഷിച്ചു.
മുൻ തൊഴിലുടമ തനിക്ക് 10,000 രൂപ ശമ്പളം നൽകാനുണ്ടെന്നായിരുന്നു സാവ്ലെയുടെ ആരോപണം. ഇതിന്റെ പേരിൽ കടയുടമയെ ഒരു ‘പാഠം പഠിപ്പിക്കണം’ എന്ന ഉദ്ദേശത്തോടെയാണ് തീകൊളുത്തിയതെന്നാണ് പോലീസ് പറയുന്നത്. ഇതിനായി അടുത്തുള്ള ഒരു ഗ്രാമത്തിലെ പെട്രോൾ പമ്പിൽ നിന്ന് ഏകദേശം 150 രൂപയുടെ പെട്രോൾ ഇയാൾ പ്ലാസ്റ്റിക് കവറിലും ഒരു കുപ്പിയിലുമായി വാങ്ങിയതായാണ് അന്വേഷണത്തിൽ കണ്ടെത്തിയത്. സെപ്റ്റംബർ 8 രാത്രി ഒമ്പതോടെ മാർക്കറ്റിനുള്ളിൽ പ്രവേശിച്ച സാവ്ലെ അഞ്ചാം നിലയിലെ പടിക്കെട്ടിനടുത്ത് ഒളിച്ചിരുന്നുവെന്ന് പോലീസ് പറഞ്ഞു. അർധരാത്രി 12.30ഓടെ മാർക്കറ്റ് ആളൊഴിഞ്ഞപ്പോൾ ലക്ഷ്യമിട്ട കടയിലേക്ക് ഇയാൾ പോയി.
ക്രൈം ബ്രാഞ്ച് ശേഖരിച്ച സിസിടിവി ദൃശ്യങ്ങളിൽ മുഖം വെള്ളത്തുണികൊണ്ട് മറച്ചും തോളിൽ ബാഗുമായും ഇയാൾ മാർക്കറ്റിന്റെ ആറാം നിലയിലെത്തുന്നത് കാണാം. പരിസരം നിരീക്ഷിച്ച ശേഷം ബാഗിൽനിന്ന് പെട്രോൾ നിറച്ച കുപ്പി പുറത്തെടുത്ത് കടയ്ക്ക് പുറത്ത് വച്ചിരുന്ന തുണിപ്പെട്ടികളിലും പാർസലുകളിലും ഒഴിച്ചു.
തുടർന്ന് തീപ്പെട്ടിക്കൊള്ളി ഉപയോഗിച്ച് തീകൊളുത്താൻ ശ്രമിച്ചെങ്കിലും ആദ്യ ശ്രമം പരാജയപ്പെട്ടു. രണ്ടാമത്തെ ശ്രമത്തിലാണ് തുണികൾക്ക് തീപിടിച്ചത്. തീ ആളിപ്പടരുന്നത് കണ്ടതോടെ ഇയാൾ ഓടി രക്ഷപ്പെട്ടു. എന്നാൽ പദ്ധതി വിജയിച്ചോ എന്ന് പരിശോധിക്കാൻ പിന്നീട് തിരിഞ്ഞുനോക്കുന്നതും സിസിടിവി ദൃശ്യങ്ങളിൽ പതിഞ്ഞിട്ടുണ്ട്.
വലിയ തോതിൽ തുണികളും പാക്കിങ് സാമഗ്രികളും ഉണ്ടായിരുന്നതിനാൽ തീ വളരെ വേഗത്തിൽ പടർന്നു. നിരവധി കടകളിലേക്ക് തീ പടർന്നതോടെ അഗ്നിരക്ഷാസേന മണിക്കൂറുകളെടുത്താണ് തീയണച്ചതെന്ന് പോലീസ് അറിയിച്ചു. തീപിടിത്തത്തെ തുടർന്ന് സരോലി പൊലീസ് അജ്ഞാതനായ ഒരാൾക്കെതിരെ കേസ് രജിസ്റ്റർ ചെയ്തിരുന്നു. തുടർന്ന് സൂറത്ത് പോലീസിന്റെ ‘വിശ്വാസ് പ്രോജക്ട് ഫേസ്-2’യുടെ ഭാഗമായി സ്ഥാപിച്ചിരുന്ന നിരവധി സുരക്ഷാ ക്യാമറകളിലെ ദൃശ്യങ്ങൾ ക്രൈം ബ്രാഞ്ച് പരിശോധിച്ചു. മാർക്കറ്റിൽ ഇയാൾ പ്രവേശിച്ച സമയം മുതൽ പുറത്തേക്ക് രക്ഷപ്പെട്ടതുവരെയുള്ള യാത്രാ വിവരങ്ങൾ വിവിധ ക്യാമറകളിലെ ദൃശ്യങ്ങൾ കൂട്ടിച്ചേർത്ത് പൊലീസ് പുനർനിർമിച്ചു.
ഇതോടെയാണ് ദിൻഡോളിയിലെ ബിലിപത്ര റെസിഡൻസിയിലെ താമസക്കാരനായ സാവ്ലെയിലേക്ക് അന്വേഷണം എത്തിയത്. സംഭവം സമൂഹമാധ്യമങ്ങളിൽ വ്യാപകമായി പ്രചരിച്ചതും എഫ്ഐആർ രജിസ്റ്റർ ചെയ്തതും അറിഞ്ഞതോടെ സാവ്ലെ മൊബൈൽ ഫോൺ സ്വിച്ച് ഓഫ് ചെയ്ത് ഭാര്യയെയും കുട്ടിയെയും കൂട്ടി സൂറത്ത് വിട്ടതായാണ് പൊലീസ് പറയുന്നത്. ആദ്യം രാജസ്ഥാനിലെ ഖാട്ടു ശ്യാം ക്ഷേത്രത്തിലെത്തിയ ഇയാൾ പിന്നീട് അയോധ്യയിലേക്ക് പോയി.
സൂറത്തിലേക്ക് തിരിച്ചെത്തിയതിന് പിന്നാലെ ദിൻഡോളിയിലെ ഫ്ലവർ ഗാർഡന് സമീപത്തുവച്ചാണ് ക്രൈം ബ്രാഞ്ച് സംഘം സാവ്ലെയെ അറസ്റ്റ് ചെയ്തത്. അനധികൃതമായി ഇളവായി പെട്രോൾ നൽകിയതെങ്ങനെയെന്നും പെട്രോൾ പമ്പ് നിയമങ്ങൾ പാലിച്ചിരുന്നോയെന്നും പോലീസ് പരിശോധിക്കുന്നുണ്ട്. പമ്പിന്റെ ഭാഗത്ത് വീഴ്ച കണ്ടെത്തിയാൽ നടപടിയുണ്ടാകുമെന്ന് ഉദ്യോഗസ്ഥർ വ്യക്തമാക്കി.
സാവ്ലെയെ വിശദമായി ചോദ്യം ചെയ്തുവരികയാണ്. തീകൊളുത്താനുള്ള പദ്ധതി ഇയാൾ ഒറ്റയ്ക്കാണോ ആസൂത്രണം ചെയ്തതെന്നും മറ്റാരുടെയെങ്കിലും സഹായം ലഭിച്ചിരുന്നോയെന്നും ക്രൈം ബ്രാഞ്ച് അന്വേഷിക്കുന്നുണ്ട്.
