പൂനൈ: മഹാരാഷ്ട്രയിലെ പുണെയിൽ ക്ഷേത്രത്തിനുള്ളിൽ പ്രായപൂർത്തിയാകാത്ത പെൺകുട്ടിയെ ലൈംഗികമായി ഉപദ്രവിക്കാൻ ശ്രമിച്ച യുവാവ് അറസ്റ്റിൽ. കരാർ ജീവനക്കാരനായ വിശാൽ സിങ്ങിനെയാണ് പോലീസ് അറസ്റ്റ് ചെയ്തത്. പിംപ്രി-ചിഞ്ച്വാഡ് നഗരത്തിലെ നിഗ്ഡി പോലീസ് സ്റ്റേഷൻ പരിധിയിലാണ് സംഭവം. അതിക്രമശ്രമത്തിന്റെ സിസിടിവി ദൃശ്യങ്ങൾ സാമൂഹിക മാധ്യമങ്ങളിൽ പ്രചരിച്ചതോടെ സംഭവം വലിയ പ്രതിഷേധത്തിന് ഇടയാക്കി.
ഞായറാഴ്ച മാതാപിതാക്കളോടൊപ്പം ക്ഷേത്രദർശനത്തിനെത്തിയപ്പോഴാണ് പെൺകുട്ടിക്കുനേരെ അതിക്രമശ്രമമുണ്ടായത്. ക്ഷേത്രത്തിലെ സിസിടിവി ദൃശ്യങ്ങളാണ് പ്രതിയെ തിരിച്ചറിയാനും പിടികൂടാനും പോലീസിനെ സഹായിച്ചത്. വിവരമറിഞ്ഞയുടൻ കേസെടുത്ത് അന്വേഷണം ആരംഭിച്ച പോലീസ്, തിങ്കളാഴ്ച പ്രതിയെ അറസ്റ്റ് ചെയ്തതായി സീനിയർ ഇൻസ്പെക്ടർ മഹേഷ് ബൻസോഡെ വ്യക്തമാക്കി.
പെൺകുട്ടി പ്രാർത്ഥന കഴിഞ്ഞ് മടങ്ങാൻ ഒരുങ്ങുന്നതിനിടെ പ്രതി ക്ഷേത്രത്തിനുള്ളിലേക്ക് പ്രവേശിക്കുകയായിരുന്നു. നിർമ്മാണത്തൊഴിലാളികൾ സാധാരണ ധരിക്കുന്ന ഓറഞ്ച് ജാക്കറ്റായിരുന്നു ഇയാളുടെ വേഷം. ക്ഷേത്രത്തിനുള്ളിൽ പെൺകുട്ടി ഒറ്റയ്ക്കാണെന്ന് കണ്ടതോടെ ഇയാൾ കൈയിൽ പിടിച്ച് ലൈംഗികമായി ഉപദ്രവിക്കാൻ ശ്രമിച്ചെന്നാണ് റിപ്പോർട്ട്. എന്നാൽ പെൺകുട്ടി ഉടൻതന്നെ ഇയാളെ തള്ളിമാറ്റി. പിന്നാലെ പ്രതി ക്ഷേത്രത്തിനുള്ളിൽനിന്ന് പുറത്തേക്ക് പോകുന്നതും സിസിടിവി ദൃശ്യങ്ങളിൽ കാണാം.
ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിച്ചതോടെ സംഭവത്തിൽ പ്രതിഷേധം ശക്തമായി. കേസിൽ പോലീസ് തുടർനടപടികൾ സ്വീകരിച്ചുവരികയാണ്.
