തിരുവനന്തപുരം: എൻഎസ്എസുമായുള്ള തർക്കം നിലനിൽക്കുന്നതിനാൽ മുൻ മന്ത്രി കെ.ബി. ഗണേഷ് കുമാർ പങ്കെടുക്കുന്ന പരിപാടിക്ക് വേദി നിഷേധിച്ച് എൻഎസ്എസ്. ഇതോടെ തിരുവനന്തപുരം മന്നം ക്ലബ്ബിൽ നടത്താനിരുന്ന പരിപാടി പ്രസ് ക്ലബ്ബിലേക്ക് മാറ്റി.
മന്നം റിസർച്ച് ഫൗണ്ടേഷൻ തയ്യാറാക്കിയ ‘ദേവതാരുവിലെ ഇത്തൽകണികൾ’ എന്ന പുസ്തകത്തിന്റെ പ്രകാശനച്ചടങ്ങാണ് മന്നം ക്ലബ്ബിൽ നടത്താൻ നേരത്തെ തീരുമാനിച്ചിരുന്നത്. നായർ സംരക്ഷണ സമിതിയായിരുന്നു സംഘാടകർ. പരിപാടി കെ.ബി. ഗണേഷ് കുമാർ ഉദ്ഘാടനം ചെയ്യാനിരിക്കുകയായിരുന്നു.
എന്നാൽ ഗണേഷ് കുമാർ പങ്കെടുക്കുന്ന പരിപാടിക്ക് മന്നം ക്ലബ്ബിൽ വേദി അനുവദിക്കാനാകില്ലെന്ന് എൻഎസ്എസ് നേതൃത്വം സംഘാടകരെ അറിയിച്ചതായാണ് വിവരം. ഗണേഷ് കുമാർ എത്തിയാൽ ആ പരിപാടി തടയുമെന്നും എൻഎസ്എസ് നേതാക്കൾ മുന്നറിയിപ്പ് നൽകിയതോടെ വേദി അടിയന്തരമായി തിരുവനന്തപുരം പ്രസ് ക്ലബ്ബിലേക്ക് മാറ്റുകയായിരുന്നു.
അതേസമയം ഗണേഷ് കുമാറും എൻഎസ്എസ് നേതൃത്വവും തമ്മിലുള്ള തർക്കം രൂക്ഷമായ സാഹചര്യത്തിലാണ് പുതിയ സംഭവവികാസം. നേരത്തെ പത്തനാപുരം താലൂക്ക് യൂണിയൻ പിരിച്ചുവിടുകയും ഡയറക്ടർ ബോർഡ് അംഗമായിരുന്ന ഗണേഷ് കുമാറിന്റെ അംഗത്വം പുതുക്കാതിരിക്കുകയും ചെയ്തിരുന്നു. കൂടാതെ എൻഎസ്എസ് ജനറൽ സെക്രട്ടറി ജി. സുകുമാരൻ നായർക്കെതിരെ ഗണേഷ് കുമാർ പരസ്യമായി വിമർശനങ്ങളും ഉന്നയിച്ചിരുന്നു.
