അരുണാചലിൽ പുതിയ പാർട്ടി- എ.ജെ.പി ; രൂപീകരണത്തിനു പിന്നിലെ കറുത്ത കരങ്ങൾ അമിത് ഷായുടെതെന്ന് കോൺഗ്രസ്, ‘സ്വയം പ്രഖ്യാപിത ചാണക്യനെ’ പരിഹസിച്ച് ജയറാം രമേശ്

ന്യൂഡൽഹി: അരുണാചൽ പ്രദേശിൽ രൂപീകരിച്ച പുതിയ രാഷ്ട്രീയ പാർട്ടിയെച്ചൊല്ലി വിവാദം. അരുണാചൽ ജനതാ പാർട്ടി (എ.ജെ.പി) രൂപീകരണത്തിന് പിന്നിൽ കേന്ദ്ര ആഭ്യന്തര മന്ത്രി അമിത് ഷായാണെന്ന് കോൺഗ്രസ് ആരോപിച്ചു. പാർട്ടിയുടെ രൂപീകരണം സംബന്ധിച്ച പൊതുഅറിയിപ്പ് പങ്കുവെച്ചുകൊണ്ട് കോൺഗ്രസ് നേതാവ് ജയറാം രമേശാണ് ആരോപണം ഉന്നയിച്ചത്. പശ്ചിമ ബംഗാളിൽ തൃണമൂൽ കോൺഗ്രസ് വിട്ടെത്തിയവർക്കായി നാഷണലിസ്റ്റ് സിറ്റിസൺസ് പാർട്ടി ഓഫ് ഇന്ത്യയെ (എൻ.സി.പി.ഐ) പുനരുജ്ജീവിപ്പിച്ചതിന് സമാനമായ നീക്കമാണിതെന്നും അദ്ദേഹം പറഞ്ഞു. അമിത് ഷായെ ‘സ്വയം പ്രഖ്യാപിത ചാണക്യൻ’ എന്നും ജയറാം രമേശ് പരിഹസിച്ചു.

2024-25 സാമ്പത്തിക വർഷത്തിൽ രാജ്യത്തെ 734 രജിസ്റ്റർ ചെയ്തെങ്കിലും അംഗീകാരമില്ലാത്ത രാഷ്ട്രീയ പാർട്ടികൾക്ക് 1,100 കോടി രൂപയിലധികം വരുമാനമുണ്ടായിരുന്നുവെന്നും ജയറാം രമേശ് എക്‌സിലെ കുറിപ്പിൽ ചൂണ്ടിക്കാട്ടി. ഇതിൽ പകുതിയോളം തുക ഗുജറാത്തിലെ 29 പാർട്ടികൾക്കാണ് ലഭിച്ചത്. പുതിയ രാഷ്ട്രീയ പാർട്ടികളുടെ രൂപീകരണവും അവയുടെ സാമ്പത്തിക ഇടപാടുകളും പരാമർശിച്ചായിരുന്നു അദ്ദേഹത്തിന്റെ വിമർശനം.

അരുണാചൽ ജനതാ പാർട്ടി 2026 ഒക്ടോബർ 16-ന് രൂപീകരിച്ചതായാണ് പൊതുഅറിയിപ്പിൽ പറയുന്നത്. അരുണാചൽ പ്രദേശിലെ പാപും പാരെ ജില്ലയിൽ ഇറ്റാനഗറിലെ ആകാശ് ദീപ്, ഡോകും കോളനിയിലെ 15-ാം നമ്പർ കെട്ടിടമാണ് പാർട്ടിയുടെ ആസ്ഥാനമായി അറിയിച്ചിരിക്കുന്നത്. ജനപ്രാതിനിധ്യ നിയമം, 1951-ലെ 29എ വകുപ്പ് പ്രകാരം തിരഞ്ഞെടുപ്പ് കമ്മിഷനിൽ പാർട്ടിയെ രജിസ്റ്റർ ചെയ്യുന്നതിനുള്ള അപേക്ഷ നൽകാനാണ് നീക്കം. നിർദിഷ്ട രജിസ്ട്രേഷനിൽ എതിർപ്പുള്ളവർക്ക് ഡിസംബർ മൂന്നിനകം രേഖാമൂലം പരാതി നൽകാമെന്നും അറിയിപ്പിലുണ്ട്. ന്യൂഡൽഹിയിലെ അശോക് റോഡിലുള്ള നിർവചൻ സദനിലെ തിരഞ്ഞെടുപ്പ് കമ്മിഷൻ ആസ്ഥാനത്താണ് പരാതികൾ സമർപ്പിക്കേണ്ടത്.

ജയറാം രമേശ് പരാമർശിച്ച നാഷണലിസ്റ്റ് സിറ്റിസൺസ് പാർട്ടി ഓഫ് ഇന്ത്യ 2022 ഒക്ടോബറിലാണ് പശ്ചിമ ബംഗാളിൽ രൂപീകരിച്ചത്. തിരഞ്ഞെടുപ്പ് കമ്മിഷനിൽ രജിസ്റ്റർ ചെയ്തിട്ടുണ്ടെങ്കിലും അംഗീകാരമില്ലാത്ത രാഷ്ട്രീയ പാർട്ടിയാണിത്. മാസങ്ങൾക്കുമുമ്പ് പാർട്ടി ബിജെപി നേതൃത്വം നൽകുന്ന എൻഡിഎ സഖ്യത്തിൽ ചേർന്നിരുന്നു. പശ്ചിമ ബംഗാൾ നിയമസഭാ തിരഞ്ഞെടുപ്പിൽ തൃണമൂൽ കോൺഗ്രസ് പരാജയപ്പെട്ടതിനു പിന്നാലെയായിരുന്നു ഈ നീക്കം.

തൃണമൂൽ കോൺഗ്രസിന്റെ 27 ലോക്‌സഭാംഗങ്ങളിൽ 20 പേർ പാർട്ടി വിട്ട് എൻ.സി.പി.ഐയിൽ ചേർന്നതായും അവർ ബിജെപി നേതൃത്വം നൽകുന്ന എൻഡിഎയ്ക്ക് പിന്തുണ പ്രഖ്യാപിച്ചതായും റിപ്പോർട്ടുകളുണ്ട്. ഈ സംഭവത്തെ പരാമർശിച്ചാണ് അരുണാചൽ ജനതാ പാർട്ടിയുടെ രൂപീകരണത്തെയും അമിത് ഷായുടെ പങ്കിനെയും ബന്ധപ്പെടുത്തി ജയറാം രമേശ് ആരോപണം ഉന്നയിച്ചത്.