കൊച്ചി: നെടുമ്പാശ്ശേരിയിൽ മൂന്ന് യുവാക്കളുടെ മരണത്തിനിടയാക്കിയ മിനികൂപ്പർ അപകടക്കേസിലെ പ്രതികളെ അങ്കമാലി മജിസ്ട്രേറ്റ് കോടതിയിൽ ഹാജരാക്കി. കോടതി പരിസരത്ത് കനത്ത സുരക്ഷയാണ് ഏർപ്പെടുത്തിയിരിക്കുന്നത്. വൻ പോലീസ് സന്നാഹവും സ്ഥലത്തുണ്ട്.
കാറോടിച്ചിരുന്ന സുഹൈൽ, വാഹനത്തിലുണ്ടായിരുന്ന നിനവ്, ജോയൽ, അമീൻ എന്നിവരാണ് കേസിലെ പ്രതികൾ. നേരത്തെ വൈദ്യപരിശോധനയ്ക്കായി എത്തിച്ചപ്പോൾ അപകടത്തിൽ മരിച്ചവരുടെ സുഹൃത്തുക്കൾ പ്രതികളെ കൈയേറ്റം ചെയ്തിരുന്നു.
കേസിൽ കൂടുതൽ തെളിവുകൾ ശേഖരിക്കേണ്ടതുണ്ടെന്നും പ്രതികളെ കസ്റ്റഡിയിലെടുത്ത് ചോദ്യം ചെയ്യേണ്ടതുണ്ടെന്നും പോലീസ് കോടതിയെ അറിയിച്ചു. അപകടസമയത്ത് മണിക്കൂറിൽ 120 കിലോമീറ്ററിലധികം വേഗത്തിലായിരുന്നു വാഹനമോടിച്ചതെന്ന് മുഖ്യപ്രതി സുഹൈൽ പറഞ്ഞതായാണ് റിപ്പോർട്ട്.
ശനിയാഴ്ച ഉച്ചമുതൽ പ്രതികൾ മൂന്ന് ബാറുകളിൽനിന്നായി മദ്യപിച്ചിരുന്നുവെന്നാണ് പോലീസിന്റെ കണ്ടെത്തൽ. ഈ ബാറുകളിൽ എത്തി തെളിവുകൾ ശേഖരിക്കേണ്ടതുണ്ടെന്നും പോലീസ് കോടതിയിൽ വ്യക്തമാക്കി. ഇതിന്റെ ഭാഗമായി പ്രതികളെ മൂന്ന് ദിവസത്തേക്ക് കസ്റ്റഡിയിൽ വേണമെന്നാണ് അന്വേഷണസംഘത്തിന്റെ ആവശ്യം. അപകടത്തിൽപ്പെട്ട വാഹനത്തിന്റെ താക്കോലും കോടതിയുടെ കൈവശമാണ്. അതും വിട്ടുകിട്ടാൻ പോലീസ് നടപടി തേടിയിട്ടുണ്ട്.
അതേസമയം, പ്രതികൾ ജാമ്യം നേടാനുള്ള നീക്കങ്ങളും ആരംഭിച്ചു. സുഹൈൽ സമർപ്പിച്ച ജാമ്യാപേക്ഷയിൽ കോടതി നാളെ വിധി പറയും.
സുഹൈലിനെതിരെ നരഹത്യയ്ക്കാണ് കേസെടുത്തിരിക്കുന്നത്. മദ്യപിച്ച് വാഹനമോടിക്കുന്നത് തടയാതിരുന്നതിന്റെ പേരിലാണ് കാറിലുണ്ടായിരുന്ന നിനവ്, അമീൻ, ജോയൽ എന്നിവർക്കെതിരെ കേസെടുത്തിരിക്കുന്നത്. മോട്ടോർ വാഹന വകുപ്പും സംഭവത്തിൽ അന്വേഷണം ശക്തമാക്കിയിട്ടുണ്ട്.
നാലുപേരെയും കോടതി റിമാൻഡ് ചെയ്തശേഷം കാക്കനാട് ബോസ്റ്റൽ സ്കൂളിലേക്ക് മാറ്റി.
