നെടുമ്പാശേരി: എയർപോട്ട് റോഡിൽ അമിത വേഗത്തിലെത്തിയ മിനിക്കൂപ്പറിടിച്ച് മൂന്നു പേരുടെ മരണത്തിനിടയാക്കിയ കേസിൽ അറസ്റ്റിലായ സുഹൈൽ സജീവിനേയും സുഹൃത്ത് നിനവിനേയും കാക്കനാട് ദുർഗുണപരിഹാര പാഠശാലയിലേക്കു മാറ്റി. ഇന്നലെ രാത്രി ആലുവ മജിസ്ട്രേട്ടിന്റെ മുന്നിൽ ഹാജരാക്കിയ സുഹൈലിനെ 14 ദിവസത്തേക്ക് റിമാൻഡ് ചെയ്തതിനെത്തുടർന്നാണ് ജയിലിലെ ദുർഗുണപരിഹാര പാഠശാലയിലേക്കു മാറ്റിയത്.
കേസിൽ പ്രതികളായ ഇരുവർക്കും 19 വയസാണ് പ്രായമെന്നും ജയിൽ ചട്ടമനുസരിച്ചാണ് ദുർഗുണപരിഹാര പാഠശാലയിലേക്കു മാറ്റിയതെന്നും നെടുമ്പാശേരി പോലീസ് പറഞ്ഞു. സർക്കാർ നിയമവും പ്രായവും പരിഗണിച്ചാണു ജയിലുള്ള ദുർഗുണ പരിഹാര പാഠശാലയിലേക്കു മാറ്റിയതെന്ന് ജയിൽ ഡിജിപി എസ്. ശ്രീജിത്ത് പറഞ്ഞു. ‘‘18 നും 21 നും ഇടയിൽ പ്രായമുള്ളവർ അറസ്റ്റിലായാൽ ജയിലിലെ സെല്ലിൽ അല്ല ദുർഗുണ പരിഹാര പാഠശാലയിലാണ് പ്രവേശിപ്പിക്കുന്നത്’’ – ശ്രീജിത്ത് പറഞ്ഞു.
കാക്കനാട് ജയിലിനകത്താണ് ദുർഗുണപരിഹാര പാഠശാലയുള്ളത്. അപകടം നടക്കുമ്പോൾ അമിതവേഗത്തിലാണ് താൻ കാറോടിച്ചിരുന്നതെന്നു സുഹൈൽ സജീവ് (19) പറഞ്ഞു. വാഹനമോടിക്കുമ്പോൾ മദ്യലഹരിയിലായിരുന്നുവെന്നും എയർപോർട്ട് റോഡിലൂടെ 120 കിലോമീറ്റർ വേഗത്തിലാണ് വാഹനമോടിച്ചതെന്നും പ്രതി പോലീസിനോട് സമ്മതിച്ചു. കൂടാതെ അപകടസമയത്ത് കാറിലുണ്ടായിരുന്ന സുഹൃത്തുക്കളെയും അറസ്റ്റ് ചെയ്തു.
അപകടത്തിൽ കർണാടക സുള്ള്യ കനകമജലു സുണ്ണമൂല പെൽത്തടുക്ക പി.എ.ഇബ്രാഹിമിന്റെ മകൻ മുഹമ്മദ് ഇയാസ് (22), വയനാട് കൽപ്പറ്റ മടക്കിമല സന്തോഷ്ഭവനിൽ സന്തോഷിന്റെ മകൾ കെ.വി.ദേവിക (21), പാലക്കാട് മണ്ണാർക്കാട് കരിമ്പ ഇടക്കുറിശ്ശി നീലാറ്റ മുള്ളൻകുഴിയിൽ പ്രദീപിന്റെ മകൾ എം.പി.ഗോപിക (22) എന്നിവരാണു മരിച്ചത്. വിമാനത്താവള റോഡിൽ അത്താണി എയർപോർട്ട് സിഗ്നൽ കവലയ്ക്കു സമീപം ഇന്നലെ പുലർച്ചെ 2 മണിയോടെയായിരുന്നു അപകടം.
