കോട്ടയം: പാലാ നഗരസഭയുടെ പുതിയ ചെയർപേഴ്സണായി മായ രാഹുലിനെ തെരഞ്ഞെടുത്തു. എൽഡിഎഫിനൊപ്പം കോൺഗ്രസ് വിമതരും പിന്തുണച്ചതോടെയാണ് മായ രാഹുൽ വിജയിച്ചത്. തെരഞ്ഞെടുപ്പിൽ പങ്കെടുത്ത 26 കൗൺസിലർമാരിൽ മായ രാഹുലിന് 16 വോട്ട് ലഭിച്ചു. യുഡിഎഫ് സ്ഥാനാർഥി റിയ ചീരാംകുഴിക്ക് 10 വോട്ടാണ് ലഭിച്ചത്.
പാലാ മുനിസിപ്പൽ കൗൺസിലിൽ രണ്ടാം ടേമിലും വിജയിച്ച മായ രാഹുൽ 19-ാം വാർഡിനെയാണ് പ്രതിനിധീകരിക്കുന്നത്.
മുൻ ചെയർപേഴ്സൺ ദിയ ബിനു പുളിക്കക്കണ്ടം എൽഡിഎഫ് കൊണ്ടുവന്ന അവിശ്വാസ പ്രമേയത്തിലൂടെയാണ് സ്ഥാനമൊഴിഞ്ഞത്. രാജ്യത്തെ ഏറ്റവും പ്രായം കുറഞ്ഞ നഗരസഭാ ചെയർപേഴ്സൺ എന്ന നിലയിൽ ശ്രദ്ധ നേടിയ ദിയ ബിനു പുളിക്കക്കണ്ടത്തിന്റെ ആറുമാസത്തെ ഭരണത്തിനൊടുവിലാണ് അവിശ്വാസ പ്രമേയം പാസായത്.
കോൺഗ്രസിലെ നാല് കൗൺസിലർമാരുടെയും സ്വതന്ത്രയായ നഗരസഭാ ഉപാധ്യക്ഷയുടെയും പിന്തുണയോടെയാണ് എൽഡിഎഫിന്റെ അവിശ്വാസ പ്രമേയം പാസായത്. പാർട്ടി വിപ്പ് ലംഘിച്ച് നാല് കോൺഗ്രസ് കൗൺസിലർമാർ അവിശ്വാസ പ്രമേയത്തെ അനുകൂലിച്ച് വോട്ട് ചെയ്തിരുന്നു.
ദിയ ബിനു പുളിക്കക്കണ്ടം സ്ഥാനമൊഴിഞ്ഞതിനെ തുടർന്നാണ് പുതിയ ചെയർപേഴ്സണെ തെരഞ്ഞെടുക്കുന്നതിനുള്ള നടപടികൾ നടന്നത്. ഇതിലാണ് എൽഡിഎഫ് പിന്തുണയോടെ മായ രാഹുൽ വിജയിച്ചത്.
