തൃശ്ശൂർ: പിറന്നാൾ ആശംസകൾ നേർന്ന മലയാളി ആരാധകന് നന്ദിയറിയിച്ച് ഫുട്ബോൾ ഇതിഹാസം Lionel Messi. കൊടുങ്ങല്ലൂർ സ്വദേശി യാദിൽ എം. ഇഖ്ബാൽ ഇൻസ്റ്റഗ്രാമിൽ പങ്കുവെച്ച വീഡിയോയ്ക്ക് താഴെയാണ് മെസ്സി നേരിട്ട് കമന്റ് രേഖപ്പെടുത്തിയത്.
അർജന്റീനയുടെ ജഴ്‌സിയണിഞ്ഞ് പിറന്നാൾ ആശംസകൾ അറിയിച്ച വീഡിയോയിലാണ് യാദിൽ, “കേരളത്തിൽനിന്ന് ഇന്ത്യൻ ജനതയുടെ സ്നേഹം അറിയിക്കുന്നു. ഒരിക്കൽ ലിയോ എന്റെ പരിശ്രമങ്ങൾ കാണുകയും എന്നെ തിരിച്ചറിയുകയും ചെയ്യുമെന്ന് പ്രതീക്ഷിക്കുന്നു” എന്ന് പറഞ്ഞത്.
കൊടുങ്ങല്ലൂരിൽ യാദിൽ വരച്ച മെസ്സിയുടെ ഭീമൻ മ്യൂറൽ ചിത്രം, ലോകകപ്പ് വിജയത്തിന് പിന്നാലെ നിർമിച്ച പ്രതിമ, തന്റെ ആഡംബര വാഹനത്തിൽ പതിപ്പിച്ച മെസ്സിയുടെ ചിത്രം എന്നിവ ഉൾപ്പെടുത്തിയാണ് വീഡിയോ ഒരുക്കിയത്.
വീഡിയോ ശ്രദ്ധയിൽപ്പെട്ടതോടെ മെസ്സി സ്പാനിഷ് ഭാഷയിൽ “Gracias Yadil!” (നന്ദി യാദിൽ) എന്ന് കമന്റ് ചെയ്തു. ലോക ഫുട്ബോളിലെ ഏറ്റവും വലിയ താരങ്ങളിൽ ഒരാളായ മെസ്സിയുടെ ഈ പ്രതികരണം യാദിലിനും ആരാധകർക്കും വലിയ സന്തോഷമായി.
മെസ്സിയുടെ കമന്റിന് ഇതിനോടകം ലക്ഷക്കണക്കിന് ലൈക്കുകളാണ് ലഭിച്ചത്. കമന്റ് കണ്ട നിരവധി പേർ യാദിലിന്റെ സോഷ്യൽ മീഡിയ അക്കൗണ്ടുകളിലേക്കും എത്തുന്നുണ്ട്. ഒരു മലയാളി ആരാധകന്റെ സ്നേഹത്തിനും സമർപ്പണത്തിനും ലോക ഫുട്ബോളിന്റെ സൂപ്പർതാരം നൽകിയ അംഗീകാരമായാണ് സംഭവം സാമൂഹിക മാധ്യമങ്ങളിൽ ചർച്ചയാകുന്നത്.
