തിരുവനന്തപുരം: സർക്കാരിനെതിരെ രൂക്ഷവിമർശനവുമായി പ്രതിപക്ഷ നേതാവ് പിണറായി വിജയൻ. മന്ത്രിസഭയ്ക്ക് കൂട്ടുത്തരവാദിത്തം നഷ്ടമായെന്നും തിരുത്തേണ്ട കാര്യങ്ങൾ തിരുത്താൻ മുഖ്യമന്ത്രി തയ്യാറാകുന്നില്ലെന്നും അദ്ദേഹം കുറ്റപ്പെടുത്തി. സ്വന്തം പാർട്ടിയെപ്പോലും മുഖ്യമന്ത്രി വിശ്വാസത്തിലെടുക്കുന്നില്ല. കെപിസിസി പ്രസിഡന്റായ മന്ത്രിയോടുപോലും ചർച്ച നടത്താത്ത സാഹചര്യമാണുള്ളതെന്നും പിണറായി ആരോപിച്ചു.
സർക്കാർ അധികാരത്തിലെത്തി ആറുമാസം പിന്നിടുമ്പോഴുള്ള പൊതുഅഭിപ്രായം ഇന്നത്തെ മാധ്യമങ്ങൾ പരിശോധിച്ചാൽ വ്യക്തമാകുമെന്ന് അദ്ദേഹം പറഞ്ഞു. ഇത്തരമൊരു സാഹചര്യം ഒരു മന്ത്രിസഭയ്ക്കും അഭിലഷണീയമല്ല. കെപിസിസി പ്രസിഡന്റായ മന്ത്രിക്ക് പോലും തന്റെ അഭിപ്രായം പരസ്യമായി രേഖപ്പെടുത്തേണ്ടിവന്നു. മാന്യമായ ഭാഷയിലാണ് അദ്ദേഹം ഇക്കാര്യം പൊതുസമൂഹത്തിൽ അവതരിപ്പിച്ചതെങ്കിലും മന്ത്രിസഭയിൽ വ്യക്തതയോടെയും ശക്തമായും നിലപാട് അറിയിച്ചിട്ടുണ്ടെന്നും പിണറായി പറഞ്ഞു.
സ്വന്തം പാർട്ടിയെയും മുന്നണിയെയും വിശ്വാസത്തിലെടുത്ത് മുന്നോട്ടുപോകാൻ കഴിയാത്ത മുഖ്യമന്ത്രി എൽഡിഎഫിനെ കുറ്റപ്പെടുത്തുകയാണ്. ‘ടീം യുഡിഎഫ് ഒരു ടീമല്ലാതായി മാറി. വിഘടിത ടീമായി മാറിയിരിക്കുകയാണ്’ എന്നും അദ്ദേഹം പരിഹസിച്ചു. മുഖ്യമന്ത്രിയുടെ ഏകാധിപത്യ മനോഭാവത്തിനെതിരേ സ്വന്തം പാർട്ടിയിൽനിന്നും മുന്നണിയിൽനിന്നും ഉയരുന്ന വിമർശനമാണിതെന്നും പിണറായി കൂട്ടിച്ചേർത്തു.
യുഡിഎഫ് നൽകിയ വാഗ്ദാനങ്ങളിൽനിന്ന് യു-ടേൺ സംഭവിച്ചിരിക്കുകയാണ്. പൊള്ളയായ വാഗ്ദാനങ്ങളാണ് മുന്നോട്ടുവച്ചത്. ആറുമാസംകൊണ്ട് മന്ത്രിസഭയുടെ ദിശ വ്യക്തമാക്കിയെന്നും അദ്ദേഹം വിമർശിച്ചു. കുത്തകകൾക്ക് ദാസ്യം ചെയ്യുന്നതിൽ മികച്ച പ്രകടനം കാഴ്ചവയ്ക്കുന്ന സർക്കാരായി ഇത് മാറി. ബിജെപിക്ക് സർക്കാരിനോട് വലിയ മതിപ്പും പിന്തുണയുമാണുള്ളത്. തങ്ങളുടെ സ്വന്തം സർക്കാരെന്ന നിലയിലാണ് ബിജെപി സർക്കാരിനെ കാണുന്നതെന്നും പിണറായി ആരോപിച്ചു. സംഘപരിവാർ പ്രീണനവും പൊലീസ് രാജുമാണ് സർക്കാരിന്റെ മുഖമുദ്രയെന്നും അദ്ദേഹം പറഞ്ഞു.