പനങ്ങാട്: റോഡിലേക്ക് മറിഞ്ഞു വീണ വൈദ്യുതി പോസ്റ്റിലിടിച്ച് ബൈക്ക് യാത്രക്കാരനായ പള്ളി ഇമാം മരിച്ചു. കുമ്പളം നോർത്ത് പള്ളിയിലെ ഇമാം അബ്ദുൽ ഗഫൂർ (54) ആണ് മരിച്ചത്. ശനിയാഴ്ച്ച പുലർച്ചെ 4.30 ഓടെ കുമ്പളം പി.ഡബ്ല്യു.ഡി റോഡിൽ പ്രണവം ബസ് സ്റ്റോപ്പിനടുത്തായിരുന്നു അപകടം.
രാവിലെ പള്ളിയിലേക്കെത്തിയ ഇമാമിൻറെ ബൈക്ക് റോഡിന് കുറുകെ വീണുകിടന്ന പോസ്റ്റിലിടിക്കുകയായിരുന്നു. ഗുരുതര പരുക്കേറ്റ് വഴിയിൽ വീണ് കിടന്ന ഇദ്ദേഹത്തെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ഇവിടെ അടുത്തുള്ള വീട്ടിലേയ്ക്ക് വൈദ്യുതി എത്തിക്കാനായി രണ്ടാഴ്ച മുമ്പ് സ്ഥാപിച്ച പോസ്റ്റാണ് മഴയെ തുടർന്ന് മറിഞ്ഞു വീണത്. അതേസമയം ഇതുവഴി യാത്ര ചെയ്ത ക്ഷേത്ര മേൽശാന്തിയും ഇതേ പോസ്റ്റിലിടിച്ച് വാഹനം മറിഞ്ഞ് പരുക്കേറ്റു. പുലർച്ചെ ക്ഷേത്രത്തിലേക്ക് പോയ ശാന്തി കുമ്പളം കൊട്ടാരത്തിൽ സുരേഷിൻറെ (58) വാഹനമാണ് പോസ്റ്റിലിടിച്ച് മറിഞ്ഞത്. പരുക്കേറ്റ ഇയാളെ നെട്ടൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.
