കോഴിക്കോട്: മാതാപിതാക്കളോടൊപ്പം മാഹി പള്ളിയിലെത്തിയ മൂന്നുവയസ്സുകാരിയുടെ സ്വർണവള മോഷ്ടിച്ച കേസിൽ കോട്ടയം സ്വദേശി അറസ്റ്റിൽ. വാടക ക്വാർട്ടേഴ്‌സിൽ താമസിച്ചുവരുന്ന ഷിഹാബിനെയാണ് മാഹി പോലീസ് പിടികൂടിയത്. കോഴിക്കോട് നാദാപുരം കല്ലാച്ചി സ്വദേശികളായ കുറ്റ്യേന്റവിട അഭിരാമിന്റെയും ആതിരയുടെയും മകൾ മേവ അഭിരാമിന്റെ കൈയിലെ സ്വർണവളയാണ് മോഷണം പോയത്.
ഇന്നലെ രാത്രി ഒമ്പതേമുക്കാലോടെയാണ് സംഭവം. മാതാവിന്റെ രൂപക്കൂടിന് മുന്നിൽ മെഴുകുതിരി കത്തിക്കാനായി കുടുംബത്തോടൊപ്പം പള്ളിയിലെത്തിയതായിരുന്നു കുട്ടി. ഈ സമയത്ത് പള്ളിയിൽ നല്ല തിരക്കുണ്ടായിരുന്നു. ചടങ്ങുകൾക്കുശേഷം പുറത്തേക്ക് ഇറങ്ങുന്നതിനിടെയാണ് കൈയിലെ വള ആരോ ഊരിയെടുത്തതായി കുട്ടി അമ്മയോട് പറഞ്ഞത്.
കുട്ടി മെഴുകുതിരി കത്തിക്കുന്നതിനിടെ കൂടെയുണ്ടായിരുന്ന ബന്ധു ഫോട്ടോ എടുത്തിരുന്നു. ഈ ചിത്രം പരിശോധിച്ചപ്പോഴാണ് ഒരാൾ കുട്ടിയുടെ സമീപത്ത് സംശയകരമായ രീതിയിൽ പെരുമാറുന്നതായി ശ്രദ്ധയിൽപ്പെട്ടത്. തുടർന്ന് പള്ളി ജീവനക്കാർ സിസിടിവി ദൃശ്യങ്ങൾ പരിശോധിച്ചു. ഇതോടെ ഇയാൾ കുട്ടിയുടെ കൈയിൽനിന്ന് വള ഊരിയെടുത്ത് കടന്നുകളയുന്നതായി വ്യക്തമായി.
വിവരം ലഭിച്ചതിനെത്തുടർന്ന് മാഹി പോലീസ് നടത്തിയ അന്വേഷണത്തിലാണ് പ്രതിയെ കണ്ടെത്തിയത്. മാഹി റെയിൽവേ സ്റ്റേഷനിൽനിന്നാണ് ഷിഹാബിനെ പിടികൂടിയത്.
