ബെംഗളൂരു: കർണാടകയിൽ രാഷ്ട്രീയ ചർച്ചകൾക്ക് ചൂടുപകർന്ന് കോൺഗ്രസ് എംഎൽഎമാർ ബിജെപിയിലേക്ക് ചേക്കേറുമെന്ന അവകാശവാദവുമായി ബിജെപി സംസ്ഥാന അധ്യക്ഷൻ ബി.വൈ. വിജയേന്ദ്ര. കാബിനറ്റ് മന്ത്രിമാർ ഉൾപ്പെടെ 25 കോൺഗ്രസ് എംഎൽഎമാർ ബിജെപിയിൽ ചേരാൻ തയ്യാറാണെന്നാണ് വിജയേന്ദ്രയുടെ പ്രസ്താവന. എന്നാൽ, ഈ അവകാശവാദത്തെ പരിഹസിച്ച് കർണാടക ഉപമുഖ്യമന്ത്രി ഡി.കെ. ശിവകുമാർ രംഗത്തെത്തി. എംഎൽഎമാർ ബിജെപിയിലേക്ക് വരാൻ തയ്യാറാണെങ്കിൽ ഒട്ടും വൈകാതെ അവരെ കൊണ്ടുപോകണമെന്നായിരുന്നു ശിവകുമാറിന്റെ പരിഹാസം.
സംസ്ഥാനത്ത് രാഷ്ട്രീയ സാഹചര്യം ബിജെപിക്ക് അനുകൂലമായി മാറിയെന്നും നിരവധി കോൺഗ്രസ് നേതാക്കൾ പാർട്ടി വിടാൻ സന്നദ്ധരാണെന്നും വിജയേന്ദ്ര അവകാശപ്പെട്ടു. നാളെ തിരഞ്ഞെടുപ്പ് പ്രഖ്യാപിച്ചാൽ മന്ത്രിമാർ ഉൾപ്പെടെ 25 കോൺഗ്രസ് എംഎൽഎമാർ ബിജെപിയിലെത്തുമെന്നും അദ്ദേഹം പറഞ്ഞു. അതേസമയം, കോൺഗ്രസ് എംഎൽഎമാരെ പണം നൽകി സ്വാധീനിക്കാനോ ചാക്കിട്ടുപിടിക്കാനോ ബിജെപി ശ്രമിക്കുന്നില്ലെന്നും വിജയേന്ദ്ര വ്യക്തമാക്കി.
വിജയേന്ദ്രയുടെ പ്രസ്താവനയോട് പ്രതികരിച്ച ശിവകുമാർ, എംഎൽഎമാർ വരുമെങ്കിൽ സമയം കളയാതെ ഇപ്പോൾ തന്നെ അവരെ ബിജെപിയിലേക്ക് കൊണ്ടുപോകാൻ പറയൂ എന്നായിരുന്നു പരിഹാസരൂപേണ പറഞ്ഞത്. രാജ്യസഭാ തിരഞ്ഞെടുപ്പിൽ ബിജെപി-ജെഡിഎസ് എംഎൽഎമാർ കോൺഗ്രസിന് അനുകൂലമായി ക്രോസ് വോട്ട് ചെയ്ത കാര്യവും അദ്ദേഹം ചൂണ്ടിക്കാട്ടി. വിജയേന്ദ്രയുടെ അവകാശവാദവും ശിവകുമാറിന്റെ മറുപടിയും കർണാടക രാഷ്ട്രീയത്തിൽ പുതിയ ചർച്ചകൾക്ക് വഴിവെച്ചിരിക്കുകയാണ്.
