തിരുവനന്തപുരം: ക്യാമ്പസ് രാഷ്ട്രീയത്തിന് നിയന്ത്രണം ഏർപ്പെടുത്താനുള്ള കേരള സർവകലാശാലയുടെ നീക്കം വിവാദത്തിൽ. രാഷ്ട്രീയ സമരങ്ങൾക്കും മുദ്രാവാക്യം വിളിക്കലിനും ഡിജിറ്റൽ പ്ലാറ്റ്‌ഫോമിലൂടെയുള്ള രാഷ്ട്രീയ പ്രചാരണത്തിനുമടക്കം നിയന്ത്രണം ഏർപ്പെടുത്തുന്ന കരട് മാർഗരേഖയ്‌ക്കെതിരെ ഇടത്, വലത് വിദ്യാർഥി സംഘടനകൾ രംഗത്തെത്തി.
ക്യാമ്പസിൽ രാഷ്ട്രീയ സമരങ്ങൾ നടത്തരുത്, രാഷ്ട്രീയത്തിന്റെ ഭാഗമായി ധർണയോ ഉപരോധമോ സംഘടിപ്പിക്കരുത്, രാഷ്ട്രീയ മുദ്രാവാക്യങ്ങൾ വിളിക്കരുത് തുടങ്ങിയ നിർദേശങ്ങളാണ് കരട് മാർഗരേഖയിലുള്ളത്. രാഷ്ട്രീയ പ്രവർത്തനങ്ങളുമായി ബന്ധപ്പെട്ട് ക്യാമ്പസിനുള്ളിൽ പോസ്റ്ററുകൾ, ബാനറുകൾ, കൊടികൾ എന്നിവ സ്ഥാപിക്കുന്നതിനും നിയന്ത്രണങ്ങളുണ്ടാകുമെന്നാണ് നിർദേശം.
ദേശവിരുദ്ധ പശ്ചാത്തലമുള്ളവരെ ക്ഷണിച്ച് പരിപാടികൾ സംഘടിപ്പിക്കരുതെന്നും കരടിൽ നിർദേശമുണ്ട്. ഡിജിറ്റൽ പ്ലാറ്റ്‌ഫോമുകൾ ഉപയോഗിച്ചുള്ള രാഷ്ട്രീയ പ്രചാരണത്തിനും നിയന്ത്രണം ഏർപ്പെടുത്താൻ നിർദേശമുണ്ട്.
കരട് മാർഗരേഖ പുറത്തുവന്നതോടെ വിവിധ വിദ്യാർഥി സംഘടനകൾ പ്രതിഷേധവുമായി രംഗത്തെത്തി. ജനാധിപത്യ വിരുദ്ധമാണ് നീക്കമെന്ന വിമർശനവും ഉയർന്നു. ക്യാമ്പസിലെ രാഷ്ട്രീയ പ്രവർത്തനങ്ങൾക്ക് നിയന്ത്രണം ഏർപ്പെടുത്താനുള്ള നീക്കത്തിനെതിരെ പ്രതിപക്ഷ നേതാവും രംഗത്തെത്തി.
അതേസമയം, നിർദേശങ്ങൾ അന്തിമമല്ലെന്ന് കേരള സർവകലാശാല വൈസ് ചാൻസലർ മോഹനൻ കുന്നുമ്മൽ വ്യക്തമാക്കി. ഹൈക്കോടതി നിർദേശത്തെ തുടർന്നാണ് മാർഗരേഖ തയ്യാറാക്കിയതെന്നും വിവിധ അഭിപ്രായങ്ങൾ പരിഗണിച്ച ശേഷമായിരിക്കും അന്തിമ തീരുമാനമെന്നും അദ്ദേഹം വിശദീകരിച്ചു.
