കണ്ണൂർ: കരിവെള്ളൂരില്‍ വനിതാ പോലീസ് ഉദ്യോഗസ്ഥയെ ഭര്‍ത്താവ് വെട്ടിക്കൊലപ്പെടുത്തി. ചന്തേര പോലീസ് സ്‌റ്റേഷനിലെ സിപിഒ ദിവ്യശ്രീ ആണ് കൊല്ലപ്പെട്ടത്. കരിവെള്ളൂരില്‍ വ്യാഴാഴ്ച വൈകുന്നേരം ആറിനായിരുന്നു സംഭവം.
സംഭവ ശേഷം ഒളിവിൽ പോയ ഭർത്താവ് രാജേഷിനായി പോലീസ് തെരച്ചിൽ ആരംഭിച്ചു. ദിവ്യശ്രീയുമായി രാജേഷ് ഏറെ നാളായി അകന്നു കഴിയുകയായിരുന്നു. വൈകുന്നേരം വീട്ടിലെത്തിയ രാജേഷ് ദിവ്യശ്രീയെ വെട്ടുകയായിരുന്നു. വെട്ടേറ്റ ദിവ്യശ്രീ ഓടി രക്ഷപ്പെടാൻ ശ്രമിക്കുന്നതിനിടെ പിൻതുടർന്നെത്തി വെട്ടിക്കൊലപ്പെടുത്തി.
ആക്രമണം തടയുന്നതിനിടെ ദിവ്യശ്രീയുടെ പിതാവ് വാസുവിന്റെ കഴുത്തിനും വയറിനും വെട്ടേറ്റു. ഇദ്ദേഹത്തെ ആശുപത്രിയില്‍ പ്രവേശിപ്പിച്ചു. ദിവ്യശ്രീയുടെ മൃതദേഹം പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി.
