താമരശേരി: തെങ്ങിൻ മുകളിൽനിന്ന് കുരങ്ങ് പറിച്ചെറിഞ്ഞ കരിക്ക് കൊണ്ട് കർഷകനു ഗുരുതര പരിക്ക്. താമരശേരി കട്ടിപ്പാറ സ്വദേശി രാജു ജോണിനാണ് പരിക്കേറ്റത്. വെളളിയാഴ്ച വൈകുന്നേരമായിരുന്നു സംഭവം.
പുരയിടത്തോട് ചേർന്ന തെങ്ങിൻതോപ്പിലെ തേങ്ങ പെറുക്കിക്കൂട്ടാൻ പറമ്പിൽ എത്തിയതായിരുന്നു രാജു ജോൺ. ഈ സമയം തെങ്ങിന് മുകളിലുണ്ടായിരുന്ന കുരങ്ങ് കരിക്ക് പറിച്ച് തേങ്ങ പെറുക്കുകയായിരുന്ന രാജു ജോണിനു നേരെ എറിയുകയായിരുന്നു. ഏറുകൊണ്ട് മുഖത്തും കണ്ണിനും തലയ്ക്കും പരിക്കേറ്റ രാജുവിനെ താമരശേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. അപകടത്തിൽ രാജുവിന്റെ വലതു കണ്ണിനു സാരമായ പരിക്കുപറ്റി.
ഈ മേഖലയിൽ ഏറെനാളായി കുരങ്ങിന്റെ ശല്യം ഉണ്ടെങ്കിലും ഇതാദ്യമായാണ് ഇത്തരമൊരു സംഭവം ഉണ്ടാകുന്നതെന്ന് നാട്ടുകാർ പറഞ്ഞു.
