കൊച്ചി: ദിലീപിനെ എഎംഎംഎയില്‍ തിരിച്ചെടുത്തതിനെതിരെ രൂക്ഷ വിമര്‍ശനവുമായി സംവിധായകന്‍ രാജീവ് രവി. സൂപ്പര്‍ താരങ്ങള്‍ ബഫൂണ്‍സാണ്. ദുരന്തത്തെ അതിജീവിച്ച നടിയുടെ സഹപ്രവര്‍ത്തകരില്‍ നിന്നുള്ള പ്രതികരണങ്ങള്‍ നിരാശാജനകമാണെന്നും ചെറുപ്പക്കാര്‍ പുറത്തുവന്ന് സംസാരിക്കണം എന്നാണ് ആഗ്രഹിക്കുന്നതെന്നും അദ്ദേഹം പറഞ്ഞു.
സൂപ്പര്‍ താരങ്ങളാണെങ്കിലും ചെറുപ്പക്കാരാണെങ്കിലും പൊതുവേ നായകന്‍മാര്‍ സിനിമയില്‍ മാത്രമാണെന്നും ജീവിതത്തില്‍ അവര്‍ ബഫൂണ്‍സാണെന്നും രാജീവ് രവി കുറ്റപ്പെടുത്തി. സൂപ്പര്‍ താരങ്ങള്‍ക്ക് എല്ലാവരെയും പേടിയാണെന്നും ടിവി ചാനലുകള്‍ വേണ്ടി ഷോ കളിക്കാന്‍ മാത്രമുള്ളതാണ് അവരുടെ സംഘടനയെന്നും അദ്ദേഹം പറഞ്ഞു.
സ്ത്രീകളെ കാണുന്ന രീതി എന്ത് മോശമാണെന്ന് അവരെ പരിചയപ്പെടുന്നതിലൂടെ മനസിലാവുമെന്നും രാജീവ് പറയുന്നു.മലയാള സിനിമയിലെ സംഘടനകള്‍ ഉന്നതരുടെ വ്യക്തി താല്‍പര്യങ്ങളും ബിസിനസ് താല്‍പര്യങ്ങളും മാത്രം സംരക്ഷിക്കാന്‍ സൃഷ്ടിച്ച ക്ലബ് മാത്രമാണ്. സിനികളിലൂടെ സമൂഹമധ്യത്തിലും സ്വന്തം നിലപാടുകളും വിശ്വാസങ്ങളും തുറന്ന് പറയാന്‍ മലയാള സിനിമയിലെ ചെറുപ്പക്കാര്‍ക്ക് കഴിയം. അത് കാലത്തിന്റെ ആവശ്യമാണെന്ന് രാജീവ് രവി പറഞ്ഞു.
