കണ്ണൂർ: പയ്യന്നൂർ പെരുമ്പ ഇക്കോ തണൽ പാർക്കിന് സമീപത്തെ പുഴയിൽ കാണാതായ യുവതിയുടെ മൃതദേഹം കണ്ടെത്തി. പയ്യന്നൂർ ടൗണിലെ മാളിൽ ജീവനക്കാരിയായ കാനായി മുക്കൂട് സ്വദേശി സി. ശ്രുതി (24)യുടെ മൃതദേഹമാണ് കണ്ടെത്തിയത്.
തിങ്കളാഴ്ച രാത്രിയും ചൊവ്വാഴ്ച രാവിലെയുമായി നടത്തിയ തിരച്ചിലിനൊടുവിലാണ് മൃതദേഹം കണ്ടെത്തിയത്. പയ്യന്നൂർ ഫയർ സ്റ്റേഷൻ ഓഫീസർ സി.പി. രാജേഷിന്റെ നേതൃത്വത്തിൽ സ്കൂബാ ടീമിന്റെ സഹായത്തോടെയായിരുന്നു തിരച്ചിൽ. പെരുമ്പ തണൽ ഇക്കോ പാർക്കിന് സമീപത്തെ പുഴയിൽനിന്ന് ചൊവ്വാഴ്ച രാവിലെയാണ് മൃതദേഹം കണ്ടെടുത്തത്.
കാനായി മുക്കൂടിലെ പരേതനായ ചന്ദ്രന്റെയും ജാനകിയുടെയും മകളാണ് ശ്രുതി. ശ്രീലക്ഷ്മിയാണ് സഹോദരി. സംഭവവുമായി ബന്ധപ്പെട്ട കൂടുതൽ വിവരങ്ങൾ ലഭ്യമായിട്ടില്ല.
