ആലപ്പുഴ: മുഖ്യമന്ത്രിയെ സ്വതന്ത്രമായി ഭരിക്കാൻ അനുവദിക്കണമെന്നും കഴിവില്ലാത്ത മന്ത്രിമാരുണ്ടെങ്കിൽ അവരെ മാറ്റണമെന്നും ജി. സുധാകരൻ. മുഖ്യമന്ത്രിയെ വെല്ലുവിളിക്കുന്ന ഒരു മന്ത്രിയും മന്ത്രിക്കസേരയിൽ തുടരാൻ പാടില്ലെന്നും അദ്ദേഹം പറഞ്ഞു. മുഖ്യമന്ത്രിയുടെ വിശ്വാസം നേടിയവരാണ് മന്ത്രിമാരാകുന്നത്. എന്നാൽ, അതേ മുഖ്യമന്ത്രിക്കെതിരെ പരസ്യപ്രസ്താവന നടത്തുകയാണ് ഒരു മന്ത്രി. അത്തരക്കാരനെ പുറത്താക്കണം. ഇടതും വലതും നോക്കേണ്ടിവരുന്നതുകൊണ്ടാണ് മുഖ്യമന്ത്രി അതിന് തയ്യാറാകാത്തതെന്നും സുധാകരൻ വിമർശിച്ചു.
പാർലമെന്റിൽ അംഗമായിരുന്നവർക്ക് സംസ്ഥാന സർക്കാരിൽ മന്ത്രിയാകണമെന്ന ആഗ്രഹം. ഇതൊക്കെ എവിടെയെങ്കിലും കേട്ടിട്ടുണ്ടോയെന്നും അദ്ദേഹം ചോദിച്ചു. സംസ്ഥാന മന്ത്രിസഭയിലെ അംഗത്വത്തേക്കാൾ എത്രയോ വലിയ പദവിയാണ് പാർലമെന്റ് അംഗത്വമെന്നും സുധാകരൻ പറഞ്ഞു.
കേന്ദ്രമന്ത്രി സുരേഷ് ഗോപിക്കെതിരെയും സുധാകരൻ വിമർശനം ഉന്നയിച്ചു. ആലപ്പുഴ ബീച്ചിലെ വികസനപ്രവർത്തനങ്ങൾ വിലയിരുത്താനെത്തിയ സുരേഷ് ഗോപി തന്റെ മണ്ഡലത്തിലെ പ്രദേശം സന്ദർശിച്ച വിവരം അറിയിച്ചില്ലെന്നാണ് സുധാകരന്റെ പരാതി. തന്നെ അറിയിക്കാതെ സ്ഥലം സന്ദർശിക്കാൻ സുരേഷ് ഗോപിക്ക് എങ്ങനെ ധൈര്യം വന്നുവെന്നും അദ്ദേഹം ചോദിച്ചു.