പൂച്ചാക്കൽ (ആലപ്പുഴ): ഇളയ മകന്റെ വിവാഹത്തിന് ദിവസങ്ങൾ മാത്രം ശേഷിക്കെ പിതാവിന്റെ അപ്രതീക്ഷിത വിയോഗം കുടുംബത്തെയും നാടിനെയും ദുഃഖത്തിലാഴ്ത്തി. പാണാവള്ളി പഞ്ചായത്ത് ഒന്നാം വാർഡ് കോലേഴത്ത് പൊന്നപ്പൻ ആചാരി (75) ആണ് മരിച്ചത്.
ശ്വാസതടസ്സത്തെത്തുടർന്ന് രണ്ടാഴ്ച മുൻപ് എറണാകുളം ജനറൽ ആശുപത്രിയിൽ പ്രവേശിപ്പിച്ച പൊന്നപ്പനെ വ്യാഴാഴ്ച രാവിലെ ഹൃദയാഘാതത്തെത്തുടർന്ന് വെന്റിലേറ്ററിലേക്ക് മാറ്റിയിരുന്നു.
ശനിയാഴ്ച (21) കാലടിയിലുള്ള യുവതിയുമായി ഇളയ മകൻ പ്രേംജിത്തിന്റെ വിവാഹം നടക്കാനിരിക്കുകയായിരുന്നു. ഇതിനായുള്ള ഒരുക്കങ്ങൾ വീട്ടിൽ പുരോഗമിക്കുന്നതിനിടെയാണ് വ്യാഴാഴ്ച വൈകിട്ട് ദുഃഖവാർത്തയെത്തിയത്. കല്യാണപ്പന്തലിൽ അലങ്കാരപ്പണികൾ നടക്കുമ്പോഴായിരുന്നു കുടുംബത്തെ കണ്ണീരിലാഴ്ത്തിയ വിവരം ലഭിച്ചത്.
സംസ്കാരം വെള്ളിയാഴ്ച ഉച്ചയ്ക്ക് 12ന് വീട്ടുവളപ്പിൽ നടക്കും. ഭാര്യ: ജയ പൊന്നപ്പൻ. മക്കൾ: പ്രജീഷ്, പ്രേംജിത്ത്, പ്രവീണ. മരുമക്കൾ: വിനീത, രഞ്ചുകുമാർ.