പാനൂർ: കണ്ണൂരിൽ സ്കൂളിലെ വിദ്യാർഥികൾ തമ്മിലുണ്ടായ കൂട്ടത്തല്ലിൽ എട്ടാം ക്ലാസ് വിദ്യാർഥിക്ക് തലയ്ക്ക് ഗുരുതരമായി പരിക്കേറ്റു. പാനൂർ സ്വദേശി മുഹമ്മദ് സബദിയ എന്ന വിദ്യാർഥിക്കാണ് പരിക്കേറ്റത്. കുട്ടിയെ ശസ്ത്രക്രിയയ്ക്ക് വിധേയനാക്കി, വ്യാഴാഴ്ച വൈകീട്ട് 4.10-ഓടെ സ്കൂൾ വിട്ട സമയത്ത് പാനൂർ ബസ് സ്റ്റാൻഡിന് സമീപമുള്ള മാളിന്റെയും ബൈപ്പാസ് റോഡിന്റെയും ഇടയിലുള്ള വഴിയിൽ വെച്ചായിരുന്നു എട്ടും ഒൻപതും ക്ലാസുകളിലെ വിദ്യാർഥികൾ തമ്മിൽ സംഘം ചേർന്ന് അടിപിടിയുണ്ടായത്. സംഭവത്തിൽ ഒമ്പതാം ക്ലാസിൽ പഠിക്കുന്ന മൂന്ന് വിദ്യാർഥികൾക്കെതിരെ പോലീസ് കേസെടുത്തു.
വൈകീട്ട് സ്കൂളിൽ വെച്ച് വിദ്യാർഥികൾ തമ്മിലുണ്ടായ നിസ്സാര വാക്കുതർക്കമാണ് പിന്നീട് സ്കൂളിന് പുറത്ത് വലിയ രീതിയിലുള്ള സംഘർഷത്തിലേക്ക് വഴിമാറിയത്. അടിപിടിക്കിടെ എട്ടാം ക്ലാസിലെ ചില കുട്ടികൾ സമീപത്തുള്ള വീടുകളിലേക്ക് ഓടിരക്ഷപ്പെട്ടു. എന്നാൽ, ഒൻപതാം ക്ലാസുകാരുടെ ആക്രമണത്തെ പ്രതിരോധിക്കാൻ ശ്രമിക്കുന്നതിനിടെ മുഹമ്മദ് സബദിയയുടെ തലയ്ക്ക് വലിയ കല്ലുകൊണ്ട് അടിയേൽക്കുകയായിരുന്നു.
“നിന്നെ വെറുതെ വിടില്ല” എന്ന് ഭീഷണിപ്പെടുത്തിയ ശേഷമാണ് കുട്ടിയെ മർദിച്ചതെന്ന് എഫ്ഐആറിൽ വ്യക്തമാക്കുന്നു. കല്ലുകൊണ്ട് മുഖത്ത് അടിച്ചതായും പൊലീസ് രേഖപ്പെടുത്തിയിട്ടുണ്ട്.
കുട്ടികൾ തമ്മിലുള്ള സംഘർഷം കണ്ടയുടൻ പ്രദേശവാസികളും നാട്ടുകാരും ഓടിയെത്തിയാണ് പരിക്കേറ്റ കുട്ടിയെ ആദ്യം പാനൂരിലെ സ്വകാര്യ ആശുപത്രിയിൽ പ്രവേശിപ്പിച്ചത്. പരിക്ക് അതീവ ഗുരുതരമായതിനെ തുടർന്ന് ഉടൻതന്നെ കണ്ണൂർ ബേബി മെമ്മോറിയൽ ആശുപത്രിയിലേക്ക് മാറ്റുകയും അടിയന്തര ശസ്ത്രക്രിയയ്ക്ക് വിധേയനാക്കി തീവ്രപരിചരണ വിഭാഗത്തിൽ (ICU) പ്രവേശിപ്പിക്കുകയും ചെയ്തു.
വിദ്യാർഥി സംഘടനകൾ തമ്മിൽ ചെറിയ തർക്കങ്ങൾ ഉണ്ടാകാറുണ്ടെങ്കിലും പ്രദേശത്ത് ഇത്രയും ഗൗരവമുള്ള സംഘർഷം ആദ്യമായിട്ടാണെന്ന് ദൃക്സാക്ഷികൾ പറഞ്ഞു. സ്കൂളിൽ അടിയന്തരമായി പിടിഎ മീറ്റിങ് വിളിച്ച് വിഷയത്തിന്റെ ഗൗരവം വിലയിരുത്തണമെന്ന് രക്ഷിതാക്കളും നാട്ടുകാരും ആവശ്യപ്പെട്ടിട്ടുണ്ട്.