ഹരിപ്പാട്: ഡോക്ടറാകാനുള്ള സ്വപ്നങ്ങളുമായി ഉസ്ബെക്കിസ്താനിലേക്ക് പറന്ന ഹരിപ്പാട് സ്വദേശിനി സാവര്യ ബസന്തിന്റെ ജീവൻ സഹപാഠിയുടെ ക്രൂരതയിൽ പൊലിഞ്ഞിട്ട് നാല് മാസം. കേരളത്തെ നടുക്കിയ ആ കൊലപാതകക്കേസിൽ, പ്രതിയായ മലപ്പുറം പെരിന്തൽമണ്ണ സ്വദേശി സദറുൾ അനമിന് ഉസ്ബെക്കിസ്താൻ വിചാരണക്കോടതി എട്ടരവർഷം തടവുശിക്ഷ വിധിച്ചു. നാട്ടിലേക്ക് മടങ്ങാൻ വിമാനടിക്കറ്റ് എടുത്തു കാത്തിരുന്ന 22-കാരിയെ രണ്ടുദിവസത്തോളം മുറിയിൽ പൂട്ടിയിട്ട് അതിക്രൂരമായി മർദിച്ചും ലാപ്ടോപ്പ് കൊണ്ട് തലയ്ക്കടിച്ചുമാണ് പ്രതി കൊലപ്പെടുത്തിയതെന്നാണ് റിപ്പോർട്ട്.
നാലുമാസത്തിനുള്ളിൽ വിചാരണ പൂർത്തിയാക്കി കോടതി വിധി പ്രസ്താവിക്കുമ്പോൾ, നീതിയുടെ ആദ്യപടിയിലേക്കുള്ള ആശ്വാസത്തിനൊപ്പം മകളുടെ വേർപാടിന്റെ തീരാവേദനയിലാണ് സാവര്യയുടെ കുടുംബം. മലയാളി മെഡിക്കൽ വിദ്യാർഥിനി സാവര്യ ബസന്ത് (22) ഉസ്ബെക്കിസ്താനിൽ കൊല്ലപ്പെട്ട കേസിലാണ് സഹപാഠി മലപ്പുറം പെരിന്തൽമണ്ണ എരുവത്ത് കിഴക്കേത്തൊടിയിൽ സദറുൾ അനമിന് (23) തടവുശിക്ഷ വിധിച്ചത്.
ഉസ്ബെക്കിസ്താനിലെ വിചാരണക്കോടതിയാണ് ശിക്ഷ വിധിച്ചതെന്ന് സാവര്യയുടെ അച്ഛൻ ബസന്ത് പറഞ്ഞു.