ടെൽ അവീവ്/ഗാസ: ഹമാസിന്റെ സൈനിക വിഭാഗമായ അൽ ഖസ്സാം ബ്രിഗേഡിന്റെ കമാൻഡർ സമീർ അബു യൂനിസ് ഇസ്രയേൽ വ്യോമാക്രമണത്തിൽ കൊല്ലപ്പെട്ടു. ശനിയാഴ്ച വൈകുന്നേരമായിരുന്നു ആക്രമണം. അബു യൂനിസിന്റെ മരണം അൽ ഖസ്സാം ബ്രിഗേഡ് സ്ഥിരീകരിച്ചു. 2023 ഒക്ടോബർ ഏഴിന് ഇസ്രയേലിനെതിരെ ഹമാസ് നടത്തിയ ആക്രമണം ആസൂത്രണം ചെയ്യുന്നതിലും മേൽനോട്ടം വഹിക്കുന്നതിലും നിർണായക പങ്കുവഹിച്ചയാളാണ് ഇയാൾ.
തെക്കൻ ഗാസയിലെ ഖാൻ യൂനിസിന് പടിഞ്ഞാറുള്ള അൽ മവാസിയിലായിരുന്നു ആക്രമണം. അൽ ഖസ്സാം ബ്രിഗേഡിന്റെ റഫ ബ്രിഗേഡ് കമാൻഡറായ അബു യൂനിസിനെ ലക്ഷ്യമിട്ടായിരുന്നു ഇസ്രയേൽ ആക്രമണമെന്ന് സുരക്ഷാ വൃത്തങ്ങളെ ഉദ്ധരിച്ച് എ.എഫ്.പി. റിപ്പോർട്ട് ചെയ്തു. 53-കാരനായ അബു യൂനിസിന്റെ മൃതദേഹം ലഭിച്ചതായും ആക്രമണത്തിൽ രണ്ടുപേർക്ക് പരിക്കേറ്റതായും ഗാസ സിവിൽ ഡിഫൻസ് വക്താവ് മഹ്മൂദ് ബസ്സാൽ എ.എഫ്.പിയോട് പറഞ്ഞു.
ഇസ്രയേൽ സൈന്യവും ആഭ്യന്തര സുരക്ഷാ ഏജൻസിയായ ഷിൻ ബെറ്റും സംയുക്തമായാണ് ആക്രമണം നടത്തിയതെന്ന് ഞായറാഴ്ച പുലർച്ചെ പുറത്തിറക്കിയ പ്രസ്താവനയിൽ അറിയിച്ചു. അബു യൂനിസിനെ ലക്ഷ്യമിട്ടായിരുന്നു നടപടിയെന്നും കൂടുതൽ വിവരങ്ങൾ പിന്നീട് പുറത്തുവിടുമെന്നും സൈന്യം വ്യക്തമാക്കി. എന്നാൽ ആക്രമണത്തിന്റെ കൂടുതൽ വിശദാംശങ്ങൾ വെളിപ്പെടുത്തിയിട്ടില്ല.
അതേസമയം, അബു യൂനിസിന്റെ മരണം സ്ഥിരീകരിച്ച അൽ ഖസ്സാം ബ്രിഗേഡ് ഇസ്രയേൽ ആക്രമണത്തെ അപലപിച്ചു.
