കൊച്ചി: യുവതിയായ ഡോക്ടർക്കെതിരായ ബലാത്സംഗക്കേസിൽ മുൻകൂർ ജാമ്യം തേടി ഡോ. ജോൺസൺ കെ. വർഗീസ്. പരാതിക്കാരിയുടെ കുടുംബ ഡോക്ടറാണ് താനെന്നും ദീർഘകാലമായി തന്റെ കീഴിൽ ചികിത്സ തേടുന്നയാളാണ് പരാതിക്കാരിയെന്നും ഡോക്ടർ മുൻകൂർ ജാമ്യഹർജിയിൽ പറയുന്നു. ബലാത്സംഗ ആരോപണം കെട്ടിച്ചമച്ചതാണെന്നും പരാതിക്കാരിയുമായി നല്ല സൗഹൃദത്തിലായിരുന്നുവെന്നും ഹർജിയിൽ അവകാശപ്പെടുന്നു. പരാതിക്കാരിയുടെ ബന്ധുവായ നടിക്കെതിരെയും ഡോക്ടർ ഗുരുതര ആരോപണങ്ങൾ ഉന്നയിച്ചിട്ടുണ്ട്.
ബന്ധുവായ നടി പണം തട്ടിയെടുക്കാൻ ശ്രമിച്ചെന്നാണ് ഡോക്ടറുടെ ആരോപണം. കടവന്ത്രയിലെ ഫ്ലാറ്റിൽ തന്നെ കെട്ടിയിട്ടും നഗ്നനാക്കിയും വീഡിയോ ചിത്രീകരിച്ചു. മൂന്ന് കോടി രൂപ നൽകണമെന്നാണ് ആവശ്യപ്പെട്ടത്. നടി പണം ആവശ്യപ്പെടുന്നതിന്റെ വാട്സാപ്പ് ചാറ്റുകൾ കൈവശമുണ്ടെന്നും ഡോക്ടർ അവകാശപ്പെടുന്നു. മർദനവുമായി ബന്ധപ്പെട്ട് താൻ നൽകിയ പരാതിയോടുള്ള വിരോധമാണ് ബലാത്സംഗക്കേസിന് പിന്നിലെന്നും ഹർജിയിൽ പറയുന്നു.
അതേസമയം, കേസെടുത്തതിന് പിന്നാലെ ഡോക്ടർ ഒളിവിലാണ്. ഇയാൾ വിദേശത്തേക്ക് കടന്നതായാണ് പോലീസിന്റെ സംശയം. പ്രതിക്കായി ലുക്ക് ഔട്ട് നോട്ടീസും പുറപ്പെടുവിച്ചിട്ടുണ്ട്.
