ന്യൂഡൽഹി: കാലടി സർവകലാശാലയിലെ പരീക്ഷാ വിവാദത്തിൽ സസ്പെൻഷനിലായ വിദ്യാർത്ഥികൾക്ക് സുപ്രീംകോടതിയിൽ തിരിച്ചടി. കേസ് ഹൈക്കോടതി സിംഗിൾ ബെഞ്ച് തന്നെ പരിഗണിക്കട്ടെയെന്ന് സുപ്രീംകോടതി നിർദേശിച്ചു. സർവകലാശാലകളിൽ പാലിക്കേണ്ട അച്ചടക്കമുണ്ടെന്ന് ചൂണ്ടിക്കാട്ടിയാണ് കേസ് സിംഗിൾ ബെഞ്ചിന്റെ പരിഗണനയ്ക്ക് വിടാൻ കോടതി ഉത്തരവിട്ടത്.
വിദ്യാർത്ഥികൾക്കായി മുതിർന്ന അഭിഭാഷകൻ പി.വി. ദിനേശാണ് ഹാജരായത്. സസ്പെൻഷൻ കാരണമാണ് വിദ്യാർത്ഥികളുടെ ഹാജർനില കുറഞ്ഞതെന്നും സർവകലാശാല മനഃപൂർവം ഇത്തരമൊരു സാഹചര്യം സൃഷ്ടിച്ചതാണെന്നും അദ്ദേഹം വാദിച്ചു. എന്നാൽ, ഹാജർനില സംബന്ധിച്ച കാര്യങ്ങൾ കോടതി പരിശോധിക്കണമെന്നായിരുന്നു സർവകലാശാലയുടെ നിലപാട്.
കോടതി ഉത്തരവ് വിദ്യാർത്ഥികൾക്ക് അനുകൂലമായാൽ പ്രത്യേക പരീക്ഷ നടത്താൻ തയ്യാറാണെന്നും സർവകലാശാല അറിയിച്ചു. നേരത്തെ ഹൈക്കോടതിയിൽനിന്ന് അനുകൂല വിധി ലഭിക്കാതിരുന്നതോടെയാണ് വിദ്യാർത്ഥികൾ സുപ്രീംകോടതിയെ സമീപിച്ചത്.
