ന്യൂഡൽഹി: കാലടി സംസ്കൃത സർവകലാശാലയിലെ വിദ്യാർഥികളുടെ സസ്പെൻഷൻ വിവാദത്തിൽ മുഖ്യമന്ത്രി വി.ഡി. സതീശനെതിരെ രൂക്ഷ വിമർശനവുമായി സിപിഎം നേതാവ് പി. രാജീവ്. മുൻ ഗവർണർ രാജേന്ദ്ര ആർലേക്കറുടെ അടിമയെപ്പോലെയാണ് മുഖ്യമന്ത്രി പ്രവർത്തിക്കുന്നതെന്നും ഒരു സംഘി മുഖ്യമന്ത്രിയെപ്പോലെയാണ് അദ്ദേഹത്തിന്റെ നിലപാടുകളെന്നും പി. രാജീവ് ആരോപിച്ചു. മുഖ്യമന്ത്രി നുണകൾ ഉത്പാദിപ്പിക്കുന്ന ഫാക്ടറിയായി മാറിയെന്നും അദ്ദേഹം കുറ്റപ്പെടുത്തി.
സംസ്കൃത സർവകലാശാലയിൽ വഴിതടഞ്ഞതിന്റെ പേരിലാണ് വിദ്യാർഥികൾക്കെതിരെ ആദ്യം കേസെടുത്തത്. എന്നാൽ പിന്നീട് ഇത് വൈസ് ചാൻസലറെ കൈയേറ്റം ചെയ്തെന്ന കേസായി മാറിയതെങ്ങനെയെന്ന് പി. രാജീവ് ചോദിച്ചു. ഗവർണർ ഇടപെട്ടാണ് ഇത്തരമൊരു മാറ്റമുണ്ടായതെന്നും അദ്ദേഹം ആരോപിച്ചു. ഗവർണർ നേരിട്ട് ഡിജിപിയെ വിളിച്ചത് ചരിത്രത്തിലെ അപൂർവ നടപടിയായിരുന്നു. ഈ വിഷയത്തിൽ മുഖ്യമന്ത്രി കുറ്റകരവും ഭരണഘടനാവിരുദ്ധവുമായ നിശബ്ദത പാലിച്ചെന്നും ഗവർണറുടെ നിർദേശപ്രകാരമാണ് പൊലീസ് എഫ്ഐആർ മാറ്റിയതെന്നും പി. രാജീവ് പറഞ്ഞു.
ഇതൊന്നും ചോദ്യം ചെയ്യാതെ വി.ഡി. സതീശൻ സംഘി മുഖ്യമന്ത്രിയെപ്പോലെ പ്രവർത്തിക്കുകയാണ്. ആർലേക്കർ പറയുന്നത് സതീശന് വേദവാക്യമാണ്. എന്തുതരം മുഖ്യമന്ത്രിയാണ് കേരളം ഭരിക്കുന്നതെന്നും അദ്ദേഹം ചോദിച്ചു. ഒരു എഫ്ഐആറിൽ അന്വേഷണം നടക്കുന്നതിനിടെ വിദ്യാർഥികൾ ആക്രമിച്ചെന്ന് മുഖ്യമന്ത്രി പരസ്യമായി പറയാൻ പാടുണ്ടോയെന്നും പി. രാജീവ് ചോദിച്ചു.
മന്ത്രിസഭയുടെ ഉപദേശത്തിനും ശുപാർശയ്ക്കും അനുസരിച്ചാണ് ഗവർണർ പ്രവർത്തിക്കേണ്ടതെന്നും അദ്ദേഹം ഓർമിപ്പിച്ചു. ചുരുങ്ങിയ കാലത്തിനുള്ളിൽ സർക്കാർ പ്രകടമായ അഴിമതിയിലേക്കും ബിജെപി വിധേയത്വത്തിലേക്കും നീങ്ങുകയാണെന്നും പി. രാജീവ് ആരോപിച്ചു. എല്ലാവരെയും എല്ലാകാലത്തേക്കും കബളിപ്പിക്കാനാകില്ലെന്നും അദ്ദേഹം കൂട്ടിച്ചേർത്തു.
