വയനാട്: മീനങ്ങാടി സ്കൂൾ വിനോദയാത്രയുമായി ബന്ധപ്പെട്ട മദ്യപാന ആരോപണം തള്ളി പിടിഎ പ്രസിഡന്റ് ഹാജിസ്. താൻ മദ്യപിച്ചിരുന്നില്ലെന്നും സംഭവത്തിന് പിന്നിൽ വ്യക്തമായ രാഷ്ട്രീയ മുതലെടുപ്പ് നടന്നിട്ടുണ്ടെന്നും അദ്ദേഹം ആരോപിച്ചു. സംഭവസ്ഥലത്തോ അതിനുശേഷമോ ആരും വൈദ്യപരിശോധനയ്ക്ക് വിധേയനാകാൻ ആവശ്യപ്പെട്ടിട്ടില്ലെന്നും ഹാജിസ് വ്യക്തമാക്കി.
‘വണ്ടിയിൽ കയറിയിരുന്നപ്പോൾ എന്തോ മണക്കുന്നെന്ന് കുട്ടികൾ പറയുന്നുണ്ടായിരുന്നു. വയറിന് അസുഖമുണ്ടാകാതിരിക്കുന്നതിനുള്ള ഒരു മരുന്ന് ഞാൻ കഴിച്ചിരുന്നു. അതിനു ശേഷമാണ് കുട്ടികൾ പിടിഎ പ്രസിഡന്റിനെയാണ് മദ്യം മണക്കുന്നുവെന്ന് പറയാൻ തുടങ്ങിയത്. വണ്ടിയിൽ നിന്നും ഇറങ്ങി ഒറ്റയ്ക്ക് നാട്ടിലേയ്ക്ക് വരുവാനുള്ള തീരുമാനമെടുത്തതും ഞാൻ തന്നെയാണ്‘- ഹാജിസ് പറഞ്ഞു
സംഭവസമയത്ത് കുട്ടികൾ രോഷാകുലരായിരുന്നതിനാലാണ് വീഡിയോ ചിത്രീകരിച്ചപ്പോൾ പ്രതികരിക്കാതെ മിണ്ടാതിരുന്നതെന്ന് അദ്ദേഹം
പറഞ്ഞു. കുട്ടികൾക്ക് യാതൊരുവിധ ബുദ്ധിമുട്ടുകളും ഉണ്ടാകരുതെന്നു മാത്രമായിരുന്നു അപ്പോൾ തന്റെ ചിന്തയെന്നും ഹാജിസ് വിശദീകരിച്ചു.
അതേസമയം, വിനോദയാത്രാ വിവാദത്തെ തുടർന്ന് പ്രിൻസിപ്പൽ ഷിവി കൃഷ്ണനെ സ്ഥലംമാറ്റിയതിൽ പ്രതിഷേധിച്ച് മീനങ്ങാടി സ്കൂളിലെ പ്ലസ് വൺ, പ്ലസ് ടു വിദ്യാർഥികൾ പഠിപ്പുമുടക്കി സമരം നടത്തി. വ്യക്തമായ കാരണമില്ലാതെയാണ് പ്രിൻസിപ്പലിനെ സ്ഥലംമാറ്റിയതെന്നാണ് വിദ്യാർഥികളുടെ ആരോപണം. നടപടി പിൻവലിക്കുന്നതുവരെ സമരം തുടരുമെന്നും അവർ വ്യക്തമാക്കി.
പ്രിൻസിപ്പലിന്റെ സ്ഥലംമാറ്റത്തിനെതിരെ കേരള സ്കൂൾ ടീച്ചേഴ്സ് അസോസിയേഷന്റെ നേതൃത്വത്തിലും മീനങ്ങാടിയിൽ പ്രതിഷേധ പ്രകടനവും വിശദീകരണ യോഗവും സംഘടിപ്പിക്കും. ഇടതുപക്ഷ അധ്യാപക സംഘടനാ നേതാവുകൂടിയാണ് ഷിവി കൃഷ്ണൻ.
വിനോദയാത്രയ്ക്കിടെ പ്രിൻസിപ്പലും പിടിഎ പ്രസിഡന്റും മദ്യപിച്ചെന്നായിരുന്നു നേരത്തേ ഉയർന്ന ആരോപണം. എന്നാൽ, പ്രിൻസിപ്പലിന്റെ രക്തപരിശോധനയിൽ മദ്യത്തിന്റെ അംശം കണ്ടെത്തിയിരുന്നില്ല.
വിവാദത്തെ തുടർന്ന് ഹയർ സെക്കൻഡറി ബോർഡ് നടത്തിയ അന്വേഷണത്തിൽ സർക്കാർ മാനദണ്ഡങ്ങൾ പാലിക്കാതെയാണ് സ്കൂൾ പഠനയാത്ര സംഘടിപ്പിച്ചതെന്ന് കണ്ടെത്തിയിരുന്നു. ഇതിന്റെ അടിസ്ഥാനത്തിലാണ് പ്രിൻസിപ്പലിനെ അദ്ദേഹത്തിന്റെ വീടിന് സമീപമുള്ള വടുവഞ്ചാൽ ഹയർ സെക്കൻഡറി സ്കൂളിലേക്ക് സ്ഥലംമാറ്റിയത്.
