തിരുവനന്തപുരം: പാങ്ങപ്പാറയിൽ കാണാതായ പ്ലസ്ടു വിദ്യാർഥി അഭിറാം എം.ഡി. (17) കൊല്ലപ്പെട്ട സംഭവത്തിൽ ഒരു പെൺകുട്ടിയടക്കം മൂന്നുപേരെ പൊലീസ് കസ്റ്റഡിയിലെടുത്തു. പ്രണയവുമായി ബന്ധപ്പെട്ട തർക്കമാണ് കൊലപാതകത്തിലേക്ക് നയിച്ചതെന്നാണ് പ്രാഥമിക നിഗമനം. കാര്യവട്ടം പാങ്ങപ്പാറ സംഗീത നഗർ സ്വദേശിയായ അഭിറാമിന്റെ മൃതദേഹം തിങ്കളാഴ്ച വൈകുന്നേരം പാങ്ങപ്പാറയിലെ ഒഴിഞ്ഞ പറമ്പിൽ വാഴത്തോട്ടത്തിൽ ചാക്കിൽക്കെട്ടിയ നിലയിൽ കണ്ടെത്തുകയായിരുന്നു.
ഞായറാഴ്ച വൈകുന്നേരം സുഹൃത്തിന്റെ വീട്ടിലേക്ക് പോകുന്നുവെന്ന് പറഞ്ഞാണ് അഭിറാം ശ്രീകാര്യത്തെ വീട്ടിൽനിന്ന് ഇറങ്ങിയത്. വൈകുന്നേരം ഫോണിൽ ബന്ധപ്പെട്ടപ്പോൾ അധികം വൈകാതെ തിരിച്ചെത്തുമെന്നായിരുന്നു അറിയിച്ചത്. എന്നാൽ രാത്രി വൈകിയും വീട്ടിലെത്തിയില്ല. പിന്നാലെ ഫോൺ സ്വിച്ച് ഓഫ് ആയതോടെ വീട്ടുകാർ പൊലീസിൽ പരാതി നൽകുകയായിരുന്നു.
തിരോധാനത്തിന് കേസെടുത്ത് അന്വേഷണം ആരംഭിച്ച പൊലീസ് അഭിറാമിന്റെ സുഹൃത്തുക്കളെ ചോദ്യം ചെയ്തെങ്കിലും കാര്യമായ വിവരങ്ങൾ ലഭിച്ചില്ല. തുടർന്ന് സിസിടിവി ദൃശ്യങ്ങളും മൊബൈൽ ടവർ ലൊക്കേഷനും കേന്ദ്രീകരിച്ച് അന്വേഷണം നടത്തി. ഇതിനിടെയാണ് ഒരു പെൺകുട്ടിയുടെ ഇൻസ്റ്റഗ്രാം അക്കൗണ്ടിൽനിന്ന് അഭിറാമിന് സന്ദേശം ലഭിച്ചതായി പൊലീസിന് വിവരം ലഭിച്ചത്. ഇതിന്റെ അടിസ്ഥാനത്തിൽ പെൺകുട്ടിയെ ഉപയോഗിച്ച് അഭിറാമിനെ പാങ്ങപ്പാറയിലേക്ക് വിളിച്ചുവരുത്തിയതാണെന്നാണ് അന്വേഷണസംഘത്തിന്റെ നിഗമനം.
പാങ്ങപ്പാറയിലെത്തിയ അഭിറാമിനെ കഴുത്തിൽ ബെൽറ്റ് മുറുക്കി കൊലപ്പെടുത്തിയശേഷം ചാക്കിലാക്കി വാഴത്തോട്ടത്തിൽ ഉപേക്ഷിക്കുകയായിരുന്നുവെന്നാണ് പുറത്തുവരുന്ന വിവരം. മൃതദേഹം കണ്ടെത്തിയ സ്ഥലത്ത് ഇൻക്വസ്റ്റ് നടപടികൾ ഉൾപ്പെടെയുള്ള പരിശോധനകൾ നടത്തി.
കസ്റ്റഡിയിലുള്ള 17കാരനും പെൺകുട്ടിയും തമ്മിൽ അടുപ്പത്തിലായിരുന്നുവെന്നും അഭിറാമിനും പെൺകുട്ടിയുമായി സൗഹൃദം സ്ഥാപിക്കാൻ താൽപര്യമുണ്ടായിരുന്നുവെന്നും പൊലീസ് അന്വേഷണത്തിൽ വ്യക്തമായതായാണ് വിവരം. ഇതുമായി ബന്ധപ്പെട്ട തർക്കമാണ് കൊലപാതകത്തിലേക്ക് നയിച്ചതെന്നാണ് പ്രാഥമിക സൂചന. സംഭവത്തിൽ മറ്റൊരാൾക്കും പങ്കുണ്ടോയെന്നും പൊലീസ് അന്വേഷിക്കുന്നുണ്ട്.
കൊലപാതകം നടത്താനും മൃതദേഹം ചാക്കിലാക്കി ഉപേക്ഷിക്കാനും 17കാരന് മറ്റുള്ളവരുടെ സഹായം ലഭിച്ചിട്ടുണ്ടാകാമെന്നാണ് പൊലീസിന്റെ സംശയം. നിലവിൽ ഒരു 17കാരനും പെൺകുട്ടിയും മറ്റൊരാളുമാണ് കസ്റ്റഡിയിലുള്ളത്. പ്രതിയായ 17കാരൻ നേരത്തേ മോഷണമുൾപ്പെടെയുള്ള കേസുകളിൽ ഉൾപ്പെട്ടിട്ടുണ്ടെന്നും വിവരമുണ്ട്. ഇക്കാര്യങ്ങളും പൊലീസ് പരിശോധിച്ചുവരികയാണ്.
അഭിറാമിനെ കാണാതായതിനെ തുടർന്ന് സുഹൃത്തുക്കൾ പാങ്ങപ്പാറയിലും പരിസരത്തും തിരച്ചിൽ നടത്തിയിരുന്നു. എന്നാൽ മതിലിനപ്പുറത്തുള്ള വാഴത്തോട്ടത്തിൽ പരിശോധന നടത്തിയിരുന്നില്ലെന്നാണ് വിവരം. പിന്നീട് പൊലീസിന്റെ അന്വേഷണത്തിലാണ് അവിടെനിന്ന് മൃതദേഹം കണ്ടെത്തിയത്.
കുട്ടിയെ കണ്ടെത്തുന്നതിൽ പൊലീസിന് വീഴ്ച സംഭവിച്ചെന്ന് അഭിറാമിന്റെ മാതാപിതാക്കൾ ആരോപിച്ചു. രാവിലെ മുതൽ പൊലീസ് സ്റ്റേഷനിലുണ്ടായിരുന്ന മാതാപിതാക്കൾക്ക് വൈകുന്നേരമാണ് മൃതദേഹം കണ്ടെത്തിയെന്ന വിവരം ലഭിച്ചത്. കമ്മീഷണറുടെ നേതൃത്വത്തിലുള്ള സംഘം സ്ഥലത്തെത്തി പരിശോധന നടത്തി. കസ്റ്റഡിയിലുള്ളവരെ ചോദ്യംചെയ്യുന്നത് തുടരുകയാണ്.
