കണ്ണൂർ: വീട്ടമ്മ പുറത്തുപോയ സമയത്ത് വീടിനകത്ത് അതിക്രമിച്ചുകയറി വീട്ടുപകരണങ്ങൾ നശിപ്പിക്കുകയും മലമൂത്രവിസർജനം നടത്തുകയും ചെയ്തു. ചമ്പാട് അരയാക്കൂൽ ജന്മീന്റവിട പുഷ്പലതയുടെ വീട്ടിലാണ് സംഭവം.
ഇന്നലെ ഉച്ചയ്ക്ക് വീടുപൂട്ടി പുറത്തുപോയ പുഷ്പലത വൈകിട്ട് ആറോടെ തിരിച്ചെത്തിയപ്പോഴാണ് വാതിൽ തുറന്നുകിടക്കുന്നതായി കണ്ടത്. അകത്തുകയറി പരിശോധിച്ചപ്പോഴാണ് മുറിയിലെ സീലിങ് ഫാനിന്റെ ലീഫുകൾ ഒടിച്ച നിലയിലും ടിവിയും മേശയും അടുക്കളയിലെ മിക്സിയും മറിച്ചിട്ട നിലയിലും കണ്ടെത്തിയത്. വരാന്തയിൽ മലമൂത്രവിസർജനവും നടത്തിയിരുന്നു.
ഫ്രിഡ്ജിൽ സൂക്ഷിച്ചിരുന്ന മിഠായികൾ മാത്രമാണ് നഷ്ടപ്പെട്ടതെന്ന് പുഷ്പലത പറഞ്ഞു. ചോതാവൂർ ഹയർ സെക്കൻഡറി സ്കൂളിലെ ശുചീകരണത്തൊഴിലാളിയാണ് പുഷ്പലത.
പരാതിയെ തുടർന്ന് പാനൂർ എസ്.ഐ. മരിയ പ്രിൻസിന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി പരിശോധന നടത്തി.
