ഇൻഡോർ: നാലുവയസുകാരന്റെ ചോക്ലേറ്റ് കഴിച്ചതിന് അമ്മ വഴക്കുപറഞ്ഞതിലുള്ള പക തീർക്കാൻ കുട്ടിയെ വീട്ടിലേക്ക് വിളിച്ചുവരുത്തി വെള്ളടാങ്കിൽ മുക്കിക്കൊന്നെന്ന് 12കാരി. മധ്യപ്രദേശിലെ ഷാംഗഢിലെ ഒരു കോളനിയിലാണ് ഞെട്ടിക്കുന്ന സംഭവം. ഒക്ടോബർ 24ന് കാണാതായ നാലുവയസ്സുകാരനെ മണിക്കൂറുകൾക്കുശേഷം പെൺകുട്ടിയുടെ വീട്ടിലെ വെള്ളടാങ്കിൽ മരിച്ച നിലയിൽ കണ്ടെത്തുകയായിരുന്നു.
കുട്ടിയുടെ ചോക്ലേറ്റ് കഴിച്ചതിന് ഏകദേശം 10 മുതൽ 12 ദിവസം മുമ്പ് കുട്ടിയുടെ അമ്മ പെൺകുട്ടിയെ ശകാരിച്ചിരുന്നു. ഇതിൽ അപമാനിതയായ പെൺകുട്ടി പക മനസ്സിൽ സൂക്ഷിക്കുകയും പ്രതികാരം ചെയ്യാൻ പദ്ധതിയിടുകയും ചെയ്തെന്നാണ് പോലീസിന്റെ പ്രാഥമിക നിഗമനം.
ഒക്ടോബർ 24ന് ഉച്ചയ്ക്ക് രണ്ടുമണിയോടെ വീട്ടിൽ മറ്റാരുമില്ലാതിരുന്ന സമയത്ത് പെൺകുട്ടി കുട്ടിയെ തന്റെ വീട്ടിലേക്ക് വിളിച്ചുവരുത്തുകയായിരുന്നു. ചോക്ലേറ്റ് നൽകാമെന്ന് പറഞ്ഞാണ് കുട്ടിയെ വീട്ടിലേക്ക് ക്ഷണിച്ചതെന്നാണ് പോലീസ് പറയുന്നത്. വീട്ടിലെത്തിയ കുട്ടിയെ വെള്ളം നിറച്ച ടാങ്കിലേക്ക് തള്ളിയിട്ടശേഷം ടാങ്കിന്റെ കനത്ത മൂടി അടച്ചെന്നാണ് ആരോപണം. ഇതോടെ കുട്ടി ടാങ്കിനുള്ളിൽ കുടുങ്ങി മരിക്കുകയായിരുന്നു.
അതേസമയം, കുട്ടിയെ കാണാതായതോടെ വീട്ടുകാർ തിരച്ചിൽ ആരംഭിച്ചു. അവസാനമായി കുട്ടി പെൺകുട്ടിക്കൊപ്പമായിരുന്നുവെന്ന വിവരത്തിന്റെ അടിസ്ഥാനത്തിൽ പോലീസ് അവളെ ചോദ്യം ചെയ്യുകയും വീട്ടിൽ പരിശോധന നടത്തുകയും ചെയ്തു. തുടർന്നാണ് വെള്ളടാങ്കിൽനിന്ന് കുട്ടിയുടെ മൃതദേഹം കണ്ടെത്തിയത്.
പോസ്റ്റ്മോർട്ടം നടപടികൾ പൂർത്തിയാക്കിയശേഷം രണ്ടാം ദിവസമാണ് മൃതദേഹം ബന്ധുക്കൾക്ക് കൈമാറിയത്. തുടർന്ന് കുടുംബാംഗങ്ങൾ കുട്ടിയുടെ അന്ത്യകർമങ്ങൾ നടത്തി. സംഭവത്തിൽ കൂടുതൽ വിവരങ്ങൾ ശേഖരിക്കുന്നതിന്റെ ഭാഗമായി പോലീസ് പ്രദേശവാസികളെ ചോദ്യം ചെയ്യുകയും കുടുംബാംഗങ്ങളുടെ മൊഴികൾ രേഖപ്പെടുത്തുകയും ചെയ്തു.
ചോദ്യം ചെയ്യലിനിടെ പെൺകുട്ടി കുറ്റം സമ്മതിച്ചതായി ഷാംഗഢ് പോലീസ് സ്റ്റേഷൻ ഇൻചാർജ് കപിൽ സൗരാഷ്ട്രീയ അറിയിച്ചു. ചൊവ്വാഴ്ച പെൺകുട്ടിയെ ജുവനൈൽ കോടതിയിൽ ഹാജരാക്കി. തുടർന്ന് വിദിഷയിലെ കുട്ടികൾക്കായുള്ള നിരീക്ഷണ കേന്ദ്രത്തിലേക്ക് മാറ്റി. മരിച്ച കുട്ടി മൂന്ന് പെൺമക്കളുള്ള കുടുംബത്തിലെ ഏക ആൺകുട്ടിയായിരുന്നു. ചോക്ലേറ്റുമായി ബന്ധപ്പെട്ട ചെറിയൊരു തർക്കം ദിവസങ്ങൾക്കുശേഷം നാലുവയസുകാരന്റെ മരണത്തിൽ കലാശിച്ച സംഭവത്തിന്റെ ഞെട്ടലിലാണ് പ്രദേശവാസികൾ.
