ശബരിമല: തമിഴ്നാട് സർക്കാർ റേഷൻകടകൾ വഴി പൊങ്കൽ സമ്മാനമായി നൽകിയ മുണ്ടുകൾ പമ്പയിൽ ഇരുമുടിക്കെട്ടിനായി ഉപയോഗിക്കുന്നതായി ആരോപണം. ദേവസ്വം ബോർഡിന്റെ നിയന്ത്രണത്തിലുള്ള കെട്ടുനിറ കേന്ദ്രത്തിൽനിന്ന് തമിഴ്നാട് സർക്കാരിന്റെ സൗജന്യ മുണ്ടുകൾ ഇരുമുടിക്കെട്ടിൽ ഉൾപ്പെടുത്തി തീർഥാടകർക്ക് നൽകിയെന്നാണ് ആരോപണം. സംഭവത്തിൽ വലിയ അഴിമതി നടന്നിട്ടുണ്ടെന്ന് തമിഴ്നാട്ടിൽനിന്നുള്ള അയ്യപ്പഭക്തർ ആരോപിച്ചു.
തമിഴ്നാട് സർക്കാരിന്റെ ഔദ്യോഗിക സീലും ‘2025’ എന്ന വർഷവും രേഖപ്പെടുത്തിയ മുണ്ടുകളാണ് ഇരുമുടിക്കെട്ടിനായി ഉപയോഗിച്ചിരിക്കുന്നതെന്നാണ് തീർഥാടകർ പറയുന്നത്. തമിഴ്നാട്ടിൽനിന്നെത്തിയ ഭക്തരുടെ ശ്രദ്ധയിൽപ്പെട്ടതോടെയാണ് സംഭവം പുറത്തറിഞ്ഞത്.
നിലവിൽ കരാറുകാരാണ് പമ്പയിലെ ദേവസ്വം കെട്ടുനിറ കേന്ദ്രത്തിന്റെ നടത്തിപ്പ് ചുമതല വഹിക്കുന്നത്. ഒരു ഇരുമുടിക്കെട്ടിന് 300 രൂപ വീതമാണ് ഇവിടെ ഭക്തരിൽനിന്ന് ഈടാക്കുന്നതെന്നാണ് വിവരം. സന്നിധാനത്തെത്തി ഇരുമുടിക്കെട്ട് അഴിച്ചപ്പോഴാണ് തങ്ങൾക്ക് ലഭിച്ച മുണ്ട് തമിഴ്നാട് സർക്കാർ പൊങ്കൽ സമ്മാനമായി നൽകിയതാണെന്ന് തീർഥാടകർ തിരിച്ചറിഞ്ഞത്.
