കണ്ണൂർ: തിരഞ്ഞെടുപ്പ് പരാജയത്തിന് പിന്നാലെ അകന്നുപോയ ന്യൂനപക്ഷവിഭാഗങ്ങളുടെ വിശ്വാസം വീണ്ടെടുക്കാനും പാർട്ടിയുടെ ജനപിന്തുണ ശക്തിപ്പെടുത്താനും 36 ഇന ഭാവിപ്രവർത്തനപരിപാടികളുമായി സി.പി.എം. കണ്ണൂരിൽ ചേർന്ന വിശാല ജില്ലാ കമ്മിറ്റി യോഗത്തിലാണ് ഇതുസംബന്ധിച്ച തീരുമാനങ്ങൾ കൈക്കൊണ്ടത്. അതേസമയം, പയ്യന്നൂരിലെയും തളിപ്പറമ്പിലെയും തിരഞ്ഞെടുപ്പ് പരാജയം, സ്ഥാനാർഥിനിർണയത്തിലെ വീഴ്ചകൾ, സംഘടനാതലത്തിലെ പ്രശ്നങ്ങൾ എന്നിവയിൽ സംസ്ഥാന-ജില്ലാ നേതൃത്വത്തിനെതിരേ പ്രതിനിധികളുടെ രൂക്ഷവിമർശനവും യോഗത്തിലുയർന്നു.
2004 മുതലുള്ള തിരഞ്ഞെടുപ്പുകളിൽ പാർട്ടിക്കൊപ്പം നിന്ന മുസ്‌ലിം ന്യൂനപക്ഷവിഭാഗങ്ങളിൽ ഒരു വിഭാഗം കഴിഞ്ഞ നിയമസഭാ തിരഞ്ഞെടുപ്പോടെ അകന്നുപോയെന്നാണ് സി.പി.എമ്മിന്റെ വിലയിരുത്തൽ. ന്യൂനപക്ഷവിഭാഗങ്ങളെ തെറ്റിദ്ധരിപ്പിക്കുന്ന തരത്തിൽ മുസ്‌ലിം ലീഗ് വർഗീയപ്രചാരണം നടത്തിയെന്നായിരുന്നു ജില്ലാ സെക്രട്ടറി കെ.കെ. രാഗേഷിന്റെ ആരോപണം. ജമാഅത്തെ ഇസ്‌ലാമിയുടെ ആശയാടിത്തറയിലാണ് ലീഗിന്റെ ഇടപെടലുകളെന്നും അദ്ദേഹം ആരോപിച്ചു. വാട്‌സാപ്പ് ഗ്രൂപ്പുകൾ ഉൾപ്പെടെയുള്ള മാധ്യമങ്ങളിലൂടെ നടത്തിയ പ്രചാരണങ്ങൾ പരിശോധിച്ചാൽ വർഗീയപ്രചാരണം നടന്നതായി വ്യക്തമാകുമെന്നും രാഗേഷ് പറഞ്ഞു.
ക്രൈസ്തവ ന്യൂനപക്ഷങ്ങളെയും ഉൾക്കൊള്ളുന്ന വിശാലമായ സമീപനത്തിലൂടെ വിശ്വാസം വീണ്ടെടുക്കാനാണ് പാർട്ടി ലക്ഷ്യമിടുന്നത്. മതവിശ്വാസവുമായി ബന്ധപ്പെട്ട ആഘോഷങ്ങളിലും ജനങ്ങൾ ഒത്തുചേരുന്ന ഇടങ്ങളിലും പാർട്ടിയുടെ സാന്നിധ്യം ശക്തമാക്കും. സി.പി.എം വിശ്വാസികൾക്ക് എതിരാണെന്ന പ്രചാരണത്തെ പ്രതിരോധിക്കുമെന്നും വിശ്വാസത്തെയല്ല, വർഗീയതയെയാണ് പാർട്ടി എതിർക്കുന്നതെന്നും രാഗേഷ് വ്യക്തമാക്കി. നഗര, തീരദേശ, മലയോര മേഖലകളിലും പട്ടികജാതി-പട്ടികവർഗ വിഭാഗങ്ങൾക്കിടയിലും പ്രവർത്തനം ശക്തമാക്കാനും തീരുമാനിച്ചിട്ടുണ്ട്.
രണ്ടുദിവസം നീണ്ട വിശാല ജില്ലാ കമ്മിറ്റി യോഗത്തിൽ തിരഞ്ഞെടുപ്പ് പരാജയത്തിന് ഉത്തരവാദികളായ നേതാക്കൾക്കെതിരേ പ്രതിനിധികൾ വിമർശനം ഉന്നയിച്ചു. സ്ഥാനാർഥിനിർണയത്തിലും വോട്ടുചോർച്ചയിലും വീഴ്ചയുണ്ടായെന്നും നേതാക്കളുടെ തീരുമാനങ്ങളുടെ പ്രത്യാഘാതം പാർട്ടിയാണ് ഇപ്പോൾ അനുഭവിക്കുന്നതെന്നും ചില പ്രതിനിധികൾ ചൂണ്ടിക്കാട്ടി.
തളിപ്പറമ്പിൽ പി.കെ. ശ്യാമളയെ സ്ഥാനാർഥിയാക്കുന്നതിനെതിരേ ജില്ലാ സെക്രട്ടേറിയറ്റ് മുതൽ മണ്ഡലം കമ്മിറ്റി വരെ എതിർപ്പുയർന്നിട്ടും നേതൃത്വം തീരുമാനവുമായി മുന്നോട്ടുപോയെന്നായിരുന്നു വിമർശനം. സ്ഥാനാർഥിനിർണയത്തിലെ വീഴ്ചയെക്കുറിച്ച് സംസ്ഥാന സെക്രട്ടറി മറുപടി പറയണമെന്നും മയ്യിൽ ഏരിയാ കമ്മിറ്റി പ്രതിനിധികൾ ആവശ്യപ്പെട്ടതായി റിപ്പോർട്ടുണ്ട്. തളിപ്പറമ്പിലെയും പയ്യന്നൂരിലെയും പരാജയങ്ങൾ പാർട്ടിക്ക് വലിയ തിരിച്ചടിയായെന്നും യോഗത്തിൽ വിലയിരുത്തലുണ്ടായി.
പയ്യന്നൂരിലെ പരാജയത്തിന് സ്ഥാനാർഥിനിർണയത്തിലെ പാളിച്ചയെക്കാൾ വിഭാഗീയതയാണ് കാരണമെന്ന അഭിപ്രായവും പ്രതിനിധികൾ ഉന്നയിച്ചു. പാർട്ടിക്കുള്ളിലെ പ്രശ്നങ്ങൾ പരിഹരിക്കുന്നതിൽ നേതൃത്വത്തിന് വീഴ്ച സംഭവിച്ചെന്നും സംഘടനാതലത്തിൽ അഴിച്ചുപണി ആവശ്യമാണെന്നും അവർ ചൂണ്ടിക്കാട്ടി. ധനരാജ് രക്തസാക്ഷി ഫണ്ട്, ഓഫീസ് നിർമാണ ഫണ്ട്, തിരഞ്ഞെടുപ്പ് പരാജയം എന്നിവ പരിശോധിച്ച കമ്മിഷൻ റിപ്പോർട്ട് വൈകുന്നതിലും വിമർശനമുയർന്നു.
തളിപ്പറമ്പിലെ സ്ഥാനാർഥിനിർണയത്തിൽ പാളിച്ചയുണ്ടായെന്ന് മുഖ്യമന്ത്രി പിണറായി വിജയൻ യോഗത്തിൽ സമ്മതിച്ചു. സ്ഥാനാർഥിനിർണയത്തിൽ സംസ്ഥാന കമ്മിറ്റിക്കും ഉത്തരവാദിത്വമുണ്ടെന്നും അദ്ദേഹം വ്യക്തമാക്കി. പൊതുചർച്ചയ്ക്ക് സംസ്ഥാന റിപ്പോർട്ടിനുള്ള മറുപടി നൽകുന്നതിനിടെയാണ് പിണറായി ഇക്കാര്യം പറഞ്ഞത്.
പി.എം. ശ്രീ പദ്ധതിയിൽ ഒപ്പിടാൻ സർക്കാർ നിർബന്ധിതമായതാണെന്നും പിന്നീട് നിലപാട് തിരുത്തിയെന്നും അദ്ദേഹം വിശദീകരിച്ചു. പി.എം. ശ്രീയിൽ ഒപ്പിട്ടത് തിരഞ്ഞെടുപ്പ് കാലത്ത് രാഷ്ട്രീയമായി തിരിച്ചടിയായെന്ന വിമർശനവും യോഗത്തിലുയർന്നു. സി.പി.എം-ബി.ജെ.പി. ധാരണയുണ്ടെന്ന ആരോപണത്തിന് ഇതിലൂടെ സാധുത ലഭിച്ചുവെന്ന തരത്തിലായിരുന്നു ചില പ്രതിനിധികളുടെ വിമർശനം.
പയ്യന്നൂരിലെ വിഭാഗീയപ്രവർത്തനങ്ങൾ സംബന്ധിച്ച് വിശദമായ പരിശോധന നടക്കുകയാണെന്ന് കെ.കെ. രാഗേഷ് പറഞ്ഞു. കമ്മിഷൻ റിപ്പോർട്ട് തയ്യാറാക്കാൻ കൂടുതൽ സമയം ആവശ്യമായതിനാലാണ് വൈകുന്നതെന്നും ബന്ധപ്പെട്ട സഖാക്കളെ കണ്ടശേഷം റിപ്പോർട്ട് പൂർത്തിയാക്കി സംഘടനാപരമായ നടപടികൾ സ്വീകരിക്കുമെന്നും അദ്ദേഹം വ്യക്തമാക്കി.
കണ്ണൂരിൽ മതന്യൂനപക്ഷ വിഭാഗത്തിൽപ്പെട്ട ഒരാളെ സ്ഥാനാർഥിയാക്കാതിരുന്നത് പിഴവായിരുന്നുവെന്നും ഇക്കാര്യം കേന്ദ്ര കമ്മിറ്റി ചൂണ്ടിക്കാട്ടിയിരുന്നുവെന്നും രാഗേഷ് പറഞ്ഞു. സ്ഥാനാർഥിനിർണയ ചർച്ചകളിൽ ന്യൂനപക്ഷ വിഭാഗങ്ങളിൽനിന്നുള്ള പേരുകൾ പരിഗണിച്ചിരുന്നെങ്കിലും അന്തിമ പട്ടികയിൽ ഉൾപ്പെടുത്താനായില്ല. ഈ വീഴ്ച ജില്ലാ കമ്മിറ്റി സ്വയംവിമർശനപരമായി ഉൾക്കൊണ്ടിട്ടുണ്ടെന്നും അദ്ദേഹം വ്യക്തമാക്കി.
ജനങ്ങളുടെ ചിന്താഗതിയും മണ്ഡലങ്ങളിലെ മാറ്റങ്ങളും മനസ്സിലാക്കുന്നതിൽ പാർട്ടിക്ക് വീഴ്ചയുണ്ടായെന്നും രാഗേഷ് പറഞ്ഞു. ഇത് ഒരാളുടെ മാത്രം പിഴവല്ലെന്നും കൂട്ടായ തീരുമാനങ്ങളെടുത്ത നേതൃത്വത്തിന് കൂട്ടായതും വ്യക്തിപരവുമായ ഉത്തരവാദിത്വമുണ്ടെന്നും അദ്ദേഹം കൂട്ടിച്ചേർത്തു. പയ്യന്നൂരിലും തളിപ്പറമ്പിലും അകന്നുപോയ ജനവിഭാഗങ്ങളെ തിരിച്ചെത്തിക്കാൻ സൂക്ഷ്മമായ പരിശോധനയും ക്ഷമാപൂർവമായ ഇടപെടലും നടത്തുമെന്നും അദ്ദേഹം പറഞ്ഞു.
പി.പി. ദിവ്യ പാർട്ടിയുടെ ഭാഗമാണെന്നും അവരുടെ വിഷയം പൂർണമായി അവസാനിച്ചിട്ടില്ലെന്നും രാഗേഷ് വ്യക്തമാക്കി. ദിവ്യയുമായി ബന്ധപ്പെട്ട കേസ് നടപടികൾ പുരോഗമിക്കുകയാണെന്നും അതിനുശേഷമായിരിക്കും അവരെ തിരിച്ചുകൊണ്ടുവരുന്നതുമായി ബന്ധപ്പെട്ട കാര്യങ്ങൾ ചർച്ച ചെയ്യുകയെന്നും അദ്ദേഹം പറഞ്ഞു.
അതേസമയം, ഇരിട്ടി ഏരിയാ സെക്രട്ടറി കെ.വി. സക്കീർ ഹുസൈനെ ജില്ലാ സെക്രട്ടേറിയറ്റംഗമായി നിയോഗിക്കാൻ യോഗം തീരുമാനിച്ചു. ടി.കെ. ഗോവിന്ദൻ പാർട്ടി വിട്ടതിനെത്തുടർന്നുണ്ടായ ഒഴിവാണ് ഇതിലൂടെ നികത്തുന്നത്. ശ്രീകണ്ഠപുരം ഏരിയാ സെക്രട്ടറി എം.സി. രാഘവനെയും മാടായി ഏരിയാ സെക്രട്ടറി എം. ശ്രീധരനെയും ജില്ലാ കമ്മിറ്റിയിൽ ഉൾപ്പെടുത്തി. നാല് ഏരിയാ സെക്രട്ടറിമാർ ഉൾപ്പെടെ എട്ടുപേരെ ജില്ലാ കമ്മിറ്റി ക്ഷണിതാക്കളായും തീരുമാനിച്ചു.
തിരഞ്ഞെടുപ്പ് തിരിച്ചടിയുടെ കാരണങ്ങൾ പരിശോധിച്ച് സംഘടനാപരമായ തിരുത്തലുകൾ നടപ്പാക്കുന്നതിനൊപ്പം ന്യൂനപക്ഷങ്ങളുടെയും മറ്റ് അകന്നുപോയ ജനവിഭാഗങ്ങളുടെയും വിശ്വാസം വീണ്ടെടുക്കുകയാണ് കണ്ണൂരിൽ സി.പി.എം മുന്നോട്ടുവെക്കുന്ന പ്രധാന ലക്ഷ്യം.
