കൊച്ചി: നെടുമ്പാശ്ശേരി മിനി കൂപ്പർ അപകടക്കേസിൽ സുഹൈൽ ഉൾപ്പെടെയുള്ള പ്രതികളുടെ ജാമ്യാപേക്ഷ പരിഗണിക്കുന്നതിനിടെ പ്രതിഭാഗത്തിന്റെ വാദങ്ങളെ ചോദ്യം ചെയ്ത് കോടതി. മൂന്നുപേർ ഒരു സ്കൂട്ടറിൽ സഞ്ചരിച്ചതാണ് അപകടത്തിന് കാരണമായതെന്ന പ്രതിഭാഗത്തിന്റെ വാദത്തോട്, അതുകൊണ്ടാണോ അവരെ വാഹനം ഇടിച്ചിട്ടതെന്ന് കോടതി ചോദിച്ചു. അപകടത്തിന്റെ ഗൗരവം കുറച്ചുകാണിക്കുന്ന രീതിയിലാണ് പ്രതിഭാഗം വാദിക്കുന്നതെന്നും കോടതി നിരീക്ഷിച്ചു. ജാമ്യാപേക്ഷയിൽ വാദം തുടരുകയാണ്.
അഡ്വ. സെബി ജോസ് കിടങ്ങൂരാണ് പ്രതിഭാഗത്തിനുവേണ്ടി ഹാജരായത്. അപകടത്തിനു പിന്നാലെ മൊഴി നൽകിയ പ്രിയാദ് സംഭവത്തിന്റെ ദൃക്സാക്ഷിയല്ലെന്നാണ് പ്രതിഭാഗത്തിന്റെ വാദം. അപകടം നടന്നശേഷമാണ് ഇയാൾ സ്ഥലത്തെത്തിയതെന്നും അതിനാൽ പ്രാഥമിക മൊഴി നൽകാനുള്ള സാഹചര്യം എങ്ങനെയുണ്ടായെന്നും അഭിഭാഷകൻ ചോദിച്ചു. പ്രിയാദ് അപകടം നേരിട്ട് കണ്ടതിന് തെളിവുണ്ടോയെന്നും പ്രതിഭാഗം സംശയമുന്നയിച്ചു.
പ്രതികളും മരിച്ചവരും സംഭവസ്ഥലത്ത് എങ്ങനെ എത്തിയെന്നതടക്കമുള്ള കാര്യങ്ങളിൽ പോലീസ് വിശദമായ അന്വേഷണം നടത്തിയിട്ടില്ലെന്നും പ്രതിഭാഗം ആരോപിച്ചു. അപകടം നേരിട്ട് കണ്ട ദൃക്സാക്ഷിയുടെ മൊഴി പോലും കേസിലില്ലെന്നാണ് അഭിഭാഷകന്റെ വാദം. കേസിനു പിന്നിൽ പ്രതികൾക്കെതിരായ ഗൂഢാലോചനയുണ്ടെന്നും പ്രിയാദിന്റെ മൊഴിയിൽ സംശയങ്ങളുണ്ടെന്നും പ്രതിഭാഗം കോടതിയിൽ ഉന്നയിച്ചു.
മൂന്നുപേർ ഒരേ സ്കൂട്ടറിൽ സഞ്ചരിച്ചതാണ് അപകടത്തിന് കാരണമായതെന്ന പ്രതിഭാഗത്തിന്റെ വാദത്തിന്, അതുകൊണ്ടാണോ വാഹനം ഇടിച്ചിട്ടതെന്ന് കോടതി മറുചോദ്യം ഉന്നയിച്ചു. ഇത് നിയമലംഘനമാണെന്നായിരുന്നു പ്രതിഭാഗത്തിന്റെ മറുപടി. എന്നാൽ, അപകടത്തിൽ മരിച്ചവർക്കെതിരെ ഇനി എന്ത് നടപടിയാണ് സ്വീകരിക്കുകയെന്ന ചോദ്യത്തിലൂടെ കോടതി പ്രതിഭാഗത്തിന്റെ വാദത്തെ ചോദ്യം ചെയ്തു. കേസിൽ ജാമ്യാപേക്ഷയുമായി ബന്ധപ്പെട്ട വാദം തുടരുകയാണ്.
