പനമരം: ഗവ. കമ്യൂണിറ്റി ഹെൽത്ത് സെന്ററിലും ഗവ. ഹയർ സെക്കൻഡറി സ്കൂൾ പരിസരങ്ങളിലും കുരങ്ങുശല്യം രൂക്ഷമാകുന്നു. കൂട്ടമായെത്തുന്ന കുരങ്ങുകൾ രോഗികൾക്കും വിദ്യാർഥികൾക്കും സമീപവാസികൾക്കും ഭീഷണിയാകുകയാണ്. വാനരശല്യത്തിന് ശാശ്വത പരിഹാരം കാണണമെന്ന ആവശ്യവുമായി നാട്ടുകാർ രംഗത്തെത്തി.
ആശുപത്രിയിലെത്തുന്ന രോഗികളുടെ കൈവശമുള്ള സാധനങ്ങളും ഭക്ഷണപ്പൊതികളും കുരങ്ങുകൾ പിടിച്ചുപറിക്കുന്നതായി പരാതിയുണ്ട്. ആശുപത്രി വാർഡുകളിലും ഒ.പി. പരിസരത്തും കുരങ്ങുകൾ താവളമാക്കുന്നതും ജീവനക്കാരെ ആശങ്കയിലാക്കുന്നു.
തൊട്ടടുത്തുള്ള ഹയർ സെക്കൻഡറി സ്കൂളിലും സ്ഥിതി ഗുരുതരമാണ്. കുരങ്ങുകൾ കൂട്ടത്തോടെ ക്ലാസ് മുറികളിലേക്ക് ഇരച്ചുകയറുന്നതുമൂലം അധ്യയനം തടസ്സപ്പെടുന്നു. വിദ്യാർഥികളുടെ ഉച്ചഭക്ഷണവും ഭക്ഷണപ്പാത്രങ്ങളും കുരങ്ങുകൾ കവരുന്നതായും പരാതിയുണ്ട്. ചിലപ്പോഴൊക്കെ കുട്ടികളെ ആക്രമിക്കാൻ മുതിരുന്നതായും നാട്ടുകാർ പറയുന്നു.
പരിസരത്തെ മരങ്ങളിലും കെട്ടിടങ്ങളുടെ മുകളിലും തമ്പടിക്കുന്ന കുരങ്ങുകൾ വലിയ തോതിൽ നാശനഷ്ടങ്ങൾ വരുത്തുന്നുണ്ട്. ഏറെക്കാലമായി പ്രദേശത്ത് വാനരശല്യം തുടരുന്നുണ്ടെങ്കിലും ഫലപ്രദമായ നടപടികളൊന്നും ഉണ്ടായിട്ടില്ലെന്നാണ് നാട്ടുകാരുടെ ആരോപണം.
വനംവകുപ്പും തദ്ദേശ സ്വയംഭരണ അധികൃതരും അടിയന്തരമായി ഇടപെട്ട് കുരങ്ങുശല്യത്തിന് ശാശ്വത പരിഹാരം കാണണമെന്നും ആശുപത്രിയിലെ രോഗികളുടെയും സ്കൂളിലെ വിദ്യാർഥികളുടെയും സുരക്ഷ ഉറപ്പാക്കണമെന്നുമാണ് നാട്ടുകാരുടെ ആവശ്യം.
