മുംബൈ: നടൻ ആമിർ ഖാന്റെ അനന്തരവളും നടിയുമായ സെയ്ൻ മേരി, മുംബൈ പോലീസിന്റെ കസ്റ്റഡിയിലായതിന് പിന്നാലെ ശരീരത്തിലുണ്ടായ പരുക്കുകളുടെ ചിത്രങ്ങൾ സമൂഹമാധ്യമങ്ങളിൽ പങ്കുവെച്ചു. ശനിയാഴ്ച നഗരത്തിൽ നടന്ന കോക്ക്രോച്ച് ജനതാ പാർട്ടി (സിജെപി) പ്രതിഷേധത്തിനിടെയാണ് സെയ്ൻ മേരിയെയും നടന്മാരായ ഇമ്രാൻ ഖാൻ, ലേഖ വാഷിങ്ടൺ എന്നിവരെയും പോലീസ് കസ്റ്റഡിയിലെടുത്തത്.
കൈകളിലും വിരലുകളിലും കാലുകളിലും ഉണ്ടായ പരുക്കുകളുടെ പാടുകളാണ് സെയ്ൻ മേരി പുതിയ ഇൻസ്റ്റഗ്രാം റീലിലൂടെ പുറത്തുവിട്ടത്. പ്രതിഷേധത്തിനിടെ പോലീസിന്റെ നടപടിക്ക് ശേഷമുള്ള അവസ്ഥ വ്യക്തമാക്കുന്നതാണ് ചിത്രങ്ങൾ. ‘‘ഭയപ്പെടുത്താൻ നോക്കേണ്ട, ഭയമില്ലാതാക്കുകയാണ് ചെയ്യുന്നത്’ എന്ന അർഥം വരുന്ന വാക്കുകളും അവർ വീഡിയോയിൽ പങ്കുവെച്ചു. ‘അവൾ (ഭരണകൂടത്തെ) ഇന്റർനെറ്റിലൂടെ തുറന്നുകാട്ടുന്നു’ എന്ന കുറിപ്പും വിഡിയോയ്ക്കൊപ്പമുണ്ട്.
നേരത്തെ, തനിക്കൊപ്പം ഇമ്രാൻ ഖാനും ലേഖ വാഷിങ്ടണും പോലീസ് കസ്റ്റഡിയിലായതിന്റെ ദൃശ്യങ്ങളും സെയ്ൻ പങ്കുവെച്ചിരുന്നു. മുംബൈയിലെ ഓഗസ്റ്റ് ക്രാന്തി മൈതാനത്ത് ശനിയാഴ്ച നടന്ന പ്രതിഷേധത്തിൽ പങ്കെടുക്കാനെത്തിയപ്പോഴാണ് മൂവരെയും കസ്റ്റഡിയിലെടുത്തത്. സംഭവത്തിന്റെ വീഡിയോകളും ചിത്രങ്ങളും പിന്നീട് പുറത്തുവന്നു. പോലീസ് വാനിൽ കയറ്റി ഇവരെ കൊണ്ടുപോകുന്നതിന്റെ ദൃശ്യങ്ങളും ഇതിലുണ്ടായിരുന്നു. ഏതാനും മണിക്കൂറുകൾക്കുശേഷം ഇവരെ വിട്ടയച്ചു. പിന്നാലെ, പോലീസുമായുള്ള അനുഭവങ്ങൾ സമൂഹമാധ്യമങ്ങളിലൂടെ പങ്കുവെക്കുകയും ചെയ്തു.
Related Post
കസ്റ്റഡിയിലെടുത്ത ശേഷം തങ്ങളെ ഏകദേശം രണ്ട് മണിക്കൂറോളം പോലീസ് വാനിൽ വിവിധ സ്ഥലങ്ങളിലൂടെ കൊണ്ടുപോയെന്നാണ് ഇമ്രാൻ ഖാൻ വെളിപ്പെടുത്തിയത്. എന്തിനാണ് തന്നെ കസ്റ്റഡിയിലെടുത്തതെന്ന് അറിയില്ലായിരുന്നുവെന്നും അദ്ദേഹം പറഞ്ഞു.
“സത്യത്തിൽ എന്നെ എന്തിനാണ് ഇവിടെ കൊണ്ടുവന്നതെന്ന് എനിക്ക് അറിയില്ല. പോലീസുകാർ ഞങ്ങളെയെല്ലാം തെരുവിൽനിന്ന് പിടിച്ചുകൊണ്ടുപോയി. ‘വണ്ടിയിൽ കയറൂ’ എന്നായിരുന്നു അവർ പറഞ്ഞത്,” ഇമ്രാൻ പറഞ്ഞു. തുടർന്ന് പരിഹാസരൂപേണ, “വണ്ടിക്കുള്ളിൽ എന്തോ വലിയ സൗകര്യമുള്ളതുകൊണ്ടായിരിക്കണം അവർ ഇത്ര ആവേശത്തോടെ ഞങ്ങളെ അതിൽ കയറ്റുന്നത് എന്നാണ് ഞാൻ കരുതിയത്,” എന്നും അദ്ദേഹം കൂട്ടിച്ചേർത്തു.
ഏകദേശം രണ്ട് മണിക്കൂറോളം പോലീസ് വാനിൽ ചുറ്റിക്കൊണ്ടുപോയശേഷം അറിയാത്ത ഒരിടത്ത് തങ്ങളെ ഇറക്കിവിട്ടെന്നും ഇമ്രാൻ ആരോപിച്ചു. മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ സ്ഥാനത്തുനിന്ന് നീക്കണമെന്നും വോട്ടവകാശം പുനഃസ്ഥാപിക്കണമെന്നും ആവശ്യപ്പെട്ട് നടന്ന പ്രതിഷേധത്തിനിടെയാണ് മുംബൈ പോലീസ് നടപടി സ്വീകരിച്ചത്. വോട്ടർപട്ടികയിലെ പ്രത്യേക തീവ്ര പരിഷ്‌കരണമായ സ്പെഷ്യൽ ഇന്റൻസീവ് റിവിഷൻ (എസ്ഐആർ) സംബന്ധിച്ച ആശങ്കകളും വോട്ടർപട്ടികയിൽ ക്രമക്കേട് നടന്നെന്ന ആരോപണങ്ങളുമാണ് പ്രതിഷേധത്തിന് പിന്നിൽ.
അതേസമയം ഓഗസ്റ്റ് ക്രാന്തി മൈതാനത്തും സമീപത്തെ നാനാ ചൗക്കിലുമായി നടന്ന പ്രതിഷേധത്തിനിടെ 400-ലധികം പേരെ പോലീസ് കസ്റ്റഡിയിലെടുത്തു. കാമ്പെയ്ൻ ഫോർ ജുഡീഷ്യൽ അക്കൗണ്ടബിലിറ്റി ആൻഡ് റിഫോംസ് എന്ന സംഘടന മുന്നോട്ടുവെച്ച ഗ്യാനേഷ് കുമാറിന്റെ രാജിയെന്ന ആവശ്യത്തിന് പിന്തുണയുമായി മഹാത്മാഗാന്ധിയുടെ പ്രപൗത്രൻ തുഷാർ ഗാന്ധിയാണ് പ്രതിഷേധത്തിന് ആഹ്വാനം ചെയ്തത്. പ്രതിഷേധ സ്ഥലത്തേക്ക് പോകുന്നതിനിടെ തുഷാർ ഗാന്ധിയേയും പോലീസ് കസ്റ്റഡിയിലെടുത്തെങ്കിലും പിന്നീട് വിട്ടയച്ചു.
ബോംബെ ഹൈക്കോടതിയുടെ ഉത്തരവ് പ്രകാരം ഓഗസ്റ്റ് ക്രാന്തി മൈതാനം പ്രതിഷേധങ്ങൾക്ക് അനുവദിച്ചിട്ടുള്ള സ്ഥലമല്ലെന്നും ക്രമസമാധാനം നിലനിർത്തുന്നതിനുള്ള മുൻകരുതൽ നടപടിയുടെ ഭാഗമായാണ് ആളുകളെ കസ്റ്റഡിയിലെടുത്തതെന്നുമാണ് പോലീസിന്റെ വിശദീകരണം. മറ്റൊരു പ്രതിഷേധം തടയുന്നതിനായി ദാദറിലെ ശിവാജി പാർക്കിൽ വനിതാ ഉദ്യോഗസ്ഥർ ഉൾപ്പെടെയുള്ള കൂടുതൽ പോലീസുകാരെ വിന്യസിക്കുകയും മുംബൈയിലെ മറ്റു പ്രദേശങ്ങളിൽ സുരക്ഷ ശക്തമാക്കുകയും ചെയ്തു.
വോട്ടർപട്ടിക പരിഷ്‌കരണത്തിനെതിരെയും വോട്ടർ രജിസ്‌ട്രേഷനായി ഉപയോഗിക്കുന്ന ഫോം 6- മായി ബന്ധപ്പെട്ട മാറ്റങ്ങൾക്കെതിരെയും ന്യൂഡൽഹിയിലെ ജന്തർ മന്തറിൽ പ്രതിഷേധം നടത്താനും സിജെപി ആഹ്വാനം ചെയ്തിട്ടുണ്ട്. പ്രതിഷേധത്തിൽ ആയിരക്കണക്കിന് ആളുകളെ പങ്കെടുപ്പിക്കാനായിരുന്നു സംഘടനയുടെ നീക്കം. എന്നാൽ, ശനിയാഴ്ച ന്യൂഡൽഹിയിൽ വിമാനമിറങ്ങിയ സിജെപി സ്ഥാപകൻ അഭിജിത് ദിപ്കെയെയും സഹപ്രവർത്തകരായ സൗരവ് ദാസ്, ആശുതോഷ് റങ്ക എന്നിവരെയും പൊലീസ് കസ്റ്റഡിയിലെടുത്തു. പ്രതിപക്ഷ നേതാക്കൾ, മാധ്യമപ്രവർത്തകർ, അഭിഭാഷകർ എന്നിവരുൾപ്പെടെ 2,000-ത്തിലധികം പേരെയും പൊലീസ് കസ്റ്റഡിയിലെടുത്തതായാണ് റിപ്പോർട്ടുകൾ.
