2025 നവംബർ 7-നാണ് നടി കത്രീന കൈഫിന്റെയും നടൻ വിക്കി കൗശലിന്റെയും ജീവിതത്തിലേക്ക് മകൻ വിഹാൻ കൗശൽ എത്തിയത്. മാതൃത്വത്തിന്റെ പുതിയ അധ്യായത്തിലേക്ക് കടന്ന കത്രീന പ്രസവശേഷം കുറച്ചുകാലം പൊതുവേദികളിൽ നിന്ന് വിട്ടുനിന്നിരുന്നു. പിന്നീട് മുംബൈയിലെ ആന്റിലിയയിൽ അംബാനി കുടുംബം സംഘടിപ്പിച്ച ഗണേശോത്സവത്തിൽ ഭർത്താവ് വിക്കി കൗശലിനൊപ്പം പങ്കെടുത്തതോടെയാണ് താരം വീണ്ടും പൊതുശ്രദ്ധ നേടിയത്.
എന്നാൽ, ഇതിന് പിന്നാലെ സമൂഹമാധ്യമങ്ങളിൽ കത്രീനയ്ക്ക് നേരെ കടുത്ത ബോഡി ഷെയ്മിങ്ങും അധിക്ഷേപങ്ങളും ഉയർന്നു. പ്രസവശേഷം ശരീരത്തിലുണ്ടായ സ്വാഭാവിക മാറ്റങ്ങളെ പഴയ ചിത്രങ്ങളുമായി താരതമ്യം ചെയ്തായിരുന്നു പലരുടെയും പരിഹാസം. ശരീരഭാരം കൂടിയതോടെ കത്രീനയുടെ കരിയർ അവസാനിച്ചെന്ന തരത്തിലുള്ള പ്രചാരണങ്ങളും സമൂഹമാധ്യമങ്ങളിൽ പ്രത്യക്ഷപ്പെട്ടു.
ബോട്ടോക്സ് കുത്തിവയ്പ്പും പ്ലാസ്റ്റിക് ചികിത്സകളുമാണ് താരത്തിന്റെ സ്വാഭാവിക ഭംഗി നഷ്ടപ്പെടുത്തിയതെന്ന തരത്തിലുള്ള അധിക്ഷേപങ്ങളും എക്സിൽ ഉൾപ്പെടെ ഉയർന്നു. സിനിമയിൽ തുടരണമെങ്കിൽ ‘സൈസ് സീറോ’ ശരീരഘടനയും ആബ്സും വേണമെന്ന തരത്തിലുള്ള കൃത്രിമ സൗന്ദര്യ മാനദണ്ഡങ്ങളുടെ പേരിലും 20 വർഷത്തിലേറെ അഭിനയ പരിചയമുള്ള താരത്തെ വിമർശിച്ചു.
Related Post
എന്നാൽ ഇത്തരം വിമർശനങ്ങളോട് സ്വന്തം ശരീരത്തെയും ജീവിതത്തെയും ആത്മവിശ്വാസത്തോടെ സ്വീകരിച്ചാണ് കത്രീന മുന്നോട്ടുപോകുന്നത്. അടുത്തിടെ ‘ദി ഹോളിവുഡ് റിപ്പോർട്ടർ ഇന്ത്യ’യ്ക്ക് നൽകിയ അഭിമുഖത്തിൽ പ്രസവാനന്തര ജീവിതത്തെക്കുറിച്ചും സൗന്ദര്യത്തെക്കുറിച്ചുള്ള തന്റെ കാഴ്ചപ്പാടുകളിലെ മാറ്റങ്ങളെക്കുറിച്ചും താരം സംസാരിച്ചു.
ഗർഭധാരണത്തിന് ശേഷം തന്റെ ചർമം കൂടുതൽ സെൻസിറ്റീവായി മാറിയെന്ന് കത്രീന പറഞ്ഞു. പ്രസവശേഷം തനിക്ക് അനുയോജ്യമായ ചർമസംരക്ഷണ രീതിയും ഉൽപന്നങ്ങളും കണ്ടെത്താൻ സമയമെടുത്തതായും താരം വ്യക്തമാക്കി. ചർമത്തിന് ആശ്വാസവും ശാന്തതയും നൽകുന്ന സ്വാഭാവിക ഉൽപന്നങ്ങളിലേക്കാണ് ഈ ഘട്ടത്തിൽ കൂടുതൽ ശ്രദ്ധ നൽകിയതെന്നും കത്രീന പറഞ്ഞു.
മോഡലിങ്ങിലും അഭിനയത്തിലും തുടക്കകാലത്ത് സൗന്ദര്യത്തെക്കുറിച്ച് സമൂഹം മുന്നോട്ടുവച്ചിരുന്ന മാനദണ്ഡങ്ങളെക്കുറിച്ചും താരം സംസാരിച്ചു. അന്ന് ഏറ്റവും മനോഹരമായി കാണപ്പെടുക എന്നതിനായിരുന്നു പ്രാധാന്യമെങ്കിൽ ഇന്ന് തനിക്ക് ഏറ്റവും പ്രധാനപ്പെട്ടത് ശരീരത്തിലും മനസ്സിലും മികച്ചതായി അനുഭവപ്പെടുകയാണെന്ന് കത്രീന പറഞ്ഞു.
പുറമേയുള്ള സൗന്ദര്യത്തേക്കാൾ സ്വയം സ്നേഹിക്കുകയും സ്വയം പരിപാലിക്കുകയും ചെയ്യുന്നതിലാണ് യഥാർഥ സൗന്ദര്യമെന്നും താരം വ്യക്തമാക്കി.
ശരീരത്തിന്റെ ആരോഗ്യവും ചർമത്തിന്റെ ഭംഗിയും പരസ്പരം ബന്ധപ്പെട്ടിരിക്കുന്നുവെന്നാണ് കത്രീനയുടെ നിലപാട്. ശരീരത്തിലെ വീക്കം കുറയ്ക്കാൻ സഹായിക്കുന്ന പോഷകസമൃദ്ധമായ ഭക്ഷണം കഴിക്കുന്നതിനൊപ്പം ദിവസവും വ്യായാമം ചെയ്യുന്നതായും താരം പറഞ്ഞു. മാനസിക സമ്മർദം കുറയ്ക്കാൻ ധ്യാനം, രാവിലെ ഉണർന്നതിന് ശേഷമുള്ള ആദ്യ മണിക്കൂർ മൊബൈൽ ഫോൺ ഒഴിവാക്കൽ, പ്രകൃതിദത്തമായ വെയിൽ കൊള്ളൽ എന്നിവയും തന്റെ ദിനചര്യയുടെ ഭാഗമാണെന്നും കത്രീന വ്യക്തമാക്കി.
ഈ ചെറിയ ശീലങ്ങൾ മാനസികാവസ്ഥയിൽ വലിയ മാറ്റം ഉണ്ടാക്കുന്നുണ്ടെന്നും അകത്തുള്ള ആരോഗ്യം സ്വാഭാവികമായി ആത്മവിശ്വാസമായി പുറത്തേക്ക് പ്രതിഫലിക്കുമെന്നും താരം പറഞ്ഞു.
പ്രസവശേഷമുള്ള ശരീരമാറ്റങ്ങളെക്കുറിച്ച് സമൂഹമാധ്യമങ്ങളിൽ ചർച്ചകൾ ഉയരുന്നതിനിടെ കത്രീനയുടെ സിനിമാ ജീവിതത്തിനും ബിസിനസ് സംരംഭങ്ങൾക്കും ഇടവേളയില്ല. സിനിമയ്ക്ക് പുറമെ താരത്തിന്റെ ബ്യൂട്ടി ബ്രാൻഡായ ‘കേ ബ്യൂട്ടി’യും വിപണി വിപുലീകരിക്കുകയാണ്.
‘കേ ബ്യൂട്ടി’ 2025 സാമ്പത്തിക വർഷത്തിൽ 240 കോടി രൂപയുടെ വളർച്ച രേഖപ്പെടുത്തിയെന്നും 2026 സാമ്പത്തിക വർഷത്തിൽ ഇത് 350 കോടി രൂപയായി ഉയർന്നെന്നും റിപ്പോർട്ടുകൾ പറയുന്നു. യുകെയിലും മിഡിൽ ഈസ്റ്റിലും ബ്രാൻഡ് വിപുലീകരിക്കാനുള്ള ശ്രമങ്ങളും തുടരുകയാണ്.
അതേസമയം, നിരന്തരം ജോലി ചെയ്യുന്നത് തന്റെ സ്വഭാവത്തിന്റെ ഭാഗമാണെങ്കിലും മാനസിക സന്തുലിതാവസ്ഥ വീണ്ടെടുക്കാൻ ഇടവേളകൾ എടുക്കേണ്ടത് അനിവാര്യമാണെന്നും കത്രീന ഓർമിപ്പിക്കുന്നു. കുടുംബാംഗങ്ങൾക്കും അടുത്ത സുഹൃത്തുക്കൾക്കുമൊപ്പം സമയം ചെലവഴിക്കുന്നത് മനസ്സിന് സ്ഥിരതയും ശാന്തതയും നൽകുമെന്നും താരം പറഞ്ഞു.
