ബഹറൈൻ: ഓണാഘോഷ പരിപാടിക്കിടെ കുട്ടികളെ ഉപയോഗിച്ച് നടത്തിയ ‘ചരട് പിന്നിക്കളി’യുടെ പേരിൽ ബഹറൈൻ കേരളീയ സമാജം വിവാദത്തിൽ. കുട്ടികളെ കയറിൽ പിടിച്ച് ഉയരത്തിൽ നിർത്തുകയും ദേഹത്ത് ചരട് പിന്നിയെടുക്കുകയും ചെയ്യുന്ന പരിപാടിയുടെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെയാണ് വിമർശനം ശക്തമായത്. കുട്ടികളുടെ സുരക്ഷ അപകടത്തിലാക്കിയെന്നായിരുന്നു പ്രധാന വിമർശനം.
ബഹറൈൻ കേരളീയ സമാജത്തിലെ ഓണാഘോഷത്തോടനുബന്ധിച്ചാണ് പരിപാടി നടന്നത്. കയറിൽ തൂങ്ങിക്കിടക്കുന്ന കുട്ടിയെ ചുറ്റി നൃത്തം ചെയ്യുന്നതും പതിയെ ദേഹത്ത് ചരട് പിന്നിയെടുക്കുന്നതും ദൃശ്യങ്ങളിൽ കാണാം. ചിലർ രക്ഷിതാക്കളുടെ ചുമലിലും മറ്റുചിലർ കയറിൽ തൂങ്ങിയുമാണ് പരിപാടിയിൽ പങ്കെടുക്കുന്നത്. കളി പൂർത്തിയാകുന്നതുവരെ കുട്ടികൾ കയറിൽ തൂങ്ങിക്കിടക്കുന്ന രീതിയിലായിരുന്നു പരിപാടിയെന്നും വിമർശനമുയർന്നു.
വിമർശനം ശക്തമായതോടെ ബഹറൈൻ കേരളീയ സമാജം വിശദീകരണവുമായി രംഗത്തെത്തി. പരിപാടിയുടെ വീഡിയോയിലെ ചില ഭാഗങ്ങൾ മാത്രം കണ്ടാണ് വിമർശനം ഉയർന്നതെന്നാണ് സമാജത്തിന്റെ വിശദീകരണം. ചിട്ടയായ പരിശീലനത്തിനുശേഷവും രക്ഷിതാക്കളുടെ നേരിട്ടുള്ള ഇടപെടലോടെയുമാണ് പരിപാടി നടത്തിയതെന്നും സമാജം വ്യക്തമാക്കി. പരിപാടി കാണാനെത്തിയവർക്കോ കുട്ടികളുടെ മാതാപിതാക്കൾക്കോ പരാതിയുണ്ടായിരുന്നില്ലെന്നും കഴിഞ്ഞ അഞ്ച് വർഷമായി ഇത് നടത്തിവരുന്നതാണെന്നും സമാജം വിശദീകരിച്ചു.
അതേസമയം, കുട്ടികളെ ഉൾപ്പെടുത്താതെ തന്നെ അവതരിപ്പിക്കാവുന്ന കലാരൂപമാണ് ‘പിന്നൽ തിരുവാതിര’ അഥവാ ‘ചരടു പിന്നിക്കളി’ എന്നിരിക്കെ, പരിപാടിയിൽ കുട്ടികളെ ഉൾപ്പെടുത്തിയതെന്തിനെന്ന ചോദ്യവും ഉയരുന്നുണ്ട്. ബഹറൈൻ കേരളീയ സമാജം തന്നെ നേരത്തെ പങ്കുവെച്ച സമാന പരിപാടികളുടെ ദൃശ്യങ്ങളിൽ കുട്ടികൾ പങ്കെടുക്കുന്നതായി കാണുന്നില്ലെന്നതും ചർച്ചയായിട്ടുണ്ട്.
