ടെഹ്റാനിൽ നിന്ന് പുറത്തുവന്ന പുതിയ വിവരങ്ങൾ പ്രകാരം അമേരിക്ക-ഇറാൻ ബന്ധത്തിലെ കടുത്ത സംഘർഷാവസ്ഥ വീണ്ടും അന്താരാഷ്ട്ര തലത്തിൽ തലവേദന സൃഷ്ടിക്കുകയാണ്. ഇറാന്റെ വിദേശകാര്യ മന്ത്രി അബ്ബാസ് അരാഗ്ച്ചി, അമേരിക്കയുമായുള്ള സമാധാന ചർച്ചകളിൽ ഇറാൻ പ്രതിനിധികൾ നേരിട്ടിരുന്ന അതീവ അപകടകരമായ സാഹചര്യങ്ങളെക്കുറിച്ച് വെളിപ്പെടുത്തി. അമേരിക്കൻ പ്രസിഡന്റിന്റെ മിഡിൽ ഈസ്റ്റ് പ്രതിനിധിയായ സ്റ്റീവ് വിറ്റ്കോഫുമായുണ്ടായ സംഭാഷണം ഓർമ്മിപ്പിച്ചുകൊണ്ട്, ചർച്ചകൾ നടക്കുന്നതിനിടയിൽ തന്നെ ഏത് നിമിഷവും ആക്രമണം ഉണ്ടാകാമെന്ന ഭീതിയിലായിരുന്നു തങ്ങൾ പ്രവർത്തിച്ചതെന്ന് അദ്ദേഹം വ്യക്തമാക്കി.
യോഗത്തിനിടെ തന്നെ അത് ബോംബാക്രമണത്തിൽ തകർന്നുപോകാമെന്ന ആശങ്കയും, ഫോണിൽ സംസാരിക്കുമ്പോൾ തന്നെ അത് അവസാന സംഭാഷണമാകാമെന്ന ഭയവും നിലനിന്നിരുന്നുവെന്ന് അറാഘ്ചി പറഞ്ഞു. കുടുംബാംഗങ്ങളുമായി സംസാരിക്കുമ്പോഴും ജീവൻ അപകടത്തിലാകാമെന്ന അവസ്ഥയിലായിരുന്നു ചർച്ചകളെന്നും അദ്ദേഹം കൂട്ടിച്ചേർത്തു. ഇത്തരത്തിലുള്ള സാഹചര്യങ്ങളിൽ പോലും ഇറാൻ ചർച്ചകളിൽ നിന്ന് പിന്മാറിയില്ലെന്നും, സമ്മർദ്ദങ്ങൾക്ക് വഴങ്ങിയില്ലെന്നും അദ്ദേഹം വ്യക്തമാക്കി.
അതുപോലെ അമേരിക്ക ആവശ്യപ്പെട്ട ‘സീറോ എൻറിച്ച്‌മെന്റ്’ എന്ന നിബന്ധന ഇറാൻ നിരസിച്ചതായും, അന്യായവും നിയമവിരുദ്ധവുമായ ഈ ആവശ്യത്തിന് മുന്നിൽ രാജ്യം ഉറച്ച് നിന്നതായും അദ്ദേഹം പറഞ്ഞു. ചർച്ചകളിലൂടെ ലക്ഷ്യം കൈവരിക്കാനാകില്ലെന്ന് മനസ്സിലാക്കിയപ്പോൾ അമേരിക്കയും ഇസ്രായേലും യുദ്ധത്തിലേക്ക് നീങ്ങിയതായും അദ്ദേഹം ആരോപിച്ചു. “സംസാരിക്കാൻ തയാറാണ്, പക്ഷേ ഭീഷണിപ്പെടുത്താനോ കൈക്കൂലി നൽകാനോ കഴിയില്ല” എന്നായിരുന്നു അദ്ദേഹത്തിന്റെ നിലപാട്.
അതേസമയം കഴിഞ്ഞ വർഷം മുതൽ അമേരിക്ക ഇറാനുമായി ആണവ ചർച്ചകൾക്കായി ബന്ധപ്പെടുന്നുണ്ടെന്നും ഇടയ്ക്കിടെ ആശയവിനിമയം തുടരുന്നുണ്ടെന്നും അറാഘ്ചി വ്യക്തമാക്കി. ചർച്ചകളിൽ ഇറാൻ എടുത്ത കടുത്ത നിലപാടാണ് അമേരിക്കയെ കൂടുതൽ കടുത്ത നടപടികളിലേക്ക് നയിച്ചതെന്നും അദ്ദേഹം പറഞ്ഞു. 12 ദിവസത്തെ യുദ്ധത്തിൽ അമേരിക്ക പരാജയപ്പെട്ടുവെന്നും, ഇറാൻ ഭീഷണികളെ ഭയക്കുന്നില്ലെന്നും അദ്ദേഹം കൂട്ടിച്ചേർത്തു.
അതുപോലെ ഇറാനെ വെനസ്വേലയുമായി താരതമ്യം ചെയ്യാനുള്ള അമേരിക്കൻ നിലപാട് അദ്ദേഹം തള്ളി. വെനസ്വേലയിലെ പോലെ ഒരാളെ നീക്കം ചെയ്താൽ ഭരണസംവിധാനം തകർന്നുപോകുന്ന സാഹചര്യം ഇറാനിൽ ഇല്ലെന്നും, രാജ്യത്തിന്റെ അധികാര ഘടന പല തലങ്ങളിലായി വിഭജിച്ചിരിക്കുന്നതിനാൽ ഒരു വ്യക്തിയെ ലക്ഷ്യമാക്കി സമ്മർദ്ദം ചെലുത്തിയാൽ ഭരണകൂടം തകർന്നുപോകില്ലെന്നും അദ്ദേഹം വ്യക്തമാക്കി.
ഇതിനിടെ അമേരിക്ക-ഇറാൻ സമാധാന കരാർ പ്രായോഗികമായി തകർന്ന നിലയിലാണ്. തുടർച്ചയായി ഒൻപതാം ദിവസവും അമേരിക്ക ഇറാനെതിരെ ആക്രമണം നടത്തിയതായി റിപ്പോർട്ടുകൾ സൂചിപ്പിക്കുന്നു. പുതിയ ഏറ്റുമുട്ടലുകളിൽ മൂന്ന് അമേരിക്കൻ സൈനികർ കൊല്ലപ്പെട്ടതായും സ്ഥിരീകരിച്ചിട്ടുണ്ട്. കൂടാതെ ഹോർമുസ് കടലിടുക്കിലെ കപ്പൽഗതാഗതത്തെ കുറിച്ചുള്ള ആശങ്കയും വർധിച്ചിരിക്കുകയാണ്.
അമേരിക്കൻ സെൻട്രൽ കമാൻഡ് ഇറാന്റെ ആക്രമണ ശേഷി കുറയ്ക്കുന്നതിനായി പുതിയ ആക്രമണ തരംഗം ആരംഭിച്ചതായി അറിയിച്ചു. അതേസമയം, ഇറാനിലെ വിവിധ നഗരങ്ങളിൽ മിസൈൽ ആക്രമണം ഉണ്ടായതായി ഇറാനിയൻ മാധ്യമങ്ങൾ റിപ്പോർട്ട് ചെയ്തു. തബ്രിസ്, ചാബഹാർ, കൊണറാക്, ബന്ദർ മഹ്ഷഹർ, ബന്ദർ ഇമാം ഖൊമെയ്‌നി എന്നിവിടങ്ങളിൽ സ്ഫോടന ശബ്ദങ്ങൾ കേട്ടതായി വിവരങ്ങൾ പുറത്തുവന്നു.
ഇതിനു പ്രതികാരമായി ഇറാൻ സിറിയയിലെ അൽ-തൻഫ് മേഖലയിലുള്ള അമേരിക്കൻ സൈനിക കേന്ദ്രത്തെ ലക്ഷ്യമാക്കി ആക്രമണം നടത്തിയതായി ഇസ്ലാമിക് റവല്യൂഷണറി ഗാർഡ് കോർപ്പ്സ് അറിയിച്ചു. കുവൈറ്റിലെ അൽ-അദിരി ക്യാമ്പിലും അലി അൽ സലേം എയർബേസിലും ഇറാൻ ഡ്രോൺ ആക്രമണം നടത്തിയതായും റിപ്പോർട്ടുകൾ വ്യക്തമാക്കുന്നു. ഗൾഫ് മേഖലയിലുള്ള അമേരിക്കൻ സൈനിക താവളങ്ങൾക്കെതിരെ കഴിഞ്ഞ ദിവസങ്ങളിൽ തന്നെ നിരവധി ആക്രമണങ്ങൾ നടന്നിരുന്നു. സംഘർഷം വീണ്ടും രൂക്ഷമാകുന്ന സാഹചര്യത്തിൽ മധ്യപൂർവേഷ്യയിൽ ആശങ്ക ഉയരുകയാണ്.
