ചെന്നൈ: നടി തൃഷ കൃഷ്ണൻ വിജയ് യുടെ തമിഴക വെട്രി കഴകം (ടിവികെ) പാർട്ടിയിൽ ചേരാൻ സാധ്യതയുണ്ടെന്ന് റിപ്പോർട്ടുകൾ. തൃഷ പാർട്ടിയിൽ ചേരുന്നതിനും തമിഴ്നാട്ടിലെ തിരുച്ചിറപ്പള്ളി ഈസ്റ്റ് മണ്ഡലത്തിൽ ഉപതിരഞ്ഞെടുപ്പിൽ മത്സരിക്കുന്നതിനും ടിവികെ നേതാക്കൾക്ക് താത്പര്യമുണ്ടെന്നുള്ള റിപ്പോർട്ടുകളുമുണ്ട്.
തമിഴ്നാട് നിയമസഭാ തിരഞ്ഞെടുപ്പിൽ വിജയ് ചെന്നൈയിലെ പെരമ്പൂരിലും തിരുച്ചിറപ്പള്ളി ഈസ്റ്റ് മണ്ഡലത്തിലും വിജയിച്ചിരുന്നു. നിയമപ്രകാരം, അദ്ദേഹത്തിന് രണ്ട് സീറ്റുകളും നിലനിർത്താൻ കഴിയില്ല. അതിനാൽ, 14 ദിവസത്തിനുള്ളിൽ ഒരെണ്ണത്തിൽനിന്ന് രാജിവെക്കണം. ഇതിനെത്തുടർന്ന് ഉപതിരഞ്ഞെടുപ്പ് പ്രഖ്യാപിക്കും.
വിജയിയുടെ വിജയമാർജിൻ ഇരട്ടിയിലധികം ആയതുകൊണ്ടും സംസ്ഥാന സെക്രട്ടറിയേറ്റുമായി മണ്ഡലം അടുത്തായതുകൊണ്ടും പെരമ്പൂർ നിലനിർത്താൻ വിജയ്യും അദ്ദേഹത്തിന്റെ പാർട്ടിയംഗങ്ങളും ആഗ്രഹിക്കുന്നു എന്നാണ് റിപ്പോർട്ടുകൾ. വിജയ് തിരുച്ചിറപ്പള്ളി ഈസ്റ്റ് സീറ്റിൽ നിന്ന് രാജിവെക്കാൻ സാധ്യതയുണ്ടെന്നാണ് സൂചന.
Related Post
വിജയും ടിവികെ നേതാക്കളും തൃഷയെ ആ സീറ്റിൽനിന്ന് മത്സരിപ്പിക്കാൻ ശ്രമിക്കുകയാണെന്ന് റിപ്പോർട്ടുകളുണ്ട്. തൃഷയ്ക്ക് രാഷ്ട്രീയ പാരമ്പര്യമില്ല കൂടാതെ രാഷ്ട്രീയത്തിൽ പ്രവേശിക്കാൻ അവർ താത്പര്യം പ്രകടിപ്പിച്ചിട്ടുമില്ല.
