ബെംഗളൂരു: ക്ലാസ് മുറിയിൽ വച്ച് സ്വന്തം വിദ്യാർത്ഥിനിയോട് പ്രണയാഭ്യർത്ഥന നടത്തിയ അസിസ്റ്റന്റ് പ്രൊഫസറെ കയ്യേറ്റം ചെയ്ത് സഹ വിദ്യാർത്ഥികൾ. കർണാടകയിലെ തുമകൂരുവിലെ നെലമംഗല താലൂക്കിലെ ശ്രീ സിദ്ധാർഥ മെഡിക്കൽ കോളേജിലാണ് സംഭവം. അധ്യാപകൻ പ്രണയാഭ്യർത്ഥന നടത്തുന്ന വീഡിയോ സോഷ്യൽ മീഡിയയിൽ വ്യാപകമായി പ്രചരിച്ചിരുന്നു. ക്ലാസിനെ അഭിസംബോധന ചെയ്ത് സംസാരിച്ച അസിസ്റ്റന്റ് പ്രൊഫസർ മറ്റ് കുട്ടികളുടെ മുന്നിൽ വെച്ച് പ്രണയാഭ്യർത്ഥന നടത്തുന്നതും ചോക്ലേറ്റുകൾ വിതരണം ചെയ്യുന്നതും വീഡിയോയിൽ കാണാം.
‘ഈ ബാച്ച് എനിക്ക് നൽകിയ സ്‌നേഹം വലുതാണ്. നിങ്ങളുടെ ബാച്ചിലെ ഏറ്റവും പ്രധാനപ്പെട്ട ഒരു പെൺകുട്ടിയോട് എനിക്ക് പ്രണയാഭ്യർഥന നടത്തണം. അതിനു ശേഷം എല്ലാവർക്കും ഞാൻ മിഠായി വിതരണം ചെയ്യും’, എന്ന് എന്നും ഇയാൾ വീഡിയോയിൽ പറയുന്നു. തുടർന്ന് പ്രൊഫസറെ തടഞ്ഞ വിദ്യാർത്ഥിനി തനിക്ക് പ്രിൻസിപ്പലിനോട് സംസാരിക്കണം എന്ന് ആവശ്യപ്പെട്ടു. എന്നാൽ, പെൺകുട്ടി തന്നോട് നേരത്തെ പ്രണയം പറഞ്ഞുവെന്നും അതിന് തന്റെ പക്കൽ സിസിടിവി തെളിവുണ്ടെന്നുമായിരുന്നു പ്രൊഫസറിന്റെ അവകാശവാദം.
പക്ഷെ പെൺകുട്ടി ഇത് നിഷേധിച്ചതോടെ, അടുത്ത ദിവസം സംസാരിക്കാം എന്ന് പറഞ്ഞ് മിഠായി കഴിക്കാൻ ആവശ്യപ്പെട്ട് അയാൾ ക്ലാസിന് പുറത്തേക്ക് പോയി. വിവരമറിഞ്ഞെത്തിയ മറ്റുചില വിദ്യാർത്ഥികൾ പ്രൊഫസറെ തടയുകയും തർക്കമാവുകയുമായിരുന്നു. ഒടുവിലിത് കയ്യാങ്കളിയിൽ കലാശിച്ചു.
ഇതിനിടെ വിദ്യാർത്ഥിനി പ്രൊഫസറെ കാലിൽ കിടന്ന ചെരുപ്പുകൊണ്ട് അടിക്കുന്നതും മറ്റു വിദ്യാർഥികൾ അദ്ദേഹത്തെ മർദിക്കുന്നതും മറ്റൊരു വീഡിയോയിലുണ്ട്. അതേസമയം ഇയാൾക്കെതിരെ ലൈംഗികാരോപണ പരാതികൾ വിദ്യാർത്ഥികൾ ഉന്നയിച്ചിട്ടുണ്ട്. തുടർന്ന് കോളേജിലേക്ക് പ്രവേശിക്കാൻ ഇയാൾക്ക് വിലക്കേർപ്പെടുത്തിയിരുന്നു. ഇത് ലംഘിച്ചാണ് മാർച്ച് 23-ന് കോളേജിലെത്തിയതെന്നും ആരോപിക്കപ്പെടുന്നു. കോളേജ് പ്രിൻസിപ്പലിന്റെ പരാതിയുടെ അടിസ്ഥാനത്തിൽ, ഭാരതീയ ന്യായ സംഹിതയിലെ വകുപ്പുകൾ പ്രകാരം പ്രൊഫസർക്കെതിരെ പോലീസ് കേസെടുത്തു. കൂടുതൽ അന്വേഷണം നടന്നുവരികയാണെന്ന് അധികൃതർ അറിയിച്ചു.
Bizarre in #Bengaluru!
A professor proposes to a student in the classroom of a medical college at T Begur in Nelamangala. The girl takes objection.
A few moments later: The girl & fellow students thrash the professor. @timesofindia pic.twitter.com/uYz4MyXKke
— TOI Bengaluru (@TOIBengaluru) March 26, 2026
